’ஈரோடு இடைத்தேர்தலா? ஊரக உள்ளாட்சித் தேர்தலா?’ எதை விடுவது; எதை தொடுவது! கன்பியூஷனில் விஜய்!
ஏற்கெனவே நடந்த நகர்புற உள்ளாட்சித் தேர்தல்களில் நடிகர் விஜயின் மக்கள் இயக்க நிர்வாகிகள் போட்டியிட்டு சில இடங்களில் வெற்றி பெற்று இருந்தனர். இந்த நிலையில் இந்த இரண்டு தேர்தல்களில் எதில் போட்டியிடலாம் என்பது குறித்து தவெக தரப்பில் யோசனைகள் மேற்கொள்ளப்பட்டு வருகின்றது.
ஈரோடு கிழக்கு தொகுதி எம்.எல்.ஏவாக இருந்த ஈவிகேஎஸ் இளங்கோவன் மறைந்த நிலையில் அடுத்து வரும் இடைத்தேர்தலில் நடிகர் விஜயின் தமிழக வெற்றிக் கழகம் களமிறங்குவது குறித்து ஆலோசிப்பதாக தகவல்கள் வெளியாகி உள்ளன.
ஈரோடு கிழக்கு தொகுதி நிலவரம்
தமிழ்நாடு காங்கிரஸ் கமிட்டியின் முன்னாள் தலைவர், முன்னாள் மத்திய இணையமைச்சராகவும் இருந்து வந்தவர் ஈவிகேஎஸ் இளங்கோவன். இவரது மகன் திருமகன் ஈவேரா, ஈரோடு கிழக்கு தொகுதியின் எம்.எல்.ஏவாக இருந்தார். அவரது திடீர் மறைவை தொடந்து, கடந்த ஆண்டு பிப்ரவரி 27ஆம் தேதி வாக்குப்பதிவும், மார்ச் 2ஆம் தேதி வாக்கு எண்ணிக்கையும் நடைபெற்றது.
இதில் போட்டியிட்ட ஈவிகேஎஸ் இளங்கோவன், ஒரு லட்சத்து 10 ஆயிரத்து 156 வாக்குகள் பெற்று அமோக வெற்றி பெற்றார். அதிமுக வேட்பாளர் தென்னரசு 43 ஆயிரத்து 923 வாக்குகளையும், நாம் தமிழர் வேட்பாளர் மேனகா நவநீதன் 10 ஆயிரத்து 827 வாக்குகளையும் பெற்று இருந்தனர்.