Sri Maha Kaliamman Temple: குழந்தை வரம் தரும் காளியம்மன்!
நாமக்கல் ஸ்ரீ மகா காளியம்மன் கோயில் சிறப்புகள் குறித்து இங்கே காண்போம்.
நாமக்கல்லிலிருந்து சுமார் 7 கிலோமீட்டர் தொலைவில் நாமக்கல் கரூர் தேசிய நெடுஞ்சாலையில் அமைந்துள்ள புலவர் பாளையம் பகுதியில் அமைந்துள்ளது ஸ்ரீ மகாகாளி அம்மன் கோயில்.
ஸ்ரீ மகாகாளியம்மன் கோவில் உள்ளே சென்றால் புற்றுடன் நாகப்பாம்பு தெய்வமும் இடது புறம் சிறியதாகச் சிவலிங்கமும் அங்கு அமைந்துள்ளன.
காளியம்மனுக்கு நேராகச் சிங்கம் காட்சி தருகிறது. இதனையடுத்து கோயில் கருவறையில் மண் திட்டாலான காளியம்மனும், பெரிய காளியம்மனும் பக்தர்களுக்கு அருள் புரிகின்றனர்.
மேலும் கோயிலின் வளாகத்தின் வலது புறம் சுமார் 32 அடி உயரத்தில் அரக்கனை வதம் செய்வதற்குப் புறப்படத் தயாராக இருக்கும் ஸ்ரீ மகாகாளி அம்மன் உருவச் சிலை காணப்படுகிறது.
திருமணமான பெண்கள் குழந்தை வரம் கேட்டு கோயிலின் பின்புறத்தில் அமைந்துள்ள ஸ்ரீ நாக கன்னியம்மனை தரிசனம் செய்து வழிபட்டு அருகில் உள்ள மரத்தில் தொட்டில் கட்டி வழிபட்டால் அவர்களுக்குக் குழந்தை பாக்கியம் கிடைக்கும் எனப் பக்தர்கள் நம்பிக்கை தெரிவிக்கின்றனர்.
ஒவ்வொரு ஆண்டும் சித்திரை மாதங்களில் நடைபெறும் திருவிழா வெகு விமர்சையாக நடைபெறுகின்றன. அன்றைய திருவிழாவின் நள்ளிரவு எருமை கிடா பலி கொடுக்கும் பூஜைகள் வெகு விமர்சையாக நடைபெறுகிறது.
ஒவ்வொரு அமாவாசை அன்றும் சிறப்புப் பூஜைகளும் நடத்தப்பட்டு வருகின்றன. ஸ்ரீ மகாகாளி அம்மனை நினைத்து வழிபட்டவர்களின் கோரிக்கைகள் நிறைவேறினால், அம்மனுக்கு ஆலயத்தில் மணிக்கட்டியும், வேல், ஈட்டியும் நேர்த்திக்கடனைப் பக்தர்கள் செலுத்துகின்றனர்.
