HT Sports Special: இதே நாள், இதே இடம்! முதல் முறையாக உலகக் கோப்பையை முத்தமிட்ட இரு அணிகள்
முதல் உலகக் கோப்பை கிரிக்கெட் தொடரில் இறுதி போட்டியில் ஆஸ்திரேலியாவை வீழ்த்தி வெஸ்ட்இண்டீஸ் அணியும், டி20 உலகக் கோப்பை தொடரில் தொடர்ந்து இரண்டாவது முறையாக பைனலுக்கு தகுதி பெற்று பாகிஸ்தான் அணி முதல் முறையாக இதே நாளில் தான் சாம்பியன் ஆனது. இந்த இரண்டு தொடர்களும் இங்கிலாந்தில் தான் நடைபெற்றது.
டெஸ்ட் கிரிக்கெட் போட்டிகள் ஒரு நாள் போட்டிகளாக மாறிய பின்னர் உலகக் கோப்பை கிரிக்கெட் தொடர் நடத்தப்பட்டது. முதல் உலகக் கோப்பை கிரிக்கெட் தொடர் 1975ஆம் ஆண்டு இங்கிலாந்தில் நடைபெற்ற நிலையில் அப்போது ஜாம்பவான் அணியாக திகழ்ந்த வெஸ்ட்இண்டீஸ் மற்றும் மற்றொரு டாப் அணியான ஆஸ்திரேலியா இறுதிப்போட்டியில் விளையாடின.
இதே நாளில் 1975இல் நடைபெற்ற இறுதிப்போட்டியில் வெஸ்ட் இண்டீஸ் 17 ரன்கள் வித்தியாசத்தில் வெற்றியை பெற்று முதல் உலகக் கோப்பையை முத்தமிட்டது. என்னதான் மற்ற அணிகளை அச்சுறுத்தும் பேட்ஸ்மேன்களும், பவுலர்களும் வெஸ்ட் இண்டீஸ் அணியில் இடம்பிடித்திருந்தாலும் இந்த வெற்றி அவர்களுக்கு அவ்வளவு எளிதாக கிடைக்கவில்லை.
காலை 10.30 மணிக்கு தொடங்கிய போட்டியானது இரவு 8.43 மணிக்கு நிறைவடைந்துள்ளது. ஒரு நாள் கிரிக்கெட்டில் மிக நீண்ட நேரம் விளையாடப்பட்ட போட்டியாகவே இது அமைந்தது.