World Cup 2023: கில், கோலி, ஷ்ரேயாஸ் அதிரடி - இலங்கை அணிக்கு 358 ரன்கள் இலக்கு
World Cup 2023, IND vs SL Innings Break: சுப்மன் கில், விராட் கோலி, ஷ்ரேயாஸ் ஐயர் ஆகியோர் சதத்தை நெருங்கு கோட்டை விட்டனர். ஆனாலும் இந்திய அணி 358 ரன்கள் என்ற இமாலய இலக்கை நிர்ணயித்துள்ளது.
உலகக் கோப்பை தொடரின் 33வது போட்டி இந்தியா - இலங்கை அணிகளுக்கு இடையே மும்பை வான்கடே மைதானத்தில் நடைபெற்று வருகிறது. இதில் டாஸ் வென்ற இலங்கை அணி கேப்டன் குசால் மெண்டிஸ் பவுலிங்கை தேர்வு செய்துள்ளார்.
இதையடுத்து முதலில் பேட் செய்த இந்தியா 50 ஓவரில் 7 விக்கெட் இழப்புக்கு 357 ரன்கள் எடுத்துள்ளது. இந்திய அணியின் டாப் ஆர்டர் பேட்ஸ்மேன் சுப்மன் கில் 92, விராட் கோலி 88 ரன்கள் எடுத்தனர். இதுவரை பெரிய இன்னிங்ஸ் விளையாடமல் இருந்து வந்த ஷ்ரேயாஸ் ஐயர் இன்றைய போட்டியில் அதிரடி காட்டி 56 பந்துகளில் 82 ரன்கள் எடுத்து அவுட்டனார்.
இலங்கை பவுலர்களில் இடது கை வேகப்பந்து வீச்சாளரான மதுஷங்கா 5 விக்கெட்டுகளை வீழ்த்தினார். இந்திய அணியின் முக்கிய பேட்ஸ்மேன்களான ரோஹித் ஷர்மா, சுப்மன் கில், விராட் கோலி, ஷ்ரேயாஸ் ஐயர், சூர்யாகுமார் ஆகியோரின் விக்கெட்டுகளை அவர் தூக்கினார்.
உலகக் கோப்பை 2023 தொடரில் இலங்கை அணி தனது அரையிறுதி வாய்ப்பை உறுதிப்படுத்தி கொள்ள 358 ரன்கள் என்ற சாதனை சேஸிங் செய்ய வேண்டும்.
இந்திய அணியின் ஓபனர்களாக ரோஹித் ஷர்மா - சுப்மன் கில் ஆகியோர் களமிறங்கினர். ஆட்டத்தின் முதல் ஓவரில் முதல் பந்தில் பவுண்டரி அடித்த ரோஹித் ஷர்மா, இரண்டாவது பந்திலேயே கிளீன் போல்டு ஆகி வெளியேறினார்.
இதனால் ஆட்டத்தின் மூன்றாவது பந்திலேயே கோலி பேட் செய்ய வந்தார். கோலி - கில் இணைந்து ரன் குவிப்பில் ஈடுபட தொடங்கினர்.
ஆட்டத்தின் 4.5 ஓவரில் கில் 9 ரன்கள் அடித்திருந்தபோது, பாயிண்ட் திசையில் அடித்த பந்தை கேட்ச் பிடிக்காமல் தவறவிட்டார் அசலங்கா. அதேபோல் ஆட்டத்தின் 5.1 ஓவரில் கோலி 10 ரன்கள் எடுத்திருந்தபோது, ரிட்டர்ன் கேட்ச் வாய்ப்பை தவறவிட்டார் சமீரா.
இந்த வாய்ப்பை நன்கு பயன்படுத்திய கில், கோலி ஆகியோர் தொடர்ந்து சிறப்பாக பேட் செய்து ரன் குவிப்பில் ஈடுபட்டனர். இருவரும் அடுத்தடுத்து அரைசதத்தை பூர்த்தி செய்து பார்ட்னர்ஷிப் அமைத்து விளையாடி வந்தனர்.
ஒரு கட்டத்தில் அடுத்தடுத்த ஓவர்களில் சிக்ஸர் அடித்து 90 ரன்களை கடந்த கில், மதுஷங்கா வீசிய ஸ்லோ பவுன்சரில், அப்பர் கட் ஆட முயன்று விக்கெட் கீப்பர் குசால் மெண்டிஸ் வசம் சிக்கினார். அவர் 92 பந்துகளுக்கு 92 ரன்கள் எடுத்த கில், தனது இன்னிங்ஸில் 11 பவுண்டரி, 2 சிக்ஸர்களை அடித்தார்.
கில் - கோலி இணைந்து இரண்டாவது விக்கெட்டுக்கு 189 ரன்கள் சேர்த்தனர். ஆட்டத்தின் 31.3 ஓவரில் மதுஷங்கா வீசிய மற்றொரு ஸ்லோ பந்தில் 88 ரன்கள் எடுத்திருந்த விராட் கோலி கவர்ஸ் திசையில் ட்ரைவ் ஆட முயற்சித்து கேட்ச் முறையில் அவுட்டானார்.
இவர்கள் இருவரும் சதமடிப்பார்கள் என எதிர்பார்க்கப்பட்ட நிலையில், அவுட்டாகி வெளியேறினர். இவர்களை தொடர்ந்து பேட் செய்ய வந்த ஷ்ரேயாஸ் ஐயர் தொடக்கம் முதலே அதிரடி காட்டி விளையாடி வந்தார்.
அவருடன் இணைந்து சிறப்பாக பேட் செய்து வந்த கேஎல் ராகுல் 21 ரன்கள் எடுத்து அவுட்டானார். இவருக்கு அடுத்தபடியாக வந்த சூர்யகுமார் யாதவ் 12 ரன்னில் வெளியேறி ஏமாற்றினார்.
இதற்கிடையே அதிரடி காட்டி வந்த ஷ்ரேயாஸ் ஐயர் 36 பந்துகளில் அரைசதத்தை பூர்த்தி செய்தார். தொடர்ந்து அதிரடி காட்டி ஷ்ரேயாஸ் பந்தை பவுண்டரி, சிக்ஸருக்கு பறக்கவிட்டார். 82 ரன்கள் எடுத்த ஷ்ரேயாஸ் ஆட்டத்தின் 47.3 ஓவரில் மதுஷங்கா பந்தில் தனது விக்கெட்டை பறிகொடுத்தார். அப்போது அணியின் ஸ்கோர் 333 என இருந்தது.
கடைசி கட்டத்தில் ஜடேஜா அதிரடி காட்டி 24 பந்துகளில் 35 ரன்கள் எடுத்து கடைசி வரை ஆட்டமிழக்காமல் இருந்தார்.
சமூக வலைத்தளங்களில் எங்களை பின்தொடரலாம். லிங்க்குகள் கீழே கொடுக்கப்பட்டுள்ளன:
Google News: https://bit.ly/3onGqm9
டாபிக்ஸ்