HT Cricket Special:டெஸ்ட்டில் 100 ரன்கள், 10 விக்கெட்டுகள் எடுத்த முதல் வீரர்! கைவிரல் உடைந்தும் போட்டியை சமன் ஆக்கியவர்
Published Jun 14, 2024 06:00 AM IST
டெஸ்ட் கிரிக்கெட்டில் 100 ரன்கள், 10 விக்கெட்டுகள் எடுத்த முதல் வீரர் என்ற சாதனை புரிந்ததோடு, டெஸ்டில் முதல் முறையாக சமன் ஆன போட்டியில் இடம்பிடித்த இவர், கைவிரல் உடைந்தும் அணிக்கான பங்களிப்பை பேட்டிங், பவுலிங்கில் வழங்கியவராக உள்ளார்.
டெஸ்ட்டில் 100 ரன்கள், 10 விக்கெட்டுகள் எடுத்த முதல் வீரர் ஆலன் டேவிட்சன்
ஆஸ்திரேலியா அணியில் இடம்பிடித்த சிறந்த ஆல்ரவுண்டர்களில் ஒருவராக திகழ்ந்தவர் ஆலன் டேவிட்சன். இடது கை வேகப்பந்து வீச்சாளாராகவும், இடது கை லோயர் ஆர்டர் பேட்ஸ்மேனாகவும் அணிக்கு பல்வேறு வெற்றிகளை தேடி தந்த வீரராக இருந்துள்ளார்.
ஆஸ்திரேலியா ஆல்ரவுண்டர்
சுமார் ஆறு அடி உயரத்தில் ஆஜானுபாகுவான தோற்றத்தில் இருக்கும் ஆலன் டேவிட்சன், அந்த காலகட்டத்தில் பவுண்டரியை கடந்து நீண்ட தூரம் சிக்ஸர் அடிக்கும் பேட்ஸ்மேனாக திகழ்ந்துள்ளார். அத்துடன் சிறந்த பீல்டராகவும் இருந்த இவர், க்ளோஸ் பொஷிசன்களில் கேட்ச்களை பிடிப்பதில் கில்லியாக இருந்துள்ளார். இதனால் இவர் கிளாவ் என்ற பட்டப்பெயராலும் அழைக்கப்பட்டார்.
ஆஸ்திரேலியா அணிக்காக 1953 முதல் 1963 வரை 10 ஆண்டுகள் விளையாடி இவர், பல போட்டிகளில் மேட்ச் வின்னராக ஜொலித்துள்ளார்.