Vikravandi By Election: விக்கிரவாண்டி இடைத்தேர்தலில் நாம் தமிழர் சார்பில் களமிறங்கும் மருத்துவர் அபிநயா - யார் இவர்?
Vikravandi By Election: விக்கிரவாண்டி தொகுதி இடைத்தேர்தலில் நாம் தமிழர் கட்சி சார்பாக மருத்துவர் அபிநயா போட்டியிடுவார் என அக்கட்சியின் தலைமை ஒருங்கிணைப்பாளர் சீமான் அறிவித்துள்ளார்.
விழுப்புரம் மாவட்டம் விக்கிரவாண்டி சட்டமன்றத் தொகுதி உறுப்பினராக இருந்த புகழேந்தி, உடல்நலக்குறைவால் கடந்த ஏப்ரல் 6 ஆம் தேதி காலமானார். இதைத் தொடர்ந்து காலியானதாக அறிவிக்கப்பட்ட விக்கிரவாண்டி தொகுதிக்கு வரும் ஜூலை 10ஆம் தேதி தேர்தல் நடைபெறும் என இந்திய தேர்தல் ஆணையம் அறிவித்தது.
வேட்புமனுத் தாக்கல் தொடங்கியது
விக்கிரவாண்டி இடைத்தேர்தலுக்கான வேட்புமனு தாக்கல் (ஜூன் 14) இன்று தொடங்கியுள்ளது. வேட்புமனுவைத் தாக்கல் செய்வதற்கு ஜூன் 21 ஆம் தேதி கடைசி நாளாகும். மேலும், வேட்புமனுக்கள் மீது 24 ஆம் தேதி பரிசீலனை நடைபெறும் என்றும் வேட்புமனுக்களை திரும்ப பெற 26 ஆம் தேதி கடைசி நாளாகும் என்றும் தேர்தல் ஆணையம் அறிவித்துள்ளது. இடைத்தேர்தலில் பதிவாகும் வாக்குகள் ஜூலை 13 ஆம் தேதி எண்ணப்பட்டு முடிவுகள் அறிவிக்கப்பட உள்ளன.
நாம் தமிழர் வேட்பாளர் அறிவிப்பு
விக்கிரவாண்டி இடைத்தேர்தலில் நாம் தமிழர் கட்சி சார்பாக போட்டியிடவுள்ள வேட்பாளரின் பெயரை கட்சியின் தலைமை ஒருங்கிணைப்பாளர் சீமான் அறிவித்துள்ளார். இது தொடர்பாக அவர் வெளியிட்ட அறிக்கையில்,"தமிழகத்தில் வரும் ஜூலை 10-ம் தேதி நடைபெற உள்ள விக்கிரவாண்டி சட்டப்பேரவை இடைத்தேர்தலில் நாம் தமிழ் கட்சி சார்பாக மருத்துவர் அபிநயா (முதுகலை ஓமியோபதி மருத்துவம்) போட்டியிட உள்ளார். கட்சியின் மாநில, மண்டல, மாவட்ட, தொகுதி உள்ளிட்ட அனைத்து நிலை பொறுப்பாளர்களும் விக்கிரவாண்டி சட்டமன்ற இடைத்தேர்தலில் நாம் தமிழர் கட்சி வெற்றி பெற முழு ஒத்துழைப்பை வழங்குமாறு கேட்டுக்கொள்கிறேன்." என்று அதில் தெரிவித்துள்ளார்.
யார் இந்த மருத்துவர் அபிநயா?
சமீபத்தில் நடைபெற்று முடிந்த மக்களவைத் தேர்தலில், தருமபுரி தொகுதியில் நாம் தமிழர் கட்சி சார்பாக போட்டியிட்டவர்தான் மருத்தவர் அபிநயா பொன்னிவளவன். தருமபுரி மக்களவைத் தொகுதியில் தி.மு.க வேட்பாளர் மணி வெற்றிப் பெற்றிருந்தாலும், பா.ம.க சார்பாக போட்டியிட்ட சௌமியா அன்புமணியால்தான் இந்தத் தொகுதி உற்று நோக்கப்பட்டது. இருப்பினும் 65,381 வாக்குகள் பெற்ற அபிநயா, டெபாசிட்டை பறிகொடுத்தார். 28 வயதே ஆகும் அபிநயாவின் சொந்த ஊர், விழுப்புரம் மாவட்டம் பில்லூர் கிராமம். அவரின் கணவர் பொன்னிவளவன். விவசாய குடும்பம் என்றாலும், அபிநயா சிறந்த தடகள வீராங்கனையும் ஆவார். தேசிய அளவிலான போட்டிகளிலும் பங்கேற்றிருக்கிறார். ராசிபுரத்தில் இளங்கலை மருத்துவம் படித்து, மகாராஷ்டிராவில் முதுகலைப் பட்டம் பெற்றிருக்கிறார்.
கரும்பு விவசாயி சின்னம்?
நடந்து முடிந்த மக்களவைத் தேர்தலில் 8.14 சதவீத வாக்குகளை பெற்று மாநில கட்சி என்ற அந்தஸ்தை பெற்றுள்ள நாம் தமிழர் கட்சி, விக்கிரவாண்டி இடைத்தேர்தலில் தங்களது விருப்பச் சின்னமான கரும்பு விவசாயி சின்னத்திலே போட்டியிடவும் முனைப்பு காட்டி வருவதாகச் சொல்லப்படுகிறது.
4 முனை போட்டி?
விக்கிரவாண்டி இடைத்தேர்தலில் தி.மு.க., விவசாய தொழிலாளர் அணி மாநில செயலாளரான அன்னியூர் சிவா போட்டியிடுவார் என அக்கட்சியின் தலைவர் மு.க.ஸ்டாலின் அறிவித்துள்ளார். அதிமுக சார்பில் முன்னாள் எம்.எல்.ஏ., முத்தமிழ்செல்வன் உட்பட பலர் போட்டியிட விருப்பம் தெரிவித்துள்ளனர். எனினும் விழுப்புரம் மாவட்ட செயலாளர் சி.வி.சண்முகம் கூறும் நபரையே, அதிமுக பொதுச் செயலாளர் எடப்பாடி பழனிசாமி வேட்பாளராக அறிவிப்பார் என எதிர்பார்க்கப்படுகிறது. இதற்கிடையில் தேசிய ஜனநாயக கூட்டணி சார்பாக பாமக போட்டியிடும் என தமிழக பாஜக மாநிலத் தலைவர் அண்ணாமலை அறிவித்துள்ளார். இதன் மூலம் மக்களவைத் தேர்தலை போல், இடைத்தேர்தலிலும் திமுக, அதிமுக, பாஜக கூட்டணி, நாம் தமிழர் கட்சி என நான்கு முனை போட்டி ஏற்படும் சூழல் உருவாகி உள்ளது.
சமூக வலைத்தளங்களில் எங்களை பின்தொடரலாம். லிங்க்குகள் கீழே கொடுக்கப்பட்டுள்ளன:
Google News: https://bit.ly/3onGqm9
ஹிந்துஸ்தான் தமிழ் வாட்ஸ் அப் குடும்பத்தில் இணைய கீழே உள்ள லிங்கை கிளிக் செய்யுங்கள்.
