ஜீ தமிழின் சரிகமப 4 சாம்பியன் ஆனார் மகிழன்.. மக்கள் செல்வன் ஆனார் சரண்.. வெளியானது வெற்றியாளர்கள் பட்டியல்!

சரிகமப சீசன் 4 இறுதிசுற்று

இன்று, சரிகமப சீசன் 4ன் பிரம்மாண்டமான இறுதி நிகழ்ச்சி நேரலையாக ஒளிபரப்பப்பட்டது. இந்த நிகழ்ச்சியில் இசையமைப்பாளர் ஹாரிஸ் ஜெயராஜ் சிறப்பு விருந்தினராக பங்கேற்றார். இதுவரை நடந்த சுற்றுகளின் அடிப்படையில், சிறப்பாக பாடிய 6 போட்டியாளர்களை நடுவர்கள் தேர்ந்தெடுத்துள்ளனர்.

வெற்றியாளராகப் போவது யார்?

அதன்படி, இறுதிச்சுற்று போட்டியாளராக மகிழன் பரிதி, ஸ்வேதா, சரத் சார்ள்ஸ், அமன் ஷகா, சரண், வீரபாண்டி ஆகியோர் தேர்வு செய்யப்பட்டனர். இவர்கள் அனைவரும் இன்று பிற்பகலில் இருந்து தங்களுடைய திறமையை மக்களுக்கு நிரூபித்து வருகின்றனர். இதையடுத்து சரிகமப சீசன் 4 நிகழ்ச்சியில் வெற்றி வாகை சூடப்போகும் போட்டியாளர் யார் என்ற கேள்வி அனைவர் மனதிலும் எழுந்துள்ளது.

டைட்டில் வின்னரானார் மகிழன்

இந்நிலையில், போட்டியாளர் மகிழன் அட்டகாசமாக பாடி சரிகமப சீசன் 4ன் வெற்றியாளராக மகுடம் சூடியுள்ளார். அவருக்கு பரிசு தொகையாக 10 லட்சம் ரூபாய் வழங்கப்பட்டது.

இதையடுத்து போட்டியாளர் ஸ்வேதா இரண்டாம் இடத்தை பிடித்துள்ளார். அடுத்தப்படியாக வீரபாண்டியும், 3ம் இடத்தை அமனும் பிடித்துள்ளார். 4ம் இடத்தை சரத் சார்ளஸ் பெற்ரார். மேலும், மக்கள் நாயகனாக போட்டியாளர் சரண் குமார் தேர்வு செய்யப்பட்டுள்ளார்.

வெற்றி பெற்ற அனைத்து போட்டியாளர்களுக்கும் வெற்றிக் கோப்பையை பரிசளித்த இசையமைப்பாளர் ஹாரிஸ் ஜெயராஜ் வாழ்த்து தெரிவித்தார்.

மக்கள் செல்வனுக்கு ஆதரவுக் கரம் நீட்டிய சரிகமப

இந்நிலையில், மக்கள் நாயகனாக தேர்ந்தெடுக்கப்பட்ட சரண் குமாரின் தங்கைக்கு திருமண சீர் வரிசைகளை தருவதாக ஹாரிஸ் ஜெயராஜ் கூறியுள்ளார். மேலும் அவரது தங்கையின் திருமணத்தையும் சரிகமப நிகழ்ச்சியே நடத்தி வைக்கும் எனவும் கூறினர். அத்துடன் தொகுப்பாளர் அர்ச்சனா சரண் குமாருக்கு தங்க செயினையும் பரிசளித்தார்.

அதுமட்டுமின்றி, மக்கள் நாயகனாக தேர்ந்தெடுக்கப்பட்டவருக்கு நிகழ்ச்சி சார்பில் 2 லட்சம் பரிசாக வழங்கப்பட்டுள்ளது.

ஹாரிஸ் கொடுக்கும் வாய்ப்பு

இதையடுத்து நிகழ்ச்சியில் பங்கேற்ற அனைத்து போட்டியாளர்களின் குரல்களையும் பதிவு செய்து தனக்கு அனுப்புமாறு இசையமைப்பாளர் ஹாரிஸ் ஜெயராஜ் கூறியுள்ளார். வருங்காலத்தில் தன்னுடைய இசையில் அவர்களை பாட வைக்க வாய்ப்பு தருவதாகவும் அவர் கூறியிருந்தார்.