Asian Para Games 2023: ஒரே நாளில் இந்தியாவுக்கு 6 தங்கம்! உயரம் தாண்டுதலில் வெள்ளி வென்ற மாரியப்பன் தங்கவேலு

ஆண்களுக்கான க்ளப் த்ரோ F51 நிகழ்வில் இந்தியாவின் பிரணவ் சூர்மா தங்கம் வென்றார். 29 வயதாகும் பிரணவ் சூர்மா 30.01மீ வீசி, ஆசிய பாரா விளையாட்டு சாதனை புரிந்தார். இவருக்கு அடுத்தபடியாக 28.76மீ வீசி தரம்பிர் வெள்ளிப்பதக்கமும், 26.93மீ வீசிய அமித் குமார் வெண்கல பதக்கமும் வென்றனர். இந்தப் போட்டியில் நான்கு பேர் மட்டுமே பங்கேற்ற நிலையில், சவுதி அரேபியாவை சேர்ந்த ராதி அலி அல்ஹார்த் 23.77மீ த்ரோ செய்து நான்காவது இடத்தை பிடித்தார்.

வீல் சேரில் அமர்ந்தபடி தங்களது தோல்பட்டை, கை ஆகியவற்றின் உதவியுடன் பலத்தை வெளிப்படுத்து த்ரோ செய்யும் விதமாக இந்த போட்டி அமைந்துள்ளது.

மகளிருக்கான R2 10மீ ஏர் ரைபிள் துப்பாக்கி சுடுதலில் இந்தியாவின் அவனி லேகரா தங்கம் வென்று அசத்தினார். இவர் 249.6 புள்ளிகள் பெற்று சாதனை புரிந்தார். மற்றொரு இந்திய வீராங்கனையான மோனா அகர்வால் 6வது இடத்தை பிடித்தார்.

கடந்த 2020இல் டோக்கியோவில் நடைபெற்ற பராலிம்பிக் போட்டியில், அவனி லேகரா தங்கம் வென்ற முதல் இந்திய வீராங்கனை என்ற சாதனை புரிந்தார்.

க்ளப் த்ரோ விளையாட்டு போல் உயரம் தாண்டுலில் இந்தியா மூன்று பதக்கங்களை இந்திய வென்றது. ஆனால் இந்தப் போட்டியில் பங்கேற்ற வீரர்கள் மூன்று பேரும் இந்தியர்கள் என்பதால், ஆசிய பாராலிம்பிக் விதிமுறைப்படி தங்கம், வெள்ளி பதக்கம் மட்டும் வழங்கப்பட்டது.

அதன்படி, 1.82மீ உயரம் தாண்டிய சைலேஷ் குமார் தங்கமும், 1.80மீ உயரம் தாண்டிய மாரியப்பன் தங்கவேலு வெள்ளி பதக்கமும் வென்றனர். 1.78மீ உயரம் தாண்டிய கோவிந்த்பாய் ராம்சிங்பாய் பதியாருக்கு விதிமுறைப்படி வெண்கலம் அளிக்கப்படவில்லை.

23 வயதாகும் சைலேஷ் குமார், மாரியப்பன் தங்கவேலு ஆகியோர் அடுத்த ஆண்டில் பாரிஸில் நடைபெற இருக்கும் பாரலிம்பிக் போட்டிக்கு தகுதி பெற்றுள்ளனர்.

ஆண்களுக்கான உயரம் தாண்டுதல் டி47 கிளாஸில் இந்தியாவின் நிஷாந்த் குமார் 2.02மீ உயரம் தாண்டி தங்கம் வென்றார். இதே பிரிவில் மற்றொரு இந்தியரான ராம் பால் 1.94மீ உயரம் தாண்டி வெண்கலம் வென்றார்.

டி11 பிரிவு ஆண்களுக்கான 5 ஆயிரம் மீட்டர் ஓட்டப்பந்தயத்தில் அங்குர் தாமா இந்தியாவுக்கான 5வது தங்கத்தை வென்றார். ஆறாவது தங்கம் உயரம் தாண்டுதல் டி64 இறுதிப்போட்டியில் பிரவீண் குமார் வென்றார்.

இது தவிர ஆண்களுக்கான குண்டு எறிதலில் 12.33மீ வரை குண்டு வீசி இந்திய வீரர் மோனு கங்காஸ் வெண்கலம் வென்றார். மகளிருக்கான படகு ஓட்டும் போட்டியான கேனோ விளையாட்டில் இந்தியாவின் பிராச்சி யாதவ் வெள்ளி வென்றார்.

சமூக வலைத்தளங்களில் எங்களை பின்தொடரலாம். லிங்க்குகள் கீழே கொடுக்கப்பட்டுள்ளன:

https://twitter.com/httamilnews  

https://www.facebook.com/HTTamilNews 

https://www.youtube.com/@httamil 

Google News: https://bit.ly/3onGqm9