Actor Sarath Babu: நடிகர் சரத்பாபு காலமானார் - சோகத்தில் ரசிகர்கள்!
நடிகர் சரத்பாபு உடல் நலக்குறைவு காரணமாக ஹைதராபாத் மருத்துவமனையில் அனுமதிக்கப்பட்ட நிலையில் இன்று உயிரிழந்தார்.
தமிழ் மற்றும் தெலுங்கு திரையுலகில் முன்னணி நடிகராக இருந்தவர் நடிகர் சரத்பாபு. தமிழ் திரைத்துறையின் மறைந்த இயக்குநர் பாலச்சந்தர் இயக்கிய பட்டினப்பிரவேசம் திரைப்படத்தின் மூலம் 1971 ஆம் ஆண்டு தமிழ் சினிமாவில் அறிமுகமானார்.
சுமார் 40 ஆண்டுகளுக்கும் மேலாக சினிமாவில் பயணம் செய்த இவர் 200 க்கும் மேற்பட்ட திரைப்படங்களில் நடித்து உள்ளார். நடிகர் ரஜினிகாந்த்துக்கு மிகப்பெரிய வெற்றி படமாக அமைந்த அண்ணாமலை திரைப்படத்தில் அவருக்கு நண்பனாக நடித்து மிகவும் பிரபலமானார்.
முத்து திரைப்படத்திலும் ரஜினிகாந்த்துக்கு எசமானாக நடித்திருப்பார். இது போன்ற ஹிட் படங்கள் இவருக்கு மிகப்பெரிய புகழைத் தேடித் தந்தது. தமிழ் தெலுங்கு மட்டுமின்றி கன்னடா, மலையாளம், ஹிந்தி உள்ளிட்ட மொழிகளிலும் பல படங்களில் இவர் நடித்துள்ளார்.
90களில் சூப்பர் ஸ்டாராக இருந்த ரஜினிகாந்த் மற்றும் சிரஞ்சியுடன் சரத்பாபு நடித்த படங்கள் மிகப்பெரிய வெற்றிகளைப் பெற்றன. சினிமா மட்டுமின்றி தொலைக்காட்சி தொடர்களிலும் இவர் நடித்துள்ளார்.
கடந்த சில மாதங்களாக உடல் நலக்குறைவு காரணமாக அவதிப்பட்டு வந்த அவர் ஹைதராபாத்தில் உள்ள மருத்துவமனையில் சிகிச்சை வழங்கப்பட்டது. அவருடைய உடல் உறுப்புகள் செயலிழக்க தொடங்கி விட்டதாகவும், எனவே ஆவசர சிகிச்சை பிரிவில் தொடர்ந்து அவருக்கு தீவிர சிகிச்சை அளிக்கப்பட்டு வருவதாககூறப்பட்டது. சிறுநீரகம், நுரையீரல், கல்லீரல் போன்ற முக்கிய உறுப்புகளை பாதிக்கும் செப்சிஸ் நோயால் அவர் பாதிக்கப்பட்டு இருந்தார்.
இந்நிலையில் சரத்பாபு இன்று சிகிச்சை பலனின்றி உயிரிழந்துள்ளார். கடந்த சில வாரங்களுக்கு முன்னர் அவர் மரணமடைந்ததாக செய்தி பரவியது.
பின்னர் அவரது குடும்பத்தினர் அது வெறும் வதந்தி என கூறி, அவர் விரைவில் நலம்பெற பிரார்த்தனை செய்யுமாறும் வேண்டுகோள் விடுத்தனர். நடிகர் சரத்பாபுவின் மறைவு திரையுலகினர் மத்தியில் பெரும் சோகத்தை ஏற்படுத்தி உள்ளது. அவரது மறைவுக்கு பிரபலங்கள் பலரும் சமூக வலைதளம் வாயிலாக இரங்கல் தெரிவித்து வருகின்றனர்.
தமிழ்நாடு, தேசம் மற்றும் உலகம், பொழுதுபோக்கு, விளையாட்டு, லைஃப்ஸ்டைல், ஜோதிடம், புகைப்பட கேலரி, வேலைவாய்ப்பு, சமீபத்திய செய்திகள் என அனைத்தையும் இந்துஸ்தான் டைம்ஸ் தமிழ் இணையதளத்தில் உடனுக்குடன் தெரிந்து கொள்ளலாம்.
சமூக வலைத்தளங்களில் எங்களை பின்தொடரலாம். லிங்க்குகள் கீழே கொடுக்கப்பட்டுள்ளன:
டாபிக்ஸ்