RIP Captain Vijayakanth: ‘அசாத்தியமான மன உறுதி உள்ள மனிதர்..’ ரஜினிகாந்த்
RIP Captain: மறைந்த விஜயகாந்த் தொடர்பாக ரஜினிகாந்த் உருக்கமாக பேசி உள்ளார்.
Captain Vijayakanth Passed Away: தேமுதிக தலைவர் விஜயகாந்த் உடல் நலக்குறைவால் பாதிக்கப்பட்டுள்ள நிலையில் கடந்த நவம்பர் 18ஆம் தேதி அன்று சென்னையில் உள்ள மியாட் மருத்துவமனையில் அனுமதிக்கப்பட்டு இருந்தார். இருமல், சளி மற்றும் தொண்டை வலி பாதிப்பு அவருக்கு இருந்த நிலையில், வழக்கமான மருத்துவ பரிசோதனைக்காகவே விஜயகாந்த் சென்றுள்ளதாக தேமுதிக தரப்பில் விளக்கம் அளிக்கப்பட்டு இருந்தது.
அவரது உடல் நிலை சற்று தேறிய நிலையில் கடந்த டிசம்பர் மாதம் 11 ஆம் தேதி விஜயகாந்த் டிஸ்சார்ஜ் செய்யப்பட்டார். இந்த நிலையில் கடந்த டிசம்பர் 26 ஆம் தேதி அன்று உடல் நிலை குறைவு காரணமாக மீண்டும் சென்னை மியாட் மருத்துவமனையில் அனுமதிக்கப்பட்ட நிலையில் அவரது உயிர் நேற்று ( டிச. 28) காலை 6.10 மணிக்கு பிரிந்ததாக தெரிவிக்கப்பட்டு உள்ளது.
அவரது மறைவு தொடர்பாக மியாட் மருத்துவமனை வெளியிட்ட அறிக்கையில், “நிமோனியா (நுரையீரல் அழற்சி) காரணமாக அனுமதிக்கப்பட்டு வெண்டிலேட்டர் உதவியுடன் சிகிச்சை பெற்றுவந்த விஜயகாந்துக்கு மருத்துவப் பணியாளர்களின் கடின முயற்சி இருந்தபோதிலும் காலமானார்” என்று தெரிவிக்கப்பட்டுள்ளது.
இவரின் மறைவு தொடர்பாக சினிமா பிரபலங்கள், அரசியல் கட்சித் தலைவர்கள் பலரும் இரங்கல் தெரிவித்து வருகிறார்கள். பல நடிகர்கள், நடிகைகள் நேரில் சென்று அஞ்சலி செலுத்தி வருகிறார்கள்.
அந்த வகையில் சூப்பர் ஸ்டார் ரஜினிகாந்த், மறைந்த விஜயகாந்த் உடலுக்கு அஞ்சலி செலுத்தும் முன்பு செய்தியாளர்களிடம் பேசினார்.
அவர் கூறுகையில், “ அன்பு நண்பர் விஜயகாந்த் இழப்பு மிகப் பெரிய துரதிருஷ்டம். அவர் அசாத்தியமான மன உறுதி உள்ள மனிதர். எப்படியும் உடல்நிலை தேறி வருவார் என எல்லாரும் நினைத்தோம்.
ஆனால் சமீபத்தில் நடந்த தேமுதிக பொதுக்குழு கூட்டத்தில் அவரை பார்க்கும் போது எனக்கு நம்பிக்கை குறைவாகிவிட்டது. அவர் இன்னும் ஆரோக்கியமாக இருந்து இருந்தால் தமிழ் அரசியலில் மிகப்பெரிய சக்தியாக இருந்து இருப்பார். தமிழ் மக்களுக்கு நிறைய நல்லது செய்து இருப்பார். அந்த பாக்கியத்தை தமிழ் மக்கள் இழந்து இருப்போம் “ என்றார்.
நடிகர் ரஜினிகாந்த் வேட்டையன் படத்தின் படப்பிடிப்பிற்காக தூத்துக்குடிக்கு சென்று இருந்தார். விஜயகாந்திற்கு இரங்கல் தெரிவிக்க வேண்டும் என்பதால் உடனே படப்பிடிப்பை நிறுத்திவிட்டு சென்னைக்கு புறப்பட்டு வந்தார் என்பது குறிப்பிடத்தக்கது.
சமூக வலைத்தளங்களில் எங்களை பின்தொடலாம். லிங்க்குகள் கீழே கொடுக்கப்பட்டுள்ளன:
Google News: https://bit.ly/3onGqm9
ஹிந்துஸ்தான் தமிழ் வாட்ஸ் அப் குடும்பத்தில் இணைய கீழே உள்ள லிங்கை கிளிக் செய்யுங்கள்.
