கரகாட்டாக்காரனின் எகிடுதகிடு வெற்றி.. ராமராஜனை பார்த்து நடுங்கினாரா ரஜினிகாந்த்? - உண்மையை உடைத்த ராமராஜன்!

அதிகபட்சமாக ஒரு கோடி வரை

இது குறித்து அவர் பேசும் போது, “ 35 வருடங்கள் ஆன பின்னரும் ‘கரகாட்டக்காரன்’ திரைப்படம் மக்கள் மனதில் ஆழப் பதிந்து இருக்கிறது. உலகம் இருக்கிற வரை, அங்கு ஊர் இருக்கும் வரை, அங்கு கோயில் இருக்கும் வரை, அங்கு திருவிழா நடக்கும் வரை, அங்கும் கரகம் இருக்கும்.

கரகம் இருக்கும் வரை, என்னுடைய நினைப்பு கரகாட்டம் என்ற கலையின் மூலமாக, கரகாட்டக்காரன் படத்தின் வழியாக இருந்து கொண்டே இருக்கும். இதைவிட ஒரு நடிகனுக்கு என்ன வேண்டும் சொல்லுங்கள். அப்பொழுதே அதிகபட்சமாக ஒரு கோடி வரை சம்பளம் பெற்றது நான் மட்டும்தான்.

ரஜினிகாந்த் அப்பொழுது என்னை பார்த்து பொறாமை பட்டார் பயப்பட்டார் என்றெல்லாம் சொல்கிறார்கள்… அதற்கு நான் தற்போது விளக்கம் அளிக்கிறேன். ஒரு வகுப்பில் ஒரு மாணவன் முதல் மதிப்பெண் வாங்குவான்; இன்னொரு மாணவன் இரண்டாவது மதிப்பெண் வாங்குவான்; மற்றொரு மாணவன் மூன்றாவது மதிப்பெண் வாங்குவான்; இதில் இரண்டாவது மதிப்பெண் வாங்கக்கூடிய அல்லது மூன்றாவது மதிப்பெண் வாங்கக்கூடிய மாணவன், திடீரென்று முதன் மதிப்பெண் வாங்கினால் அல்லது முதல் மதிப்பெண் வாங்குவது போல சூழ்நிலை அமைந்தால், முதல் மதிப்பெண் எடுத்த மாணவனுக்கு உள்ளுர ஒரு பயம் வரும். அதற்குக் காரணம் என்னவென்றால் நீ ஏன் முதல் மதிப்பெண் வாங்கவில்லை என்று அவர்களது அம்மா அப்பா அந்த மாணவனை அடிப்பார்கள். எதற்காக என்றால், மற்றொரு பையன் முதல் மதிப்பெண் வாங்கி விட்டான் என்பதற்காக அல்ல; நீ ஏன் முதல் மதிப்பெண் வாங்கவில்லை என்பதற்காக...

போட்டி இல்லை

உண்மையில் அது போட்டியும் இல்லை; பொறாமையும் இல்லை மாணவர்களுக்கு இடையே நடக்கக்கூடிய சூழ்நிலை அது போன்று அமையும் அவ்வளவுதான். எனக்கும், ரஜினிக்கும் இடையே நடந்தது அதுதான் என்று நினைக்கிறேன். உண்மையில் என்னை பார்த்து ரஜினி பயந்து இருக்கலாம். காரணம் என்னவென்றால் என்னுடைய படத்திற்கு கும்பல் கும்பலாக பெண்கள் கூட்டம் வந்து படம் பார்க்கும்.. ஆனால் அது ஒரு காலகட்டத்தில் மட்டும்தான். அதாவது 80 காலகட்டத்தில் மட்டும் தான் அப்படியான ரேஞ்ச் எனக்கு இருந்தது.

தம்பி ராமையா மகன் கல்யாணத்திற்கு சென்றிருந்தேன். அப்போது ரஜினியை சந்திக்க கூடிய வாய்ப்பு கிடைத்தது இரண்டு பேரும் ஆசுவாசமாக பேசிக்கொண்டோம். ஆனால், அவர் உண்மையான லெஜண்ட். நீங்கள் எல்லாம் என்னைப் பற்றி சொல்கிறீர்கள்; ஆனால் இந்த வயதிலும் அவர் விறுவிறுவன நடந்து போய்க் கொண்டே இருக்கிறார். ஆம், கல்யாணத்திற்கு அவர்கிடுகிடுவென வந்தார்; சடசடவென பேசினார்; கடகடவென இடத்தை கடந்து போய்க் கொண்டே இருந்தார்; அவ்வளவு வேகமாக இருந்தார். எனக்கு அதை பார்க்கும் பொழுது மிக மிக ஆச்சர்யமாக இருந்தது. அதற்கெல்லாம் கடவுள் அனுகிரகம் வேண்டும். அவருக்குள் மிகப்பெரிய ஈர்ப்பு இருக்கிறது. அதற்கு கே பாலச்சந்தர் அவர்களுக்கு காலமெல்லாம் நாம் நன்றி சொல்ல கடமைப்பட்டிருக்கிறோம்” என்று பேசினார்.