’இனி நாம் போகும் பாதை சிங்கப்பாதை!’ திருச்சியில் முதலமைச்சர் மு.க.ஸ்டாலின் சூளுரை!

திருச்சி மாவட்டம் பஞ்சப்பூரில் நடைபெற்ற அரசு விழாவில், தமிழ்நாடு முதலமைச்சர் மு.க. ஸ்டாலின், முடிவுற்ற திட்டங்களை திறந்து வைத்தல், புதிய திட்டங்களுக்கு அடிக்கல் நாட்டுதல் மற்றும் நலத்திட்ட உதவிகள் வழங்குதல் ஆகியவற்றை மேற்கொண்டார். இந்த மாபெரும் விழாவில், திராவிட மாடல் ஆட்சியின் சாதனைகளையும், திருச்சி மாவட்டத்திற்காக செயல்படுத்தப்பட்ட மெகா திட்டங்களையும் அவர் உணர்ச்சி மிக்க உரையில் விவரித்தார். திராவிட இயக்கத்தின் வெற்றி பயணம் திருச்சியில் இருந்து தொடங்கியதாகவும், ஐந்தாம் ஆண்டு ஆட்சியை இங்கிருந்தே தொடங்குவதாகவும் அவர் பெருமிதத்துடன் குறிப்பிட்டார்.

மேலும் படிக்க:- இன்றைய தங்கம் விலை நிலவரம்: ‘தங்கம் விலை குறைந்தது!’ மே 09, 2025 தங்கம் மற்றும் வெள்ளி விலை நிலவரம்!

அமைச்சர் கே.என். நேருவிற்கு பாராட்டு

விழாவை சிறப்பாக ஏற்பாடு செய்த அமைச்சர் கே.என். நேருவை முதலமைச்சர் மனதார பாராட்டினார். “நேருவைப் பாராட்டுவது என்னை நானே பாராட்டுவதற்கு ஒப்பானது. இந்த தீரர்கள் கோட்டத்தின் தலைமைத் தீரர் நேரு,” என்று கூறிய அவர், பல்வேறு அடக்குமுறைகளை எதிர்கொண்டு மத்திய மண்டலத்தை வளர்த்தெடுத்த நேருவின் தியாகங்களை நினைவுகூர்ந்தார். நகர்ப்புற வளர்ச்சித் துறையை ஏற்று, தமிழ்நாட்டின் மாநகரங்கள் மற்றும் பேரூர்களை சிறப்பாக வளர்த்து வருவதாகவும், அதற்கு எடுத்துக்காட்டாக பஞ்சப்பூரில் அமைந்த முத்தமிழறிஞர் கலைஞர் ஒருங்கிணைந்த பேருந்து முனையத்தை குறிப்பிட்டார். “இது பஞ்சப்பூர் இல்லை, மிஞ்சப்பூர்,” என்று நகைச்சுவையுடன் கூறிய அவர், 401 பேருந்துகளை நிறுத்தும் வகையில், விமான நிலையத்திற்கு இணையான வசதிகளுடன் இந்த முனையம் அமைக்கப்பட்டுள்ளதாக தெரிவித்தார்.

அன்பில் மகேஸின் கல்வித்துறை சாதனைகள்

பள்ளிக் கல்வித்துறை அமைச்சர் அன்பில் மகேஸ் பொய்யாமொழியையும் முதலமைச்சர் பாராட்டினார். “அரசுப் பள்ளிகள் வறுமையின் அடையாளமல்ல, பெருமையின் அடையாளம்,” என்று கூறிய அன்பில் மகேஸ், கல்வித்தரத்தை உயர்த்தி, இடைநிற்றலை குறைத்து, மாணவர்களை வீடு வீடாக தேடி பள்ளிக்கு அனுப்பி வருவதாக குறிப்பிட்டார். 2022இல் டெல்லியில் கெஜ்ரிவால் ஆட்சியில் பார்த்த மாதிரி பள்ளிகளை விட சிறப்பாக, தமிழ்நாட்டில் மாதிரி பள்ளிகளை உருவாக்க வேண்டும் என்ற தனது கனவை அன்பில் மகேஸ் நனவாக்கியதாக முதலமைச்சர் புகழ்ந்தார். இதன் விளைவாக, அரசுப் பள்ளி மாணவர்கள் இந்தியாவின் முதன்மை உயர்கல்வி நிறுவனங்களிலும், வெளிநாட்டு கல்வி நிறுவனங்களிலும் படிக்கச் செல்கின்றனர்.

மேலும் படிக்க:- ‘இந்தி தெரியாததால் 10,000 கோடி ரூபாய் இழந்தேன்!’ ஏர்செல் நிறுவனர் சிவசங்கரன் பரபரப்பு பேட்டி!

திருச்சியில் மெகா திட்டங்கள்

கடந்த நான்கு ஆண்டுகளில், திருச்சி மாவட்டத்திற்காக 26,066 கோடி ரூபாய் மதிப்பிலான மெகா திட்டங்கள் செயல்படுத்தப்பட்டுள்ளதாக முதலமைச்சர் தெரிவித்தார். முக்கிய திட்டங்கள்:

முத்தமிழறிஞர் கலைஞர் ஒருங்கிணைந்த பேருந்து முனையம் (408 கோடி ரூபாய்)

அண்ணா கனரக வாகன சரக்கு முனையம் (128 கோடி ரூபாய், 38 ஏக்கர்)

பெரியார் ஒருங்கிணைந்த காய்கறி அங்காடி (236 கோடி ரூபாய், 22 ஏக்கர்)

பெருந்தலைவர் காமராசர் நூலகம் மற்றும் அறிவுசார் மையம் (290 கோடி ரூபாய்)

