Tiruppur Tamizhans: அரை சதம் பதிவு செய்த திருப்பூர் வீரர்கள்! 201 ரன்கள் குவிப்பு

பால்சி திருச்சி டாஸ் வென்று பந்துவீச்சைத் தேர்வு செய்தது. இதையடுத்து ஐட்ரீம் திருப்பூர் தமிழன்ஸ் முதல் இன்னிங்ஸை விளையாடியது.

அந்த அணியில் தொடக்க வீரர்களாக எஸ்.ராதாகிருஷ்ணன், துஷார் ரஹேஜா ஆகியோர் விளையாடினர்.

ரஹேஜா 3வது ஓவரிலேயே ஆட்டமிழந்தார். பின்னர், சாய் கிஷோர் களம் புகுந்தார். இவரும், ராதாகிருஷ்ணனும் சிறப்பாக விளையாடி அணியின் ஸ்கோரை விறுவிறுவென உயர்த்த உதவினர்.

ராதாகிருஷ்ணன் 45 ரன்களில் ஆட்டமிழக்க சாய் கிஷோர் அரை சதம் விளாசி அவுட்டானார்.

அனிருத்தும் அரை சதம் விளாசினார். நடராஜன், சிலம்பரசன், ஆண்டனி தாஸ், மோனிஷ் ஆகியோர் தலா 1 விக்கெட்டை வீழ்த்தினர்.

திருப்பூர் தமிழன்ஸ் 4 விக்கெட்டுகள் இழப்புக்கு 201 ரன்கள் எடுத்தது.

திருப்பூர் தமிழன்ஸ் அணி 3 ஆட்டங்களில் விளையாடி ஒன்றில் மட்டுமே ஜெயித்துள்ளது.

2 புள்ளிகளுடன் புள்ளிப் பட்டியலில் 7வது இடத்தில் இருக்கிறது. திருச்சி அணி 3 ஆட்டங்களில் விளையாடி மூன்றிலும் தோல்வி அடைந்திருக்கிறது.

புள்ளிப் பட்டியலில் திருச்சி 8வது இடத்தில் இருக்கிறது. திருப்பூர் தமிழன்ஸ் அணி லைக்கா கோவை கிங்ஸுடனும், சேப்பாக் சூப்பர் கில்லீஸுடனும் மோதி தோல்வி கண்டது.

கடைசியாக கடந்த 20ம் தேதி நெல்லை அணியை வீழ்த்தி இந்த சீசனில் முதல் வெற்றியைப் பதிவு செய்தது.

திருச்சி அணியைப் பொறுத்தவரை திண்டுக்கல், சேலம், லைக்கா கோவை கிங்ஸ் ஆகிய அணிகளுடன் மோதி தோல்வி கண்டுள்ளது.

இந்த சீசனில் முதல் வெற்றியை எதிர்நோக்கி காத்திருக்கிறது.

சேலத்தில் உள்ள எஸ்.சி.எஃப் கிரிக்கெட் மைதானம் பொதுவாக சுழற்பந்து வீச்சாளர்களுக்கு உதவும் வகையில் உள்ளது.

தமிழ்நாடு பிரீமியர் லீக் (Tamil Nadu Premier League) ஆண்டுதோறும் நடைபெறும் ஓர் உள்ளூர் கிரிக்கெட் போட்டி ஆகும்.

இந்தப் போட்டிகள் மூலம் பல இளம் வீரர்களின் திறமைகள் அடையாளம் காணப்படும் என்பதில் மாற்றுக் கருத்து இருக்க முடியாது.

2016-இல் தமிழ்நாடு கிரிக்கெட் சங்கத்தால் தொடங்கப்பட்ட இந்தப் போட்டி, இந்தியன் ப்ரீமியர் லீக் போட்டி போன்று தமிழக அளவில் நடைபெறும் கிரிக்கெட் தொடர் ஆகும். 7வது சீசன் போட்டி தற்போது நடைபெற்று வருகிறது.

இதுவரை லைக்கா கோவை கிங்ஸ் அணி, நெல்லை ராயல் கிங்ஸ், சேப்பாக் சூப்பர் கில்லீஸ், திண்டுக்கல் டிராகன்ஸ் ஆகிய அணிகள் வெற்றி பெற்றுள்ளன.

ஸ்டார் ஸ்போர்ட்ஸ் 1 சேனலில் இந்தப் போட்டியைக் கண்டு ரசிக்கலாம். நமது தமிழக வீரர்களுக்கு ஆதரவு தரலாம்.

Fancode செயலியிலும் இந்தத் தொடரை நேரலையில் கண்டு ரசிக்க முடியும். கடந்த முறை மிக பிரமாண்டமாக நடந்து முடிந்தது.

சமூக வலைத்தளங்களில் எங்களை பின்தொடரலாம். லிங்க்குகள் கீழே கொடுக்கப்பட்டுள்ளன:

https://twitter.com/httamilnews 

https://www.facebook.com/HTTamilNews 

https://www.youtube.com/@httamil 

Google News: https://bit.ly/3onGqm9