‘யார் அவ்வையார்?.. மலைக்கோயிலுக்கு ரோப்கார் இல்லை.. நயினாரின் நியாயமான கோரிக்கை..’ சட்டமன்றத்தின் இன்றைய விவாதங்கள்!

• பாஜக சட்டமன்ற உறுப்பினர் நயினார் நாகேந்திரன் , வற்றாத ஜீவநதியான தாமிரபரணி ஆற்றில் 4 அல்லது 5 இடங்களில் தடுப்பணையும், சிற்றாறு பகுதியில் கங்கை கொண்டான் பகுதியில் தடுப்பணை கட்டித் தர வேண்டும் என்று கோரிக்கை எழுப்பினார். அதற்கு பதிலளித்த அமைச்சர் துரைமுருகன், ‘‘நயினார் நாகேந்திரன் வைத்த கோரிக்கை நியாயமானது. அவர் சொன்னது போல முக்கியமான நதி தாமிரபரணி. நயினார் நாகேந்திரன் வைத்த கோரிக்கை நியாயமான கோரிக்கை, அவசியமான கோரிக்கை. அதற்கு முன்னுரிமை கொடுத்து, அந்த கோரிக்கை நிறைவேற்ற நடவடிக்கை எடுக்கப்படும்’’ என்று துரைமுருகன் பதிலளித்தார்.
• விருகம்பாக்கத்தில் தனியார் கட்டடங்களில் இயங்கி வரும் 3 குழந்தைகள் மையத்திற்கு தான் வாடகை செலுத்தி வருவதாகவும், அரசு சார்பில் பட்டா இல்லாத நிலங்களை குழந்தைகள் மையத்திற்கு தரப்படுமா என்று சட்டமன்ற உறுப்பினர் பிரபாகர் ராஜா கேள்வி எழுப்பினார், அதற்கு பதிலளித்த அமைச்சர் கீதா ஜீவன், ‘‘வாடகை கட்டங்களில் இயங்கும் குழந்தைகள் மையத்திற்கு வழங்கும் வாடகை ரூ.8000 ஆக உயர்த்தி வழங்கப்படும், சென்னை மாநகராட்சி மூலம் அதற்கான நடவடிக்கை எடுக்கப்படும்’’ என்று கீதா ஜீவன் பதிலளித்தார்.

மேலும் படிக்க | ‘அதிமுகவை உடைக்க முடியாது.. நினைப்பவர்கள் மூக்கு தான் உடைபடும்’ எடப்பாடி பழனிசாமி பேட்டி

• வேதாரண்யம் தொகுதி துளசியாப்பட்டினத்தில் அவ்வையார் அறிவுக் களஞ்சியம் தொடங்கப்படுமா? என்று ஓ.எஸ்.மணியன் கேள்வி எழுப்பினார். அதற்கு பதிலளித்த அமைச்சர் துரைமுருகன், ‘‘மொத்தம் 5 அவ்வையார்கள் இருப்பதாக, ஆராய்ச்சியாளர்கள் கூறுகின்றனர். நீங்கள் கேட்பது எந்த அவ்வைக்கு?’’ என்று துரை முருகன் பதில் கேள்வி எழுப்பினார். மேலும் வயதானவர்களை ஆயா என அழைப்பது போல, அந்த காலத்தில் பெண் புலவர்களை அவ்வை என்று அழைத்திருப்பார்கள் போல,’’ என்று துரைமுருகன் கூற, அப்போது எழுந்த அமைச்சர் தங்கம் தென்னரசு, ‘‘இவ்வளவு நாள் அவ்வையார் என்று கூறினோம், இப்போது அவ்வை யார்? என்று கேள்வி எழுந்துள்ளது’’ என்று அவர் கூற, சபையில் சிரிப்பலை எழுந்தது.