இந்திய கிரிக்கெட் அணியின் புதிய ஜெர்சி.. விலை எவ்வளவு? எப்படி வாங்கலாம்? - விபரம் இதோ..!

இந்திய அணி வீரர்கள் இந்த போட்டிக்காக தீவிர பயிற்சி மேற்கொண்டு வரும் சூழலில், டெஸ்ட், ஒருநாள், டி20 போட்டிகளுக்கு தனித்தனியாக புதிய ஜெர்சியை பிசிசிஐ சமீபத்தில் அறிமுகப்படுத்தியது.

இந்திய கிரிக்கெட் அணியின் புதிய கிட் ஸ்பான்ஸரான அடிடாஸ் நிறுவனம் இந்த புதிய ஜெர்சியை பிரத்யேகமாக வடிவமைத்துள்ளது. அடுத்த ஐந்து ஆண்டுகள் அடிடாஸ் இந்தியாவின் பார்ட்னர்ஷிப் இருக்குமென தெரிகிறது. இதற்காக 350 கோடி ரூபாய் ஒப்பந்தம் செய்துள்ளதாக தகவல்கள் தெரிவிக்கின்றன.

இந்த புதிய ஜெர்சியை அடிடாஸின் இந்தியா நிறுவனத்தின் அதிகாரப்பூர்வ இணையதளமான www.adidas.co.in என்ற இணையதளத்தில் நாளை ஜூன் (04) காலை 10 மணி முதல் ரசிகர்கள் வாங்கிக்கொள்ளலாம். ஒருநாள், டி20, டெஸ்ட் என மூன்று விதமான போட்டிக்கான ஜெர்சியின் விலை தலா ரூ.4999, ஒருநாள் போட்டிக்கான ரசிகர்கள் ஜெர்சியின் விலை ரூ. 999 ஆக நிர்ணயம் செய்யப்பட்டிருக்கிறது.

ஆண்கள், மகளிர் இருவருக்குமான ஒருநாள், டி20, டெஸ்ட் அணிக்கான ஜெர்சியை ரசிகர்கள் வாங்கிக்கொள்ளலாம். லேசான நீலக்கலரில் இருப்பது ஒருநாள் போட்டிக்கானது. அடர் நீல நிறத்தில் இருப்புத டி20 கிரிக்கெட்டுக்கானது. வெள்ளை நிற ஜெர்சி டெஸ்ட் போட்டிக்கானது. இந்தாண்டு உலக டெஸ்ட் சாம்பியன்ஷிப், ஐசிசி உலகக்கோப்பை போட்டிகள் என அடுத்தடுத்து சர்வதேச தொடர்கள் விளையாட உள்ள நிலையில் இந்த புதிய ஜெர்சி அறிமுகப்படுத்தப்பட்டுள்ளது ரசிகர்களின் கவனத்தை பெற்றுள்ளது.

உலக டெஸ்ட் சாம்பியன்ஷிப் போட்டி தொடங்க உள்ளதையொட்டி, சர்வதேச கிரிக்கெட் கவுன்சில் ப்ரோமோ வீடியோ ஒன்றை வெளியிட்டு இருந்தது. சுமார் ஒரு நிமிடம் ரன் டைம் கொண்ட அந்த ப்ரோமோ வீடியோவில், மைதானத்தில் இந்தியா - ஆஸ்திரேலியா ஆகிய இரு அணிகளின் சிறப்பான தருணங்களை விளக்குவதாக இருந்தது. ‘தி க்வெஸ்ட் டு தி பெஸ்ட்’ என இந்த வீடியோ நிறைவு பெறுகிறது.

ஐசிசி உலக டெஸ்ட் சாம்பியன்ஷிப் இறுதிப் போட்டியில் பட்டம் வெல்லும் அணிக்கு பிரத்யேகமாக வடிவமைக்கப்பட்ட தண்டாயுதம் (Mace) வடிவிலான பரிசு வழங்கப்படும். இந்திய அணி கடந்த 2021 ஆம் ஆண்டில் நியூஸிலாந்து அணிக்கு எதிராக உலக டெஸ்ட் சாம்பியன்ஷிப் இறுதிப் போட்டியில் விளையாடி இருந்தது குறிப்பிடத்தக்கது.