’முல்லை பெரியாறு அணையால் கேரள மக்களின் உயிருக்கு ஆபத்து!’ உச்சநீதிமன்றத்தில் பினராயி விஜயன் அரசு பிரமாண பத்திரம் தாக்கல்

152 அடி வரை நீர்த்தேக்க உரிமை இல்லை 

கேரள அரசு தனது பிரமாண பத்திரத்தில், முல்லை பெரியாறு அணையில் பராமரிப்பு, புனரமைப்பு மற்றும் பலப்படுத்தும் பணிகள் மேற்கொண்டாலும், தமிழ்நாடு அரசு 152 அடி வரை நீர் தேக்க உரிமை இல்லை என்றும், 142 அடி வரை மட்டுமே நீர் தேக்கலாம் என்றும் குறிப்பிட்டுள்ளது. மேலும், அணையை பலப்படுத்துவது 140 அடி நீர் தேக்குவதற்கு மட்டுமே உதவும் எனவும் வாதிட்டுள்ளது.

ஜல்சக்தி அமைச்சக அறிவிப்பு சட்டவிரோதம் 

முல்லை பெரியாறு அணை பாதுகாப்பு தொடர்பாக உச்சநீதிமன்றத்தால் அமைக்கப்பட்ட மேற்பார்வைக் குழுவை மத்திய அரசு கலைத்தது சட்டவிரோதமானது என்றும் கேரள அரசு குற்றம்சாட்டியுள்ளது. உச்சநீதிமன்றத்தின் அரசியலமைப்பு அமர்வால் அமைக்கப்பட்ட இந்தக் குழுவை கலைக்க மத்திய அரசுக்கு அதிகாரம் இல்லை எனவும், ஜல்சக்தி அமைச்சகத்தின் அறிவிப்பு சட்டவிரோதமானது எனவும் பிரமாண பத்திரத்தில் தெரிவிக்கப்பட்டுள்ளது.

மேலும் படிக்க:- தலைப்பு செய்திகள்: இன்றுடன் சட்டப்பேரவை நிறைவு முதல் பாரதிதாசன் பிறந்தநாள் வரை! இன்றைய முக்கிய செய்திகள்!

என்ன செய்ய போகிறது தமிழக அரசு 

தமிழ்நாடு மற்றும் கேரள அரசுகளுக்கு இடையே முல்லை பெரியாறு அணை தொடர்பாக நீண்ட காலமாக கருத்து வேறுபாடு நிலவி வருகிறது. கேரள அரசு புதிய அணை கட்ட வேண்டும் என வலியுறுத்தி வரும் நிலையில், உச்சநீதிமன்றத்தால் அமைக்கப்பட்ட மேற்பார்வைக் குழு ஏற்கனவே அணை பாதுகாப்பாக உள்ளதாக தெரிவித்திருந்தது. இருப்பினும், கேரள அரசு இந்தப் பிரமாண பத்திரத்தை தாக்கல் செய்து, அணையின் பாதுகாப்பு குறித்து மீண்டும் அச்சத்தை வெளிப்படுத்தியுள்ளது. இந்த வழக்கின் அடுத்தகட்ட விசாரணையில் கேரள அரசின் வாதங்கள் மீது உச்சநீதிமன்றம் முடிவெடுக்கும் என எதிர்பார்க்கப்படுகிறது. தென் மாவட்ட மக்களின் வாழ்வாதாரத்துடன் நெருக்கமாக தொடர்புடைய முல்லை பெரியாறு அணை விவகாரத்தில் தமிழ்நாடு அரசு எடுக்கும் அடுத்தகட்ட நடவடிக்கைகள் கவனிக்கப்படுகின்றன.

மேலும் படிக்க:- இன்றைய தங்கம் விலை நிலவரம்: ‘மீண்டும் உயர்ந்த தங்கம்!’ ஏப்ரல் 29, 2025 தங்கம் மற்றும் வெள்ளி விலை நிலவரம்!