பறவைகள் பூங்கா (18.09 கோடி ரூபாய்)

சர்வதேச ஒலிம்பிக் அகாடமி (150 கோடி ரூபாய்)

ஜல்லிக்கட்டு அரங்கம் (3 கோடி ரூபாய்)

பச்சமலை சுற்றுலா திட்டம் (4.27 கோடி ரூபாய்)

மணப்பாறையில் 1100 ஏக்கர் பரப்பளவில் அமைந்த சிப்காட் தொழிற்பூங்காவில், ஜபில், பெப்சிகோ போன்ற முன்னணி நிறுவனங்கள் தொழில் தொடங்க உள்ளன, இதன் மூலம் 10,000-க்கும் மேற்பட்ட இளைஞர்களுக்கு வேலைவாய்ப்பு கிடைக்கும். மேலும், 400 கோடி ரூபாய் மதிப்பிலான டைடல் பூங்கா பணிகளும் நடைபெற்று வருகின்றன.

திராவிட இயக்கத்தின் பாரம்பரியம்

விழாவிற்கு முன், தந்தை பெரியார், பேரறிஞர் அண்ணா, முத்தமிழறிஞர் கலைஞர் ஆகியோரின் சிலைகளை முதலமைச்சர் திறந்து வைத்தார். திருச்சிக்கும் திராவிட இயக்கத்திற்கும் உள்ள பிணைப்பை அவர் விவரித்தார். “பெரியார் மாளிகை கட்டி வாழ்ந்தது திருச்சியில், பெரியாரும் அண்ணாவும் ஒரே சிறையில் இருந்தது இங்கே, இந்தி எழுத்து அழிப்பு போராட்டம் மற்றும் கல்லக்குடி போராட்டம் இங்கு நடந்தவை,” என்று குறிப்பிட்டார். இந்த தலைவர்களுக்கு சிலை அமைப்பது நன்றிக்கடன் என்று கூறிய அவர், திராவிட இயக்கத்தின் 100 ஆண்டு பயணம் தமிழ்நாட்டின் வளர்ச்சிக்கு அடித்தளமாக அமைந்ததாக தெரிவித்தார்.

முந்தைய ஆட்சியின் குறைபாடுகள்

முந்தைய ஆட்சியின் தோல்விகளை முதலமைச்சர் சுட்டிக்காட்டினார். மூன்று வேளாண் சட்டங்களுக்கு எதிரான விவசாயிகள் போராட்டத்தை அன்றைய முதலமைச்சர் எடப்பாடி பழனிசாமி இழிவுபடுத்தியதாகவும், காவிரி நீர் உரிமையை உறுதி செய்ய உச்சநீதிமன்றத்தில் தவறியதால் விவசாயிகள் தற்கொலை செய்ததாகவும், குடியுரிமை திருத்தச் சட்டத்திற்கு ஆதரவு அளித்ததால் நாடு முழுவதும் போராட்டங்கள் எழுந்ததாகவும், ஜிஎஸ்டி-யால் மாநில வரிவிதிப்பு உரிமைகள் பறிபோனதாகவும், தூத்துக்குடி துப்பாக்கிச்சூடு மற்றும் சாத்தான்குளம் பொதுமக்கள் கொலை போன்றவை நடந்ததாகவும் அவர் குற்றம் சாட்டினார். இந்த இருண்ட ஆட்சியில் இருந்து, நான்கு ஆண்டுகளில் திராவிட மாடல் ஆட்சி மாபெரும் மாற்றத்தை ஏற்படுத்தியதாக அவர் தெரிவித்தார்.

எதிர்கால உறுதி

“இது வெறும் தொடக்கம். திராவிட மாடல் வெர்சன் 2.0 இனி லோடிங்,” என்று கூறிய முதலமைச்சர், அடுத்த ஆண்டுகளில் இதைவிட பெரிய சாதனைகளை படைப்போம் என்று உறுதியளித்தார். “நான்கு ஆண்டுகளில், சரிவில் இருந்து நம்பர்-1 மாநிலமாகி, சாதனை படைத்தோம்! இனி நாம் போகின்ற பாதை சிங்கப் பாதையாக இருக்கும்! ராக்கெட் வேக வளர்ச்சி என்று சொல்வதை கேள்விப்பட்டிருப்பீர்கள். அதை அடுத்து வரும் ஆண்டுகளில் பார்ப்பீர்கள்.” என முதலமைச்சர் கூறினார். 

2021இல் திருச்சியில் நடந்த ‘விடியலுக்கான முழக்கம்’ மாநாட்டில் அறிவிக்கப்பட்ட ஏழு வாக்குறுதிகள் பெரும்பாலும் நிறைவேற்றப்பட்டுள்ளதாகவும், தமிழ்நாட்டை பொருளாதாரம், விவசாயம், கல்வி, மருத்துவம், நகர மற்றும் கிராம வளர்ச்சி, சமூகநீதி ஆகிய துறைகளில் உயர்த்துவோம் என்ற தொலைநோக்கு திட்டத்தை மீண்டும் வலியுறுத்தினார்.  “தொடரட்டும் நமது திராவிட மாடல் ஆட்சி பல்லாண்டு! என்றும் நாங்கள் உங்களோடு, நீங்கள் எங்களோடு இருக்க வேண்டும்,” என்று கேட்டு, முதலமைச்சர் தனது உரையை நிறைவு செய்தார்.

மேலும் படிக்க:- ‘இந்திய ராணுவத்திற்கு ஆதரவாக சென்னையில் பிரம்மாண்ட பேரணி!’ முதலமைச்சர் மு.க.ஸ்டாலின் அறிவிப்பு!