Kovai Accident: கோவை அருகே கிணற்றில் கார் பாய்ந்து விபத்து - 3 பேர் உயிரிழப்பு

கோயம்புத்தூர் அருகேயுள்ள தொண்டாமுத்தூர் சாலையில் இன்று (செப்.9) அதிகாலை ஒரு கார் வேகமாக வந்து கொண்டிருந்தது. அதில் 4 இளைஞர்கள் இருந்தனர். தென்னமநல்லூர் மாரியம்மன் கோயில் அருகே உள்ள அபாயகரமான வளைவில் கார் திரும்ப முயன்ற போது கட்டுப்பாட்டை இழந்தது. கட்டுப்பாட்டை இழந்த கார், அங்கிருந்த விவசாய தோட்டத்துக்கு புகுந்து அங்கிருந்த 70 அடி ஆழ கிணற்றுக்குள் பாய்ந்தது. கிணற்றுக்குள் பாய்ந்த வேகத்தில் கார் மூழ்கத் தொடங்கியது. காரில் ஓட்டுநர் இருக்கையில் இருந்த இளைஞர் மட்டும் கதவை திறந்து, கிணற்றில் இருந்து வெளியே வந்தார். மற்ற மூவரும் கிணற்றுக்குள் காருடன் மூழ்கினர்.

இதைப் பார்த்து அதிர்ச்சியடைந்த அவ்வழியாக சென்ற பொதுமக்கள் தொண்டாமுத்தூர் போலீஸாருக்கும், தீயணைப்புத் துறையினருக்கும் தகவல் தெரிவித்தனர். அவர்கள் சம்பவ இடத்துக்கு வந்து கிணற்றுக்குள் மூழ்கிய நபர்கள் மற்றும் காரை மீட்கும் பணியில் ஈடுபட்டனர். ஒருவரின் உடல் மீட்கப்பட்டது. நீரில் மூழ்கி உயிரிழந்த மற்ற இருவரையும் தீயணைப்பு துறையினர் தொடர்ந்து தேடி வருகின்றனர்.