Gopalswamy Doraiswamy Naidu: இந்தியாவின் எடிசன் ஜி.டி நாயுடு நினைவு நாள்!
இயக்கவியலை முழுமையாக புரிந்து மக்கள் பயன்பெறும் வகையில் இயந்திரங்களை கண்டு பிடித்த இந்தியாவின் எடிசன். அறிவியல் கண்டு பிடிப்புகளின் முன்னோடி என்றெல்லாம் பாராட்டு பெற்ற ஜி.டி.நாயுடு அவர்களின் நினைவு தினம் இன்று இந்த நாளில் ஜிடி நாயுடுவை நினைவு கூர்வதில் இந்துஸ்தான் டைம்ஸ் தமிழ் பெருமிதம் கொள்கிறது.
கோவை யில் சூலூர் அருகே உள்ள கலங்கல் என்ற கிராமத்தில் உள்ள விவசாயி கோபால்சாமி, அல்லம்மாள் என்ற தம்பதியினருக்கு 1893ல் பிறந்த கோபால்சாமி துரைசாமி நாயுடு தான் பின்னாளில் தேசமெங்கும் ஜி.டி. நாயுடு என்று அறியப்பட்டவர்.
லட்சுமி நாயக்கன்பாளையம் என்ற சிறிய கிராமத்தில் தன்ஆரம்ப கல்வியை நான்காம் வகுப்புடன் முடித்துவிட்டு வந்த போதிலும் இயந்திரவியல் மற்றும் விவசாய புத்தகங்கள் எங்கு கிடைத்தாலும் தேடிப்பிடித்து படிப்பார். இருபது வயது ஆகும் போது ஹோட்டல் ஒன்றில் வேலை பார்த்து வந்தார். பிரிட்டிஷ் ஆட்சி செய்த காலம் அது. ஆங்கிலேய அதிகாரி ஒருவர் தனது மோட்டார் சைக்கிளில் வலம் வரும் போது பழக்கம் ஏற்பட்டு அந்த வண்டியை ஓட்டி பழகுகிறார்.
ஒரு கட்டத்தில் பிடித்து போக ஹோட்டல் வருமானத்தில் அந்த வண்டியை வாங்கி விடுகிறார். ஆசையாக வாங்கிய வண்டியை அக்கக்காக கழற்றி ஒவ்வொரு பாகமாக ஆராய ஆரம்பிக்கிறார். மீண்டும் அசெம்பிள் செய்யும் போது இருவர் பயணம் செய்யும் வகையில் பக்கவாட்டில் ஒரு பகுதியை பொருத்தி முழுமையாக மாற்றி அமைக்கிறார். அப்போது ஆரம்பித்த ஆர்வம் தான் எல்லா இடங்களிலும் இயந்திரங்களை வேலைக்காக பயன்படுத்தும் கருவிகள் உருவாக்க உதவியது. பஞ்சாலை ஒன்றில் வேலைக்கு சேர்ந்து பல விசயங்களை கற்று சொந்தமாக பஞ்சாலை நிறுவினார். கோவையில் ஸ்டேன்ஸ் என்ற ஆங்கிலேய அதிகாரியுடன் தொடர்பு ஏற்பட்ட பிறகு வலி நிவாரணி உள்ளிட்ட பல மருந்துகளை அமெரிக்காவில் இருந்து குறைந்த லாபம் வைத்துக்கொண்டு வியாபாரம் செய்த வருமானம் ஈட்டினார்.