Nainar Nagendhran: ’ஆ.ராசா என்ன ஜோசியரா?’ நயினார் காதில் ஓதிய பாஜக நிர்வாகி! பட்டென சொன்ன பரபரப்பு பதில்!

திருநெல்வேலியில் அம்பேத்கர் சிலைக்கு மாலை அணிவித்த பின் பாஜக மாநிலத் தலைவர் நயினார் நாகேந்திரன் செய்தியாளர்களை சந்தித்தார். அப்போது பேசிய அவர்,

அம்பேத்கர் பிறந்தநாள்; ராசியான நாள்

அம்பேத்கர் பிறந்தநாளை “எனது வாழ்நாளில் ஒரு ராசியான நாள்” என வர்ணித்த நைனார், 2001 ஆம் ஆண்டு அதே நாளில் திருநெல்வேலியில் அம்பேத்கர் சிலைக்கு மாலை அணிவித்த நாளில் அதிமுக வேட்பாளராக அறிவிக்கப்பட்டதை நினைவுகூர்ந்தார். “இன்று, 20 ஆண்டுகளுக்கு பிறகு, பிரதமர் மோடி, அமித்ஷா ஆகியோரால் மாநில தலைவராக நியமிக்கப்பட்டு, மீண்டும் அம்பேத்கர் சிலைக்கு மாலை அணிவிக்கும் வாய்ப்பு கிடைத்திருக்கிறது” என்று உணர்ச்சிபூர்வமாக தெரிவித்தார்.

பொன்முடிக்கு கண்டனம்

பொன்முடி விவகாரம் குறித்து எழுப்பப்பட்ட கேள்விக்கு “திமுக எப்போதுமே பெண்களுக்கு எதிரான கட்சி. ஆ.ராசாவாக இருந்தாலும், மற்றவர்களாக இருந்தாலும், பெண்களைப் பற்றி தவறாக பேசியிருக்கிறார்கள்” என்று குற்றம்சாட்டினார். “இப்படி நிக்க வைக்கிறது, இப்படி படுக்க வைக்கிறது என்று பேசியிருக்கிறார்கள். இதற்கு மேல் முதலமைச்சர் நடவடிக்கை எடுக்கவில்லை என்றால், அதை எப்படி சொல்வது?” என்று கேள்வி எழுப்பினார்.

“ஒவ்வொரு வீட்டிலும் தாய், மனைவி, மகள் இருக்கிறார்கள். இந்த மாதிரி ஒரு கட்சி இருக்க வேண்டுமா என்று ஒவ்வொரு ஆணும் புரிந்து கொள்ள வேண்டும்” என்று கூறிய அவர், “2026 தேர்தலில் எல்லா பெண்களும், தாய்மார்களும் தேசிய ஜனநாயக கூட்டணிக்கு வாக்களிப்பார்கள்” என்று உறுதியாக தெரிவித்தார்.

பொன்முடி விவகாரம்: முதலமைச்சர் பயப்படுகிறார்

அமைச்சர் பொன்முடி விவகாரம் குறித்து பேசிய நயினார், “முதலமைச்சர் நடவடிக்கை எடுக்க பயப்படுகிறார், அதில் என்ன சந்தேகம்?” என்று கூறினார். “பொன்முடி மதம் மற்றும் பெண்கள் குறித்து தவறாக பேசியிருக்கிறார். இதை ஊடகங்கள் திருப்பி திருப்பி ஒளிபரப்பவில்லை” என்று வருத்தம் தெரிவித்தார். “வரும் காலங்களில், அதிமுகவுடன் இணைந்து இது குறித்து தொடர் போராட்டங்கள் நடைபெறும்” என்று அறிவித்தார்.

ஆ.ராசாவின் கருத்து: ஜோசியமா, புள்ளியியலா?

ஆ.ராசாவின் அரசியல் கருத்துகளை கேலி செய்த நயினார், “அதிமுக-பாஜக கூட்டணி பலவீனமாகும் என்று ஆ.ராசா சொல்கிறார். அவர் என்ன ஜோசியரா? பெரிய புள்ளியியல் ஆய்வாளரா? அவர் சொன்னால் நடந்துவிடுமா?” என்று கேள்வி எழுப்பினார்.

