Radikaa Sarathkumar: திமுக நிர்வாகி சிவாஜி கிருஷ்ணமூர்த்தி மீது ராதிகா சரத்குமார் போலீசில் புகார் - காரணம் என்ன?

சர்ச்சை பேச்சு

திமுக பேச்சாளாரான சிவாஜி கிருஷ்ணமூர்த்தி, ஆளுநர் ஆர்.என்.ரவி, தமிழக பாஜக மாநில தலைவர் அண்ணாமலை குறித்து பொது மேடையில் கடுமையான விமர்சனங்களை முன்வைத்தார். மேலும், பாஜகவை சேர்ந்த குஷ்பூ பற்றி சிவாஜி கிருஷ்ணமூர்த்தி தரக்குறைவாக பேசியது சமூக வலைதளங்களில் வைரலானது.

இதனைத் தொடர்ந்து, கொடுங்கையூர் காவல் நிலையத்தில் சிவாஜி கிருஷ்ணமூர்த்தி மீது வழக்கு பதிவு செய்யப்பட்டு கைதாகி விடுதலை செய்யப்பட்டார். திமுகவில் இருந்தும் அவர் தற்காலிகமாக நீக்கப்பட்டார். மக்களவை தேர்தலுக்கு முன்னதாக சிவாஜி கிருஷ்ணமூர்த்தி தனது செயலுக்கு மன்னிப்புக் கேட்டதைத் தொடர்ந்து மீண்டும் அவர் திமுகவில் சேர்க்கப்பட்டார்.

பின்னர், திமுக வேட்பாளர்களை ஆதரித்து தேர்தல் பிரசார கூட்டங்களில் மீண்டும் பேச தொடங்கினார் சிவாஜி கிருஷ்ணமூர்த்தி. கடந்த மாதம் நடந்த மக்களவைத் தேர்தலுக்கான பிரச்சார கூட்டத்தில் பேசுகையில், பாஜகவில் சமத்துவ மக்கள் கட்சியை இணைத்த சரத்குமார் மற்றும் ராதிகா பற்றி சர்ச்சைக்குரிய வகையில் பேசியிருந்தார். சிவாஜி கிருஷ்ணமூர்த்தியின் இந்த பேச்சுக்கு கடும் எதிர்ப்பு கிளம்பியது. ராதிகா பற்றி கிருஷ்ணமூர்த்தி பேசிய வீடியோவும் இணையத்தில் வைரலாகியது.

ராதிகா கடும் விமர்சனம்

சிவாஜி கிருஷ்ணமூர்த்தியை விமர்சித்த ராதிகா, "ஏன் டா படுபாவி! ஜெயிலுக்கு போயும் நீ திருத்த மாட்டியா? உன்னை எல்லாம் இன்னும் அந்த கட்சியில் வெச்சிருக்காங் களே. அவங்களதான் குத்தம் சொல்லணும். இதுல உனக்கு அந்த சாம்ராஜ்ய சக்ரவர்த்தியோட பேரு வேற! உன்னை மாதிரி ஆட்கள் எல்லாம் கடுமையாக தண்டிக்கப்படனும். இதற்கு திமுகவும் ஸ்டாலினும் உதயநிதி ஸ்டாலினும் வெட்கப்பட வேண்டும். அவமானகரமானது" என எக்ஸ் தளத்தில் குறிப்பிட்டிருந்தார்.

மேலும் அந்த பதிவில், ராதிகா சரத்குமார் திமுக தலைவரும், முதல்வருமான முக ஸ்டாலின், அமைச்சர் உதயநிதி ஸ்டாலினை டேக் செய்திருந்தார். சிவாஜி கிருஷ்ணமூர்த்தியின் அவதூறு பேச்சை முக ஸ்டாலின், உதயநிதி ஸ்டாலினுக்கு கொண்டு செல்லும் வகையில் ராதிகா சரத்குமார் இப்படி செய்திருந்தார். ஆனால் திமுக தரப்பில் இருந்து சிவாஜி கிருஷ்ணமூர்த்தி மீது எந்த நடவடிக்கையும் எடுக்கப்படவில்லை.

ராதிகா சரத்குமார் புகார்

தேர்தல் பிரசாரத்தின் போது அவதூறாக பேசிய விவகாரத்தில் திமுக நிர்வாகி சிவாஜி கிருஷ்ணமூர்த்தி மீது நடவடிக்கை எடுக்கக்கோரி நடிகை ராதிகா சரத்குமார் சார்பில் சென்னை காவல் ஆணையர் அலுவலகத்தில் தற்போது புகார் அளிக்கப்பட்டுள்ளது. இதனால் சிவாஜி கிருஷ்ணமூர்த்தி மீண்டும் சிக்கலில் சிக்கி உள்ளார்.

ராதிகாவின் சொத்து மதிப்பு

முன்னதாக, நடந்து முடிந்த மக்களவைத் தேர்தலில் விருதுநகர் தொகுதியில் பாஜக சார்பில் போட்டியிட்ட நடிகை ராதிகா, தனது வேட்புமனுவில் 83 கோடி ரூபாய் சொத்து இருப்பதாக கணக்கு காட்டியுள்ளார். இதில் அசையும் சொத்து மதிப்பு சுமார் 27 கோடி ரூபாய் உள்ளதாகவும், அசையா சொத்து மதிப்பு 24 கோடி ரூபாய் அளவில் இருப்பதாகவும் குறிப்பிட்டுள்ளார்.

சமூக வலைத்தளங்களில் எங்களை பின்தொடரலாம். லிங்க்குகள் கீழே கொடுக்கப்பட்டுள்ளன:

https://twitter.com/httamilnews 

https://www.facebook.com/HTTamilNews 

https://www.youtube.com/@httamil 

Google News: https://bit.ly/3onGqm9