Actor Parthiban: நடிகர் பார்த்திபன் ஏன் பிச்சை எடுத்தார் தெரியுமா?
நடிகர் பார்த்திபன் மடிப்பிச்சை எடுத்த சம்பவம் சமூக வலைதளங்களில் வைரலாகி வருகிறது.
சென்னையில் நடைபெற்று வரும் புத்தக கண்காட்சியில் நடிகர் பார்த்திபன் மடிப்பிச்சை எடுத்து சிறைக்கைதிகளுக்காக புத்தகம் வாங்கிய சம்பவம் பெரும் நெகிழ்ச்சியை ஏற்படுத்தி உள்ளது.
பொதுவாக இன்றைய இளம் தலைமுறையிடையே வாசிப்பு பழக்கம் குறைந்து வருவதாக குற்றச்சாட்டு உள்ளது. அதேபோல் மாணவர்கள் பாட புத்தகங்களை தாண்டிய வாசிப்பு இல்லாமல் இருப்பதாகவும் அவர்கள் புத்தகங்களை வாசிக்கும் போது தான் உலகம் குறித்த அறிவை பெற முடியும் என்று அறிஞர்கள் கூறுகின்றனர். இந்நிலையில் தமிழக அரசு மாணவர்கள் இளைஞர்களிடையே வாசிப்பு பழக்கத்தை தூண்டும் வகையில் புத்தக கண்காட்சியை மாவட்டம் தோறும் நடத்தி வருகிறது.
கடந்த ஆண்டு தமிழக அரசு அனைத்து மாவட்டங்களிலும் புத்தக கண்காட்சி நடத்த 4.96 கோடி ரூபாய் நிதி ஒதுக்கீடு செய்யப்பட்டது. இதையடுத்த தமிழகம் முழுவதும் மாவட்ட வாரியாக கடந்த ஆண்டு புத்தக கண்காட்சி நடைபெற்றது மக்களிடையே மிகுந்த வரவேற்பை பெற்றது. ஏராளமானோர் முதல் முறையாக புத்தக கண்காட்சி தங்கள் மாவட்டத்தில் நடந்தது பெரும் மகிழ்ச்சி அளிப்பதாக தெரிவித்தனர். சென்னையில் 46வது சர்வதேச புத்தக கண்காட்சி கடந்த 6ம்தேதி துவங்கியது. இந்த கண்காட்சியை தமிழக முதல்வர் ஸ்டாலின் துவங்கி வைத்தார். இதில் 1,000 அரங்குடன் ஒருங்கிணைக்கப்பட்டிருக்கும் இந்த புத்தக கண்காட்சி வருகின்ற 22 தேதி வரை நடைபெற உள்ளது. அதுவரை தினமும் காலை 11 மணி முதல் இரவு 8.30 மணி வரை இந்த கண்காட்சிக்கு பொது மக்களுக்கு அனுமதி வழங்கப்பட்டது. கடந்த ஆண்டு புத்தக கண்காட்சியில் 800 அரங்குகள் அமைக்கப்பட்டிருந்தது, இந்த ஆண்டு கூடுதலாக 200 அரங்குகள் என மொத்தம் 1,000 அரங்குகள் அமைந்துள்ளது.
இந்நிலையில் சிறைத்துறை மற்றும் சீர்திருத்த துறை சார்பாக வைக்கப்பட்டுள்ள அரங்கில் சிறை கைதிகளுக்கு பயன்படும் வகையில் பொதுமக்கள் தானமாக புத்தகங்களை கொடுக்கலாம். அதை கைதிகளுக்கு கொண்டு சேர்க்கும் நடவடிக்கை எடுக்கப்பட்டு வருகிறது.
இந்நிலையில் எதிலும் புதுமை காண விரும்பும் நடிகர் பார்த்திபன் சென்னை புத்தக கண்காட்சியில் பிச்சை எடுத்த சம்பவம் அங்கிருந்தவர்களை அதிர வைத்தது. நடிகர் பார்த்திபன் புத்தக காட்சியில் மடிப்பிச்சை எடுக்கத் தொடங்கினார். அவ்வாறு வந்த புத்தகங்களை அங்கு வைக்கப்பட்டிருந்த கூண்டு வானம் அரங்கில் சேர்த்தார்.
இதுகுறித்த வீடியோவை சமூக வலைதளத்தில் வெளியிட்ட பார்த்திபன் மடிப்பிச்சை ஏந்தி சிறைக்கைதிகளுக்கு 1000 புத்தகங்களை திரட்டியது மகிழ்ச்சி என்று தெரிவித்திருந்தார். இந்த வீடியோ தற்போது சமூக வலை தளங்களில் வைரலாகி வருகிறது.
தமிழ்நாடு, தேசம் மற்றும் உலகம், பொழுதுபோக்கு, விளையாட்டு, லைஃப்ஸ்டைல், ஜோதிடம், புகைப்பட கேலரி, சமீபத்திய செய்திகள் என அனைத்தையும் இந்துஸ்தான் டைம்ஸ் தமிழ் இணையதளத்தில் உடனுக்குடன் தெரிந்து கொள்ளலாம்.
