Ba11sy Trichy: தோல்வியிலிருந்து மீளாத திருச்சி: திருப்பூர் தமிழன்ஸ் 2வது வெற்றி
TNPL 2023: திருச்சி அணி தொடர்ச்சியாக 4வது முறையாக தோல்வியைத் தழுவியது.
ஐட்ரீம் திருப்பூர் தமிழன்ஸ் அணியிடம் திருச்சி தோல்வி அடைந்தது. டிஎன்பிஎல் கிரிக்கெட்டில் 17வது லீக் ஆட்டம் சேலத்தில் இன்று நடைபெற்றது.
இந்த ஆட்டத்திலும் திருச்சி அணி தோல்வி அடைந்தது. இந்த சீசனில் திருச்சி இதுவரை ஒரு ஆட்டத்தில் கூட ஜெயிக்கவில்லை. அந்த அணிக்கு சோகம் தொடர்கிறது.
அதேநேரம், ஐட்ரீம் திருப்பூர் தமிழன்ஸ் 2வது வெற்றியை ருசித்தது.
பால்சி திருச்சி டாஸ் வென்று பந்துவீச்சைத் தேர்வு செய்தது. இதையடுத்து ஐட்ரீம் திருப்பூர் தமிழன்ஸ் முதல் இன்னிங்ஸை விளையாடியது.
அந்த அணியில் தொடக்க வீரர்களாக எஸ்.ராதாகிருஷ்ணன், துஷார் ரஹேஜா ஆகியோர் விளையாடினர்.
ரஹேஜா 3வது ஓவரிலேயே ஆட்டமிழந்தார். பின்னர், சாய் கிஷோர் களம் புகுந்தார். இவரும், ராதாகிருஷ்ணனும் சிறப்பாக விளையாடி அணியின் ஸ்கோரை விறுவிறுவென உயர்த்த உதவினர்.
ராதாகிருஷ்ணன் 45 ரன்களில் ஆட்டமிழக்க சாய் கிஷோர் அரை சதம் விளாசி அவுட்டானார்.
அனிருத்தும் அரை சதம் விளாசினார். நடராஜன், சிலம்பரசன், ஆண்டனி தாஸ், மோனிஷ் ஆகியோர் தலா 1 விக்கெட்டை வீழ்த்தினர்.
திருப்பூர் தமிழன்ஸ் 4 விக்கெட்டுகள் இழப்புக்கு 201 ரன்கள் குவித்தது.
202 ரன்கள் எடுத்தால் வெற்றி என்ற கடினமான இலக்குடன் களமிறங்கிய திருச்சி அணி போராடி தோற்றது.
கேப்டன் கங்கா ஸ்ரீதர் ராஜு 20 ரன்களிலும், கே.ராஜ்குமார் 22 ரன்களிலும் நடையைக் கட்டினர்.
மோனிஷ் டக் அவுட்டாகி அதிர்ச்சி கொடுத்தார். டேரில் ஃபெராரியோ மட்டும் நிதானமாக விளையாடி 42 ரன்கள் விளாசி ஆட்டமிழந்தார்.
பின்னர் வந்த ராஜ்குமார் 1 ரன்னில் செல்ல, ஆண்டனி தாஸ் 25 ரன்களிலும், ஜாஃபர் ஜமால் 30 ரன்களிலும் ஆட்டமிழந்தனர்.
இவ்வாறாக அந்த அணி19 ஓவர்களில் 7 விக்கெட்டுகளை இழந்து 146 ரன்கள் எடுத்தது. கடைசி ஓவரில் 9 ரன்கள் அடித்து 8 விக்கெட்டுகள் இழப்புக்கு 155 ரன்கள் எடுத்தது. திருப்பூர் அணி 46 ரன்கள் வித்தியாசத்தில் அபார வெற்றி பெற்றது.
நாளை இரவு சேலத்தில் சேப்பாக் அணிக்கும், மதுரை அணிக்கும் இடையே 18வது லீக் ஆட்டம் நடைபெறவுள்ளது.
டாபிக்ஸ்