கடலுக்குள் அமைந்திருக்கும் தீர்த்த கிணறு!

கடலுக்குள் இருக்கும் வில்லூன்றி தீர்த்தம் பாவங்களைப் போக்கும் என்பது ஐதீகமாகக் கூறப்படுகிறது.

தீர்த்தங்கள் என்பது மனிதர்களின் பாவங்களைத் தீர்க்கும் இது நம்பப்படுகிறது. ஒருவர் செல்வச் செழிப்போடு வாழ்வதற்கும், தங்களின் பாவங்களைத் தீர்ப்பதற்கும் தீர்த்த வழிபாடு செய்கின்றனர். 

பொதுவாகத் தீர்த்தங்கள் கோயில்களில் இருக்கும். ஆனால் ராமநாதபுரம் மாவட்டம் ராமேஸ்வரத்தில் தங்கச்சிமடம் என்ற ஊரில் வில்லூன்றி தீர்த்தம் என்று அழைக்கப்படும் தீர்த்தம் ஆனது கடலுக்குள் அமைந்துள்ளது.

ராமேஸ்வரம் கோவிலுக்கான 64 தீர்த்தங்களில் இதுவும் ஒன்று. அங்கு திரியம்பகேஸ்வரர் சன்னதி அமைந்துள்ளது. ராமேஸ்வரம் சென்று வந்திருந்தால் கட்டாயம் இதுபற்றி தெரிந்திருக்கும்.

வில்லூன்றி தீர்த்த வரலாறு

சீதையைச் சிறைபிடித்துச் சென்றார் ராவணன், அவரிடம் போரிட்டுக் கொன்று தனது மனைவியான சீதாவை ராமன் மீட்டெடுத்தார். பின்னர் அங்கிருந்து சீதாவை அழைத்துக்கொண்டு இந்த பகுதிக்கு வரும் பொழுது சீதாவிற்குத் தாகம் எடுத்துள்ளது. 

அப்போது ராமன் தன் கையிலிருந்த அம்பை, கடலின் ஒரு பக்கத்தில் ஊன்றி வைத்தார். அப்போது அந்த இடத்திலிருந்து நல்ல நீர் பொங்கி வழிந்தது.

பின்னர் சீதா அந்த தண்ணீரைக் குடித்து தனது தாகத்தைத் தீர்த்துக் கொண்டார். அந்தப் புனித காலத்தில் தோன்றிய நீர் ஊற்று தான் இந்த வில்லூன்றி நீரூற்று எனக் கூறப்படுகிறது. 

கரையிலிருந்து கடலுக்குள் சில மீட்டர் தூரத்தில் இந்த தீர்த்த கிணறு அமைந்துள்ளது. கரையிலிருந்து இந்த தீர்த்த கிணறு வரை பாலம் அமைக்கப்பட்டுள்ளது.

இந்த தீர்த்தக்கிணறு மிகவும் பிரபலமாகப் பார்க்கப்படுகிறது. மேலும், தீர்த்தத்தின் மூலம் அனைத்து பாவங்களும் நீங்கும் எனப் பக்தர்களால் நம்பப்படுகிறது.