கள்ளழகர் வைகை ஆற்றில் எழுந்தருளுவது எப்போது? முழு விபரம் இதோ..!

மதுரை மீனாட்சி அம்மன் கோயில் மற்றும் அழகர்கோவில் கள்ளழகர் கோயில் சித்திரைத் திருவிழாக்கள் உலகப் புகழ் பெற்றவையாகும். இந்தாண்டு மதுரை மீனாட்சி சுந்தரேசுவரர் கோயிலில் சித்திரைத் திருவிழா ஏப்ரல் 23-ம் தேதி தொடங்கி மே 4-ம் தேதி வரை 12 நாட்கள் நடைபெறுகிறது. 

ஏப்ரல் 23-ல் காலை 10-30 முதல் 11.30 மணிக்குள் கொடியேற்றம் நடைபெறும். தினமும் காலை, மாலை என இருவேளை சுவாமி புறப்பாடு மாசி வீதிகளில் நடைபெறும். திருவிழாவின் முக்கிய நிகழ்வான மீனாட்சி சுந்தரேசுவரர் திருக்கல்யாணம் மே 2-ம் தேதி காலை 8.35 மணிமுதல் 8.59 மணிக்குள் நடைபெறுகிறது.

அதேபோல் புகழ்பெற்ற கள்ளழகர் கோயில் சித்திரைத் திருவிழா மே 1-ம் தேதி திருவிழாவுடன் ஆரம்பமாகிறது. அன்று மாலை 6 மணிக்குமேல் 7 மணிக்குள் தோளுக்கினியானில் திருக்கல்யாண மண்டபத்தில் எழுந்தருளி திருவாராதனம் நடைபெறும். அடுத்த நாள் மே 2-ல் திருக்கல்யாண மண்டபத்தில் எழுந்தருளல் நடைபெறும்.  3-ம் நாள் (மே 3) மாலை 7 மணிக்குமேல் அழகர் கோவிலிலிருந்து சுந்தரராஜ பெருமாள் மதுரைக்கு புறப்படுகிறார். அடுத்து 4-ம் நாள் (மே 4) மதுரை மூன்றுமாவடியில் எதிர்சேவை நடைபெறும். அன்றிரவு தல்லாகுளத்தில் சுந்தரராஜ பெருமாள், கள்ளழகர் வேடத்தில் தங்கக்குதிரை வாகனத்தில் புறப்பாடாகிறார். 

அதனைத்தொடர்ந்து மே 5-ல் அதிகாலை 5.45 மணிக்கு மேல் 6.12 மணிக்குள் கள்ளழகர் வைகை ஆற்றில் எழுந்தருள் நிகழ்ச்சி நடைபெறுகிறது. பின்னர் ராமராயர் மண்டபத்தில் தண்ணீர் பீச்சுதல் நடைபெறும். அன்றிரவு வண்டியூர் வீரராகவப் பெருமாள் கோயிலில் எழுந்தருளல் நடைபெறும்.

மே 6-ல் தேனூர் மண்டபத்தில் மண்டூக முனிவருக்கு மோட்சம் அளிக்கிறார், அன்றிரவு ராமராயர் மண்டபத்தில் தசாவதாரம் நடைபெறும். மே 7-ல் ராமநாதபுரம் மன்னர் சேதுபதி மண்டபத்தில் பூப்பல்லக்கு அலங்காரத்தில் எழுந்தருள்கிறார். அடுத்தநாள் மே 8-ல் மதுரையிலிருந்து கள்ளழகர் அழகர்மலைக்கு புறப்படுகிறார். மே 9-ல் கோயிலை சென்றடைகிறார். மே 10-ல் உற்சவ சாற்று முறையுடன் திருவிழா நிறைவுபெறுகிறது.

வைகை ஆற்றில் கள்ளழகர் எழுந்தருளும் நிகழ்வில் லட்சக்கணக்கான பக்தர்கள் திரண்டு கள்ளழகரை வரவேற்பர். திரளும் பக்தர்களுக்கேற்ற வசதிகள் செய்துதர மாவட்ட நிர்வாகம், இந்து சமய அறநிலையத்துறை மற்றும் மாநகராட்சி சார்பில் பணிகள் நடந்து வருகின்றன.