தமிழ்நாட்டில் இன்று 7 மாவட்டங்களுக்கு மழைக்கு வாய்ப்பு! இந்திய வானிலை ஆய்வு மையம் அறிவிப்பு! உங்க மாவட்டம் இருக்கா?
இந்தியாவில் கோடை வெப்பம் புதிய உச்சத்தை தொட்டு வரும் நிலையில் இன்று (25/04/2025) தமிழ்நாட்டில் மட்டும் 7 மாவட்டங்களில் தொடர்ந்து 3 மணி நேரம் மழை பெய்ய உள்ளது. இந்த அறிவிப்பை இந்திய வானிலை ஆய்வு மையம் வெளியீட்டுள்ளது.
இந்திய வானிலை ஆய்வு மையம் வெளியிட்டுள்ள இன்றைய அறிக்கையில் தமிழ்நாட்டில் உள்ள ஏழு மாவட்டங்களில் காலை 10 மணி வரை மழைக்கு வாய்ப்பு இருப்பதாக தெரிவிக்கப்பட்டுள்ளது. குறிப்பாக இந்தியா முழுவதும் இன்று வெப்ப அலை அதிகமாக வீச வாய்ப்பிருப்பதாக அறிவிக்கப்பட்டிருந்த நிலையில் தமிழ்நாட்டில் மழை பெய்ய உள்ளது குறிப்பிடத்தக்கது. தமிழ்நாட்டில் அரசு மற்றும் அரசு உதவி பெறும் பள்ளிகளில் இருக்கும் ஒன்று முதல் ஒன்பதாம் வகுப்பு வரை உள்ள குழந்தைகளுக்கு இன்று முதல் கோடை விடுமுறை விடப்பட்டுள்ளது. இந்த நிலையில் இன்று பெய்யும் மழை கோடை வெப்பத்தை தணிக்கலாம் என எதிர்ப்பார்க்கப்படுகிறது.
கடுமையான வெயில்
ஒவ்வொரு ஆண்டும் மார்ச் மாதம் முதல் ஜூன் மாதம் வரை இந்தியாவில் கோடைகாலம் நிலவும். அதிலும் இந்தியா மிதவெப்ப நாடு என்பதனால் கோடை வெயிலின் தாக்கம் இங்கு அதிகமாகவே இருக்கும். ஆனால் இந்த 2025 ஆம் ஆண்டு பிப்ரவரி மாதம் தொடக்கத்தில் இருந்தே வெயிலின் தாக்கம் அதிகமாக இருந்து வருகிறது. மார்ச் மாதத்திலேயே காலை 10 மணி முதல் மாலை 3 மணி வரை வெளியில் செல்ல வேண்டாம் எனக் கூறப்பட்டது. இந்த நிலையில் ஏப்ரல் மாதத்திலேயே அதிகமான வெப்ப அலை வீசி வருகிறது.
இந்த மாத தொடக்கத்தில் மழை எதிர்ப்பார்க்கப்பட்டது. ஆனால் சரியான பெரிய அளவில் மழைப்பொழிவு இல்லை. வங்க கடல் காற்றழுத்த தாழ்வு மண்டலத்தால் குறைவான மழை இருந்து வந்தது. இந்த நிலையில் இன்று முதல் இந்தியாவின் பல பகுதிகளில் அதிகமான வெப்ப அலை வீச வாய்ப்புள்ளது என இந்திய வானிலை ஆய்வு மையம் தெரிவித்து இருந்தது. மேற்கு மத்திய பிரதேசத்தில் 30ஆம் தேதி வரையும், கிழக்கு மத்திய பிரதேச பகுதிகளில் 27 ஆம் தேதி வரை உத்தரபிரதேசம், ஜார்கண்ட், மேற்கு வங்காளம், பஞ்சாப், ஹரியானா ஆகிய மாநிலங்களில் வெப்ப அலை இருக்கும் என கூறப்படுகிறது.
தமிழ்நாட்டில் மழை
தமிழ்நாட்டில் குறிப்பிட்ட 7 மாவட்டங்களில் மட்டும் காலை 10 மணி வரை மழை பெய்ய வாய்ப்புள்ளது என தெரிவிக்கப்பட்டுள்ளது. இது குறித்து சென்னை வானிலை ஆய்வு மையம் வெளியிட்ட அறிக்கையில், " தென்னிந்திய பகுதிகளின் மேல், வளிமண்டல கீழடுக்கு பகுதிகளில், கிழக்கு மற்றும் மேற்கு திசை காற்று சந்திக்கும் பகுதி நிலவுகிறது. இதன் காரணமாக இன்று தமிழகத்தில் ஓரிரு இடங்களிலும், புதுவை மற்றும் காரைக்கால் பகுதிகளிலும் இடி, மின்னலுடன் கூடிய லேசானது முதல் மிதமான மழை பெய்யக்கூடும் என்று தெரிவித்துள்ளது. அதிலும் குறிப்பாக தமிழ்நாட்டின் திருப்பூர், தேனி, திருநெல்வேலி, கோவை, திண்டுக்கல், தென்காசி மற்றும் கன்னியாகுமரி போன்ற மாவட்டங்களில் பரவலாக மழை இருக்கும் எனத் தெரிவிக்கபட்டுள்ளது.
Suguna Devi P
டாபிக்ஸ்