Billa Re Release: ‘இரண்டும் ஒன்னுக்கு ஒன்னு சளைச்சது இல்ல.. போட்டின்னா போட்டிதான்’ - ரீ ரிலிஸ் ஆகும் பில்லா!

ஜிபி என்டர்டெயின்மென்ட்டின் அரவிந்த் சுரேஷ் குமார் மற்றும் டாக்டர் ஞானபாரதி ஆகியோர் மே 1, 2024 அன்று, தமிழ்நாடு முழுவதும் ஏடிஎம் புரொடக்ஷன்ஸ் மூலம், 150+ திரைகளில் இந்தப் படத்தை வெளியிடுகிறார்கள்.

இது குறித்து ஜிபி என்டர்டெயின்மென்ட் அரவிந்த் சுரேஷ் குமார் & டாக்டர் ஞானபாரதி பேசும் போது, “ இந்தத் திரைப்படம் வெற்றிகரமான ரீமேக்குகளில் ஒன்றாக சினிமாத் துறையில் குறிப்பிடத்தக்க இடத்தைப் பிடித்துள்ளது. 

'பில்லா' திரைப்படத்தின் திரையரங்க வெளியீடு, அஜித் ரசிகர்களுக்கு அப்பாற்பட்டு, அனைத்துத் தரப்பு பார்வையாளர்களையும், கவர்ந்த ஒரு பிரமாண்டமான கொண்டாட்டமாக அமைந்தது. 

மே 1, 2024 அஜித்குமார் சாரின் பிறந்தநாளை ஒட்டி, தமிழ்நாட்டில் 150க்கும் மேற்பட்ட திரையரங்குகளில் இந்தப்படத்தை மீண்டும் வெளியிட, ஏடிஎம் புரொடக்ஷன்ஸுடன் இணைந்து செயல்படுவதில் நாங்கள் மகிழ்ச்சியடைகிறோம்" என்றனர்.

பில்லா திரைப்படத்தில், அஜித்குமார் இரட்டை வேடத்தில் நடித்திருக்க, நடிகை நயன்தாரா கதாநாயகியாக நடித்திருந்தார். நீரவ் ஷா ஒளிப்பதிவு செய்திருந்த நிலையில், யுவன் ஷங்கர் ராஜா இசையமைத்து இருந்தார். 

விஷ்ணுவர்தனின் ஸ்டைலான மேக்கிங்கில், அஜித்குமார் நடிப்பில் வெளியான ‘பில்லா’ திரைப்படம் அவரின் கேரியரில் முக்கியமான படமாக அமைந்தது மட்டுமல்லாமல், பாக்ஸ் ஆஃபிஸிலும், சாதனையைப் படைத்தது குறிப்பிடத்தக்கது. 

முன்னதாக, விஜயின் பிளாக்பஸ்டர் திரைப்படமாக அமைந்த கில்லி திரைப்படம் சில நாட்களுக்கு முன்னதாக ரீ  ரிலிஸ் செய்யப்பட்டது. அந்தப்படம் மூன்று நாட்களில் 15 கோடி வரை வசூல் செய்திருப்பதாக கூறப்படுகிறது. 

பில்லா திரைப்பட விமர்சனம்!

டேவிட் பில்லா, பல்வேறு கிரிமினல் வழக்குகளில் தொடர்புடையவர். இன்டர்நேஷனல் போலீசாரால் தேப்படுபவர். மலேசியாவில் ஒளிந்துகொண்டு செயல்படுபவர். அவரை தேடிச்செல்லும் இந்திய காவல்துறை அதிகாரி ஜெயபிரகாஷ், ஒருமுறை அவரை துரத்தும்போது, பில்லா, ஜெயபிரகாஷ் முன் பலத்த காயத்துடன் இறக்கிறார்.

அவர் இறந்த பில்லாவின் உடலை புதைக்கிறார். இன்டர்போல் அதிகாரி கோகுல்நாத்தும் ஜெய்பிரகாசுடன் இணைந்து பில்லாவை பிடிக்க நியமிக்கப்படுகிறார். ஆனால் பில்லா இறந்த தகவல் யாருக்கும் தெரியாது. ஜெயபிரகாஷ், பில்லாவின் மரணத்தை ரகசியமாவே வைத்திருக்கிறார்.

பில்லாவுக்கு பதில் பில்லா போலவே தோற்றமளிக்கும், சரவண வேலுவை பில்லாவாக நடிக்க வைப்பார். சரவண வேலு, ஒரு ஓட்டலில் பணிபுரிபவர், சிறிய திருட்டுகளில் தொடர்புடையவர். பில்லாவாக நடிக்கவைத்து பில்லாவின் குழுவை பிடிக்க ஜெயபிரகாஷ் திட்டம் தீட்டியிருப்பார்.

