World Cup 2023: உள்ளே வெளியே ஆட்டம்! பழிதீர்ப்பதற்கான நேரமிது - இங்கிலந்தை நாக்அவுட் செய்ய இந்தியாவுக்கு நல்ல வாய்ப்பு

உலகக் கோப்பை 2023 தொடரில் தோல்வியை சந்திக்காத ஒரே அணியாக இந்தியா வீரநடை போட்டு வருகிறது. அனைத்து போட்டிகளிலும் இந்தியா வெற்றிகரமாக சேஸிங்கை செய்து வெற்றி பெற்றுள்ளது.

ஆனால் இங்கிலாந்து அணி விளையாடிய 5 போட்டிகளில் ஒரேயொரு வெற்றியை மட்டும் பெற்று வாழ்வா சாவா போட்டியில் இந்தியாவை எதிர்கொள்கிறது. நடப்பு சாம்பியனான இங்கிலாந்து தற்போது புள்ளிப்பட்டியலில் கடைசி இடத்தில் உள்ளது. இந்தியாவுடனான இந்தப் போட்டியிலும் தோல்வியை தழுவினால் இங்கிலாந்து நாக் அவுட் வாய்ப்பை இழந்த தொடரை விட்டு வெளியேறும். எனவே இங்கிலாந்துக்கான கடைசி வாய்ப்பாக இந்த போட்டி அமைந்துள்ளது.

இங்கிலாந்து அணி தனது 15 வீரர்களையும் களமிறக்கி அனைத்து முயற்சிகளையும் செய்துவிட்டது. ஆனால் அவர்களுக்கு சாதகமாக எதுவும் அமையவில்லை. இந்தியாவுக்கு எதிராக வெற்றி மட்டுமில்லாமல் இனி எஞ்சிய அனைத்து போட்டிகளிலும் நல்ல ரன்ரேட்டில் வென்றாக வேண்டிய கட்டாயம் உள்ளது.

இந்திய அணியை பொறுத்தவரை பேட்டிங், பவுலிங், பீல்டிங் என சிறப்பாக செயல்பட்டு முழுமையான அணியாக உள்ளது. அணியின் முக்கிய ஆல்ரவுண்டரான ஹர்திக் பாண்ட்யா காலில் ஏற்பட்ட காயத்தால் இன்றைய போட்டியிலும் விளையாட மாட்டார் என தெரிகிறது. அவரது இடத்தில் இடம்படித்த முகமது ஷமி தனது தேர்வை நியாயப்படுத்தும் விதமாக நியூசிலாந்துக்கு எதிராக 5 விக்கெட்டு எடுத்தார்.

பேட்டிங்கில் ரோஹித், கோலி, கில், கேஎல் ராகுல், பவுலிங்கில் பும்ரா, சிராஜ், குல்தீப், ஜடேஜா ஆகியோர் நல்ல பார்மில் இருந்து வரும் நிலையில், அதை தொடர்வார்கள் என எதிர்பார்க்கப்படுகிறது. இந்திய அணி வெற்றி கூட்டணியுடன் இந்தப் போட்டியில் களமிறங்கும் என எதிர்பார்க்கலாம்.

பிட்ச் நிலவரம்

இங்கு நடைபெற்ற மூன்று போட்டிகளில் ஸ்பின்னர்கள் நன்கு ஜொலித்துள்ளனர். இன்றைய போட்டி நடைபெறும் ஆடுகளம் செம்மண் ஆடுகளமாக இருக்கும் எனவும், லேசாக புற்கள் இருக்கும் என்பதால் வேகப்பந்து வீச்சாளர்களை காட்டிலும் ஸ்பின்னர்களுக்கு நன்கு உதவும் என கணிக்கப்பட்டுள்ளது.

வானிலை நிலவரத்தை பொறுத்தவரை மழைக்கு வாய்ப்பு இல்லை எனவும் வெப்பநிலை 30 டிகிரிக்கு அதிகமாக இருக்கும் தெரிவிக்கப்பட்டுள்ளது.

இதுவரை உலகக் கோப்பை போட்டியில் இந்தியா - இங்கிலாந்து அணிகள் 8 முறை நேருக்க நேர் மோதியுள்ளன. இதில் இங்கிலாந்து 4, இந்தியா 3, ஒரு போட்டி டையில் முடிந்துள்ளது.

கடந்த 2022இல் நடைபெற்ற டி20 உலகக் கோப்பை தொடரின் அரையிறுதியில் இந்தியாவை நாக்அவுட் செய்தது இங்கிலாந்து. அந்த தோல்விக்கு பழிதீர்ப்பதற்கான நேரம் தற்போது இந்தியாவுக்கு அமைந்துள்ளது. இங்கிலாந்துக்கான இந்த உள்ளே வெளியே ஆட்டத்தில் அவர்களை நாக் அவுட் செய்ய இந்தியாவுக்கு வாய்ப்பு உருவாகியுள்ளது.