தேசிய ஜனநாயக கூட்டணி: இழுபறி இல்லை

பாஜக-அதிமுக கூட்டணி குறித்து விளக்கிய நயினார், “நீண்ட இழுபறி என்று சொல்வது தவறு. அமித்ஷா மற்றும் இபிஎஸ் பேசியபோதே கூட்டணி உறுதியாகிவிட்டது. அன்றே பத்திரிகையாளர் சந்திப்பில் அறிவிக்கப்பட்டது” என்று தெளிவுபடுத்தினார். “தமிழ்நாட்டில் தேசிய ஜனநாயக கூட்டணி இபிஎஸ் தலைமையில் அமையும் என்று அமித்ஷா தெளிவாக கூறியிருக்கிறார்” என்று உறுதிப்படுத்தினார்.

திருநெல்வேலியில் மீண்டும் போட்டியிடுவது குறித்து, “அது அகில இந்திய தலைமை முடிவு செய்யும்” என்று கூறிய அவர், தேர்தல் பணிகள் மற்றும் புதிய கட்சிகளுடன் கூட்டணி பேச்சுவார்த்தைக்கு இன்னும் ஒரு ஆண்டு இருப்பதாகவும் தெரிவித்தார்.

தமிழக போக்குவரத்து: நிர்வாக கோளாறு

தமிழக போக்குவரத்து துறையின் மோசமான நிலை குறித்து விமர்சித்த நயினார் நாகேந்திரன், “பேருந்துகளின் சக்கரங்கள் கழன்று விடும் நிலையில் உள்ளன. முதியவர்கள் பயணிக்க முடியாத அளவுக்கு சேவை மோசமாக உள்ளது” என்று கூறினார். “அரசு எந்த தொழிலையும் செய்யக்கூடாது, ஆனால் மக்கள் பயன்பாட்டு சேவையாக இதை செய்ய வேண்டும். இதில் நஷ்டம் ஏற்படுகிறது என்றால், அரசு அதிக நிதி ஒதுக்கி போக்குவரத்து கழகங்களை காக்க வேண்டும். இது அரசின் நிர்வாக கோளாறு” என்று விமர்சித்தார்.

அம்பேத்கர் மரியாதை: மோடி அரசின் முயற்சிகள்

அம்பேத்கரின் பங்களிப்பை புகழ்ந்த நைனார், “உலகத்திற்கு அரசியல் சாசனத்தை உருவாக்கியவர் அம்பேத்கர்” என்று கூறினார். ஆனால், “காங்கிரஸ் கட்சி அவரை சாம்பிராட்டோ என்று கூறியது. அவரது பிறந்த இடங்கள், நினைவிடங்கள் பராமரிக்கப்படவில்லை” என்று விமர்சித்தார்.

“மோடி அரசு அம்பேத்கரின் ஐந்து முக்கிய இடங்களை புதுப்பித்து, புண்ணிய ஸ்தலங்களாக அறிவித்தது. ஆனால், காங்கிரஸ் அவருக்கு சட்டசபையில் கூட இடம் கொடுக்கவில்லை” என்று குற்றம்சாட்டினார். “1952, 1954 தேர்தல்களில் அம்பேத்கர் தோற்கடிக்கப்பட்டதற்கு காங்கிரஸே காரணம்” என்று கூறினார். மேலும், “பாஜகவின் முன்னோடியான ஜனசங்கம் அவரை ராஜ்யசபா உறுப்பினராக்கியது” என்று பெருமையுடன் தெரிவித்தார்.

2026 தேர்தல்: அம்பேத்கரின் கனவு

அம்பேத்கரின் கனவு குறித்து பேசிய நைனார், “இன்று நாட்டில் சுதந்திரம் எங்கே இருக்கிறது? எல்லா சமூகத்தையும் கூண்டில் அடைத்துவிட்டோம்” என்று வருத்தம் தெரிவித்தார். “தமிழ்நாடு இதிலிருந்து எப்போது மீளும்? உண்மையான அம்பேத்கரின் கனவு எப்போது நனவாகும்? 2026 தேர்தலில் மக்கள் இதற்கு தீர்ப்பளிப்பார்கள்” என்று நம்பிக்கையுடன் உரையை நிறைவு செய்தார்.