Shardul Thakur : ‘பந்து மட்டும் தான் போடத் தெரியுமா? பாடமும் எடுப்பேன்’ சதம் விளாசிய ஷர்துல் தாகூர்!

மும்பையில் நடந்து வரும் ரஞ்சி டிராபி போட்டியில், ஜம்மு காஷ்மீர் அணிக்கு எதிராக இரண்டு இன்னிங்ஸிலும் சிறப்பான பேட்டிங் செய்துள்ளார் பந்துவீச்சாளரான ஷர்துல் தாகூர்.

முதல் இன்னிங்ஸில் மும்பை அணி 120 ரன்கள் எடுத்த நிலையில், அதிக பட்சமாக ஷர்துல் தாகூர், 57 பந்துகளில் 51 ரன்கள் எடுத்து, அரை சதம் கடந்தார். அதில் 2 சிக்ஸர்கள் மற்றும் 5 பவுண்டரிகள் அடங்கும்.

முதல் இன்னிங்ஸில் அணியின் அதிகபட்ச ஸ்கோர் அடித்த ஷர்துல் தாகூர், இரண்டாவது இன்னிங்ஸிலும் தன்னுடைய சிறப்பான ஆட்டத்தை வெளிப்படுத்தினார்.

இரண்டாவது இன்னிங்ஸிலும் மும்பை அணியின் முன்னணி பேட்ஸ்களான ரோஹித் சர்மா, யஜஸ்வி ஜெய்வால், அஜின்கே ரஹானே, ஷ்ரயாஸ் ஐயர், ஷிவம் துபே ஆகியோர் சொற்ப ரன்களில் ஆட்டமிழந்தனர். 

பின்னிலையில் இருந்த மும்பை அணியை, தன்னுடைய சிறப்பான ஆட்டத்தால் முன்னிலை பெற வைத்தார் ஷர்துல் தாகூர். அதிரடியாக ஆடிய அவர், இரண்டாவது இன்னிங்ஸில் சதம் அடித்து அசத்தினார். 

119 பந்துகளில் 113 ரன்கள் எடுத்த ஷர்துல் தாகூர், 17 பவுண்டரிகளை விளாசினார். இரண்டாவது இன்னிங்ஸில் அவர் சிக்ஸர் விளாசவில்லை என்றாலும், பவுண்டரி மற்றும் ஓட்டம் மூலம் ரன்கள் சேர்த்தார்.

இரண்டாம் நாள் ஆட்ட முடிவில், மும்பை அணி 7 விக்கெட்டுகளை இழந்து 274 ரன்கள் எடுத்துள்ளது. ஷர்துல் தாகூர் 113 ரன்கள், கொடியன் 58 ரன்களுடன் களத்தில் உள்ளனர். சிறப்பான பேட்டிங் செய்த ஷர்துல் தாகூர், முன்னணி பேட்ஸ்மேன்களுக்கு பாடம் எடுத்துள்ளார்.