’அடுத்த தேர்தலில் ஜெயித்தாலும் செந்தில் பாலாஜி அமைச்சர் ஆக கூடாது!’ ED வாதம்! முடித்து வைத்த உச்சநீதிமன்றம்!
“அடுத்த தேர்தலில் வெற்றி பெற்றாலும் செந்தில் பாலாஜி அமைச்சராக பொறுப்பேற்கக் கூடாது என அமலாக்கத்துறை வாதம்”
முன்னாள் அமைச்சர் செந்தில் பாலாஜியின் ஜாமீனை ரத்து செய்யக் கோரும் மனுக்கள் மீதான வழக்கை உச்சநீதிமன்றம் முடித்து வைத்துள்ளது. அடுத்த தேர்தலில் வெற்றி பெற்றாலும் அவர் அமைச்சராக முடியாது என அமலாக்கத்துறை வாதிட்ட நிலையில், செந்தில் பாலாஜி தரப்பு அதற்கு எதிராக வாதங்களை முன்வைத்தது.
அமலாக்கத்துறை மற்றும் செந்தில் பாலாஜி தரப்பு வாதங்கள்
போக்குவரத்து துறையில் அரசு வேலை வாங்கித் தருவதாகக் கூறி பணமோசடி செய்ததாக செந்தில் பாலாஜி மீது வழக்கு பதிவு செய்யப்பட்டிருந்தது. இந்த வழக்கில் அமலாக்கத்துறையால் கைது செய்யப்பட்ட செந்தில் பாலாஜி ஓராண்டுக்கு மேல் சிறையில் இருந்தார். அவருக்கு உச்சநீதிமன்றம் ஜாமீன் வழங்கிய நிலையில், ஜாமீனை ரத்து செய்யக் கோரி மனுத்தாக்கல் செய்யப்பட்டது.
ஜாமீன் வேண்டுமா? அல்லது அமைச்சர் பதவி வேண்டுமா? என செந்தில் பாலாஜிக்கு கடந்த விசாரணையின் போது உச்சநீதிமன்ற நீதிபதிகள் கேள்வி எழுப்பி இருந்தனர். இந்த நிலையில் நேற்றைய தினம் தனது அமைச்சர் பதவியை செந்தில் பாலாஜி ராஜினாமா செய்தார்.