Indian Women's Hockey: கால்பந்து வீராங்கனையாக நினைத்து ஹாக்கி கோல் கீப்பர் ஆன பிச்சு தேவியின் கதை!

கால்பந்தில் ஆழமாக வேரூன்றிய மாநிலமான மணிப்பூரில் வளர்ந்த பிச்சு தேவி கரிபம் ஒரு கால்பந்து வீராங்கனையாக ஆக வேண்டும் என ஆசைப்பட்டதில் ஆச்சரியமில்லை. ஆனால் விதி அவருக்கு வேறு திட்டங்களை வைத்திருந்தது. ஆம், கால்பந்து வீராங்கனையாக வேண்டும் என ஆசைப்பட்ட அவர், இந்திய ஹாக்கி அணியின் கோல் கீப்பர் ஆன கதை சுவாரசியமானது.

இதுகுறித்து அவரது வார்த்தைகளிலிருந்து தெரிந்து கொள்வோம்.

"மணிப்பூரைச் சேர்ந்த நான் கால்பந்தாட்டத்தைத் தேர்ந்தெடுப்பது இயல்பானது. நான் விளையாட்டை நேசித்தேன். ஆனால் கால்பந்து அணியில் இடம் பெறாததால் ஹாக்கியில் முயற்சி செய்ய வேண்டும் என்று எனது தந்தைதான் பரிந்துரைத்தார். எனக்கு ஹாக்கி பிடிக்கவில்லை என்றால் பரவாயில்லை, நான் எப்போதும் கால்பந்திற்கு திரும்பலாம் என்று அவர் என்னிடம் கூறினார்.

நான் ஹாக்கி விளையாடத் தொடங்கியதும், நான் விளையாட்டை நேசிக்கத் தொடங்கினேன். ஒரு ஸ்ட்ரைக்கராக விளையாடினேன். ஆனால் களத்தில் எனது சுறுசுறுப்பு மற்றும் எனது உயரத்தை கவனித்த எனது பயிற்சியாளர் ஒருவர் கோல் கீப்பிங்கை முயற்சிக்குமாறு அறிவுறுத்தினார்.

ஆனால் நான் ஒருபோதும் கோல் கீப்பராக விரும்பவில்லை. ஆரம்பத்தில் எனக்கு கடினமாக இருந்தது. இருப்பினும், காலப்போக்கில், நான் அதை மாற்றியமைக்கத் தொடங்கினேன். எது நடந்தாலும் அது நன்மைக்கே நடக்கும் என்பது உண்மைதான். அதெல்லாம் இல்லையென்றால், நான் இங்கே இருந்திருக்க மாட்டேன்.

ஹாக்கி இந்தியா ஏற்பாடு செய்திருந்த சுனேரா சஃபர் விழாவுக்கு பெங்களூருவில் எனது குடும்பம் இருந்தது மிகவும் சிறப்பு வாய்ந்தது. எனது இந்திய ஜெர்சியை பரிசளிக்க மேடைக்கு அழைக்கப்பட்டபோது என் குடும்பத்தினரின் முகத்தில் இருந்த புன்னகை எனக்கு மகிழ்ச்சியான உலகத்தை உணர்த்தியது. அவர்கள் மிகவும் மகிழ்ச்சியாகவும் பெருமையாகவும் இருப்பதைப் பார்ப்பது எனது திறமைக்கு ஏற்ப செயல்பட என்னை மேலும் தூண்டியது. நீண்ட நேரமாகியும் நான் வீட்டிற்கு செல்லவில்லை, நான் என் அம்மாவை கட்டியணைத்தபோது, அவர் அழ ஆரம்பித்தார். என்னை இறுக்கமாக அணைத்துக் கொண்டார்.

ஜன்னேக் ஷோப்மேன் வழிகாட்டுதலின் கீழ் ஏற்பாடுகள் சிறப்பாக நடந்து வருகின்றன. நாங்கள் ஒவ்வொரு நாளும் ஒருவருக்கொருவர் ஊக்குவித்து வருகிறோம். நம்மில் சிலருக்கு, ஆசிய கேம்ஸ் போட்டிகளில் பங்கேற்பது இதுவே முதல் முறை என்பதால், உற்சாக உணர்வும் உள்ளது.

தங்கப் பதக்கம் மட்டுமே எங்கள் இலக்கு. அதில் என்ன ரிஸ்க் என்பது எங்களுக்குத் தெரியும், நாங்கள் எந்த அணியையும் சாதாரணமாக எடுத்துக் கொள்ள மாட்டோம். தங்கப் பதக்கத்துடன் நாடு திரும்ப வேண்டும் என்பதே எங்கள் இலக்கு" என்றார் பிச்சு தேவி.