Parthiben and Simbu: 'பத்து தல' சிம்புவை புகழ்ந்து தள்ளிய பார்த்திபன்!

இதனிடையே நடிகர் சிம்பு 'பத்து தல' படப்பிடிப்பில் தீவிரம் காட்டி வருகிறார். கன்னடத்தில் 2017ஆம் ஆண்டு வெளியாகி வெற்றி பெற்ற ‘முஃப்தி’ படத்தின் தமிழ் ரீமேக் திரைப்படம் தான் 'பத்து தல'.

'சில்லுன்னு ஒரு காதல்', 'நெடுஞ்சாலை' உள்ளிட்ட படங்களை இயக்கிய ஒபிலி கிருஷ்ணா இப்படத்தை இயக்கி வருகிறார். பிரியா பவானி சங்கர், கௌதம் கார்த்திக், கலையரசன், அனு சித்தாரா ஆகியோர் முக்கிய கதாபாத்திரத்தில் நடிக்கின்றனர். பத்துதல படத்தை ஸ்டூடியோ கிரீன் நிறுவனம் சார்பில் ஞானவேல் ராஜா தயாரிக்கிறார்.

ஏ.ஆர்.ரஹ்மான் இசையமைக்கும் இந்தப் படத்தில் கௌதம் வாசுதேவ் மேனன், டீஜே, ஜோ மல்லூரி மற்றும் ரெடின் கிங்ஸ்லி என பலரும் நடிக்கின்றனர். ’பத்துதல’ திரைப்படம் டிசம்பர் 14 ஆம் தேதி வெளியாகும் என ஏற்கனவே அதிகாரபூர்வ அறிவிப்பு வெளியிடப்பட்டுள்ளது.

இந்த நிலையில், சமீபத்தில் நடைபெற்ற நிகழ்ச்சி ஒன்றில் நடிகரும், இயக்குநருமான பார்த்திபன் நடிகர் சிம்புவை சந்தித்து பேசி இருக்கிறார். அந்த புகைப்படத்தை தற்போது பார்த்திபன் தனது டுவிட்டர் பக்கத்தில் பதிவிட்டுள்ளார்.

"ஒரு இரவின் ஒளியில்…பத்து தலையுடன்! பத்து தலையின் மொத்த மூளையும் ஒத்த தலையில். விசேட திறமையை பெற்றவர். பெற்றவரிடமிருந்தும், தான் பெறும் அனுபவத்திலிருந்தும் கற்றவர். சந்திக்கும் போது மட்டும் இணையும் நாள் குறித்து சிந்திப்போம். இணையும் நாளில் வெற்றியை சந்திப்போம்". என்றும் பதிவிட்டுள்ளார் பார்த்திபன்.