அதற்காக வேலுவின் தத்துப்பிள்ளையை நல்ல பள்ளியில் சேர்த்து படிக்க வைக்க வேண்டும் என்பது அவர்களின் ஒப்பந்தம். அதன்படி ஜெயபிரகாஷ் அந்த குழந்தையை பள்ளியில் சேர்த்து படிக்க வைப்பார்.

பில்லாபோல் பயிற்சி கொடுத்து ஜெயபிரகாஷ், அந்த குழுவுக்குள் அனுப்பி வைப்பார். அடிபட்டதால் பில்லா சில நினைவுகளை இழந்ததுபோன்ற தோற்றத்தில் அவரை நடிக்க அனுப்பி வைப்பார். வேலு, பில்லாவின் குழு குறித்த தகவல்களை தெரிந்துகொண்டு, அவர்களின் தலைவர் ஜெகதீஷிடமும் போனில் பேசுவார்.

ஒரு பென் டிரைவில் ரகசிய தகவல்களை சேகரித்து கொடுப்பார். ஆனால், பில்லாவை தனது அண்ணன் மற்றும் அவரது காதலியை கொலை செய்ததற்காக ஷாஷா பழிவாங்க வந்திருப்பார். பில்லா ரூபத்தில் இருக்கும் வேலுவை கொலை செய்ய முயற்சித்துக்கொண்டிருப்பார்.

பில்லாவின் காதலி சி.ஜேவை வேலுவுக்கு தெரியாது, ஷாஷா, பில்லாவை கொலை செய்வதற்காக அவரிடம் நெருங்கி பழகுவார். இது சி.ஜே.வுக்குப் பிடிக்காது. அப்போது ஜெயபிரகாஷ், ஷாஷாவிடம் பில்லா இறந்துவிட்டதையும், வேலு பில்லாவாக நடிப்பதையும் கூறுவார். இந்நிலையில், ஒரு பார்ட்டியில் ஜெயபிரகாசும் கொல்லப்படுவார். இதற்கு பின்னர் என்னவாகும் என்பதுதான் க்ளைமேக்ஸ்.

விஷ்ணுவர்தன் இயக்கத்தில், அஜித் பில்லாவாகவும், வேலுவாகவும் கலக்கியிருப்பார். இந்தப்படத்தில் நயன்தாராவின் நடிப்பு, உடைகள் என பலவும் மிகுந்த கலக்கலாக இருக்கும். நமிதா, ரகுமான் பிரபு என ஒரு நடிகர் பட்டாளமே நடித்திருக்கும். படம் முழுவதும் ஸ்டைல் லுக்கில் நன்றாக இருக்கும். கேங்ஸ்டர், டான்தான் கதையின் பின்னணி என்பதால், படம் விறுவிறுப்பாக இருக்கும்.

பில்லாவுக்கு முன் விஷ்ணுவர்தன் 3 படங்கள் இயக்கியிருந்தார், அவை குறும்பு, அறிந்தும் அறியாமலும், பட்டியல் ஆகியவை ஆகும். அதில் குறும்பு தவிர மற்ற இரு படங்களும் நல்ல வரவேற்பை பெற்றிருந்தது. நயன்தாராவுக்கு படத்தில் வித்யாசமான லுக் இருக்கும்.

ரஜினிகாந்த் நடித்த பழைய பில்லா படத்தின் ரீமேக்தான் இந்த பில்லா என்றாலும் அதை இந்த காலத்துக்கு ஏற்றதுபோல் மாற்றியிருப்பார் விஷ்ணு வர்தன். பில்லா அஜித், நயன் இருவருக்குமே நல்ல பெயரை பெற்றுத்தந்த படம். நல்ல விமர்சனம், வரவேற்பு, கலெக்சன் என அஜித்தின் கெரியரில் ஒரு முக்கிய படமாக இருந்தது. யுவன் சங்கர் ராஜா இசையில் பாடல்களும் ஹிட். செய் என்ற ஹாட் சாங் படு ஹிட்டானது.

அஜித்துக்கு, பில்லா படத்துக்கு முன்னரும், பின்னரும் ஹிட் படங்கள் இருந்தாலும், இந்தப்படம் ஒரு டிரெண்ட் செட்டராக இருந்தது. 

தமிழ்நாடு, தேசம் மற்றும் உலகம், பொழுதுபோக்கு, விளையாட்டு, லைஃப்ஸ்டைல், ஜோதிடம், புகைப்பட கேலரி, வேலைவாய்ப்பு, சமீபத்திய செய்திகள் என அனைத்தையும் இந்துஸ்தான் டைம்ஸ் தமிழ் இணையதளத்தில் உடனுக்குடன் தெரிந்து கொள்ளலாம்.

சமூக வலைத்தளங்களில் எங்களை பின் தொடலாம். லிங்க்குகள் கீழே கொடுக்கப்பட்டு உள்ளன:

https://twitter.com/httamilnews

https://www.facebook.com/HTTamilNews

https://www.youtube.com/@httamil

Google News: https://bit.ly/3onGqm9