HBD BaluMahendra : பல்துறை வித்தகர் பாலுமகேந்திரா பிறந்த தினம் இன்று

Priyadarshini R HT Tamil Published May 20, 2023 05:50 AM IST

எங்களை பின் தொடரலாம்

Priyadarshini R HT Tamil

Published May 20, 2023 05:50 AM IST

HBD BaluMahendra : தமிழ் திரையுலகில் ஒளியை வைத்து கவிதை படைத்தவர், ஓவியம் வரைந்தவர், கண்களால் காண்பவற்றையெல்லாம் அதிசய பிம்பங்களாக மாற்றக்கூடியவர் என்றெல்லாம் கலை ரசிகர்களால் வர்ணிக்கப்படக்கூடியவர் பாலு மகேந்திரா.

இயக்குனர் பாலுமகேந்திரா

எங்களை பின் தொடரலாம்

ஈழத்தில் மட்டகளப்பு அருகேயுள்ள அமிர்தகழி என்ற சிற்றூரில் பிறந்து, மலையாள திரையுலகில் வாழ்ந்து, தமிழ் திரையுலகில் முத்திரை பதித்த திரைப்படங்களை உருவாக்கிய வித்தக இயக்குனரான இவர், மொழிகளுக்கு அப்பாற்பட்டு நாடெங்கும் திரைக்கலைஞர்கள், சினிமா ஆர்வலர்கள் கொண்டாடினர்.

தான், ஆறாம் வகுப்பு படிக்கும்போது இலங்கையில் ஒரு ஆங்கில சினிமா படப்பிடிப்பில் இயக்குனராக வேலை பார்த்துக் கொண்டிருந்த டேவிட் லீனின் ஆளுமையை பார்த்து, தானும் இயக்குனராக வேண்டும் ஆசைப்பட்டவர் பாலுமகேந்திரா.

அந்த உந்துதலில் 1966 ஆம் ஆண்டு பாலுமகேந்திரா வந்து இணைந்த இடம் புனேவில் உள்ள Film and Television Institute of India. ஆனால் அங்கு தனக்கு பிடித்தமான இயக்குனர் துறையை செய்ய முடியாமல், வேறு வழியின்றி ஒளிப்பதிவு துறையை தேர்ந்தெடுக்க வேண்டிய கட்டாயத்துக்கு ஆளானார்.

எனினும் கிடைத்த பாடத்தை சிறப்புடன் கற்றுத் தேர்ந்து தங்கப் பதக்கமும் பெற்றார். அங்கு படிக்கும்போது அவர் எடுத்த “A View from the Fort” என்ற குறும்படத்தின் வெற்றி, மலையாள திரையுலகில் ”நெல்லு”என்ற திரைப்படத்தில் ஒளிப்பதிவாளராக பணிபுரிவதற்கான வாய்ப்பை அவருக்கு பெற்றுத் தந்தது.

ஆனால் பாலும்கேந்திரா ஒளிப்பதிவில் முதலில் வெளியான திரைப் படம் 1972ல் வெளிவந்த “சாஸ்த்திரம் ஜெயிச்சு மனுஷ்யன் தொட்டு” என்ற திரைப்படம்தான். பின்னாளில் 1974ல் வெளியான ”நெல்லு” திரைப்படம் கேரள அரசின் மாநில விருதை பெற்றது.

பின்னர் 1975ம் ஆண்டு “ப்ரயணம்” “ச்சுவன்னசந்த்யாக்கள்” ஆகிய இரண்டு திரைப்படங்களுக்கு மாநில அரசின் சிறந்த ஒளிப்பதிவாளருக்கான விருதினை பெற்று தனது ஆளுமையை அழுத்தமாக பதித்தார் பாலுமகேந்திரா.

தொடர்ந்து 7 வருடங்கள் ஒளிப்பதிவாளராக 20 திரைப்படங்களில் பணியாற்றிய பின்புதான் தனது முதல் திரைப்படத்தை இயக்கும் வாய்ப்பு அவருக்கு கிடைத்தது. அத்திரைப்படமான, கன்னடத்தில் வெளியான கோகிலா 1977ல் சிறந்த திரைக்கதை ஆசிரியருக்கான கர்நாடக அரசின் மாநில விருதை பெற்றுத் தந்தது. அதைத்தொடர்ந்து கன்னட திரையுலகம் இவரை, ஆரத்தழுவி வரவேற்று கொண்டது.

பாலுமகேந்திரா ஒளிப்பதிவு செய்த முதல் தமிழ் படம் “முள்ளும் மலரும்” 1977-ல் வெளியானது. 1978-ல் 'அழியாத கோலங்கள்' வெளியாயிற்று. பாலு மகேந்திரா மணிரத்தினம் போன்ற பல முக்கியமான இயக்குநர்களின் முதல் படங்களுக்கு ஒளிப்பதிவு செய்துள்ளார்.

வீடு, சந்தியாராகம், வண்ண வண்ண பூக்கள் ஆகிய படங்கள் மூலம் சிறந்த இயக்குனருக்கான தேசிய விருதை பாலு மகேந்திரா 3 முறை பெற்றுள்ளார்.

மேலும் கோகிலா, அழியாத கோலங்கள் ஆகியவை சிறந்த திரைக்கதைக்கான விருதினைப் பெற்றுத் தந்தன. ஜூலி கணபதி சிறந்த படத்தொகுப்புக்கான சாந்தாராம் விருது பெற்றது. திரையுலகில் இம்மூன்று துறைகளிலும் விருதுபெற்ற ஒரே திரைப்பட நிபுணர் அவரே.

தமிழ் திரையுலகில் கோலோச்சும் இயக்குநர்கள் பாலா, சீனு ராமசாமி, ராம், வெற்றி மாறன், பாடலாசிரியர் நா.முத்துக்குமார் போன்ற பலர் இவரது பட்டறையிலிருந்து திரைத்துறைக்கு வந்தவர்களே. ஆனால், பாலு மகேந்திரா யாரிடமும் உதவி இயக்குனராக பணிபுரிந்ததில்லை.

சினிமாவுக்கென தன்னை அர்ப்பணித்துக் கொண்ட அவர், பல்வேறு பெருமைகளுக்குச் சொந்தக்காரராக இன்றளவும் விளங்குகிறார். படைப்பாளியாக மட்டுமில்லாமல், தலைசிறந்த வாசகராகவும் இருந்தார் பாலு மகேந்திரா.

இலக்கியத்தையும், திரை ஊடகத்தையும் இணைக்கும் இடைவிடாக் கண்ணியாக தொடர்ந்து செயல்பட்டு வந்த அவர், திரைத்துறையில் ஆர்வமுள்ள மாணவர்களுக்கு பயிற்சி அளிக்கும் வகையில் சினிமா பட்டறை என்னும் பெயரில் சென்னையில் திரைப்படப் பள்ளியை நடத்தி வந்தார். தமிழ் திரையுலகம் இருக்கும்வரை அவரது புகழ் இம்மண்ணில் மங்காது தங்கி நிற்கும்.