Accident: காசியாபாத்தில் சாலை எதிர் திசையில் வந்த பேருந்து, கார் மீது மோதி விபத்து - 6 பேர் பலி! அதிர்ச்சி சிசிடிவி

• காசியபாத்திலுள்ள டெல்லி - மீரட் விரைவு சாலையில் எதிர் திசையில் வந்த பள்ளி பேருந்து, எஸ்யூவி கார் மீது மோதிய விபத்தில் சம்பவ இடத்தில் 6 பேர் பலியாகினர். காரில் பயணித்த இரண்டு பேர் படுகாயங்களுடன் மருத்துவமனையில் அனுமதிக்கப்பட்டுள்ளனர். இந்த கோர விபத்தின் சிசிடிவி காட்சிகள் அதிர்ச்சியளிக்கும் விதமாக உள்ளது. முன்னதாக விரைவு சாலையின் எதிர் திசையில் பள்ளி பேருந்து ஓட்டுநர் திடீரென பேருந்தை இயக்கினார். சாலையின் எதிர்திசையில் பேருந்தை வேகமாக இயக்கிய நிலையில், அந்த வாகனத்தை நோக்கி வந்த கருப்பு நிற எஸ்யூவி கார் வேகமாக மோதியது. மோதல் ஏற்படுவதற்கு சில விநாடி பொழுது முன்னர் கார் ஓட்டுவர் தனது பாதையில் இருந்து விலக முயற்சித்தபோதிலும், எதிர்பாராதவிதமாக பேருந்தில் மோதியது. விபத்துக்குள்ளான காரில் 8 பேர் குர்கிராம் நோக்கி சென்றுகொண்டிருந்தனர். விபத்து காரணமாக கார் பயங்கரமாக சேதமடைந்துள்ளது. விபத்துக்கு காரணமான பேருந்து ஓட்டுநரை கைது செய்து போலீசார் விசாரணை நடத்தி வருகின்றனர். விபத்தில் இறந்தவர்கள் இரண்டு ஆண், இரண்டு பெண், இரண்டு குழந்தைகள் ஆவார்கள்.