Dwarka Expressway: டெல்லி - குருகிராம் துவாரகா விரைவுச் சாலையின் சிறப்பம்சங்கள் என்னென்ன?

டெல்லி, துவாரகா அதிவேக நெடுஞ்சாலையின் ஹரியானா பிரிவு உட்பட ரூ .1 லட்சம் கோடி மதிப்புள்ள 112 தேசிய நெடுஞ்சாலை திட்டங்களை பிரதமர் நரேந்திர மோடி குருகிராமில் திங்கள்கிழமை தொடங்கி வைக்கிறார். 

எட்டு வழி துவாரகா அதிவேக நெடுஞ்சாலையின் 19 கி.மீ நீளமுள்ள ஹரியானா பிரிவு தேசிய நெடுஞ்சாலை -48 இல் டெல்லி மற்றும் குருகிராம் இடையே போக்குவரத்தை மேம்படுத்தவும், நெரிசலைக் குறைக்கவும் இந்த சாலை உதவும்.

துவாரகா அதிவேக நெடுஞ்சாலை சுமார் ரூ .4,100 கோடி செலவில் அமைக்கப்பட்டுள்ளது. 10.2 கி.மீ நீளமுள்ள டெல்லி --ஹரியானா எல்லை முதல் பசாய் ரயில்-ஓவர் பிரிட்ஜ் (ஆர்ஓபி) மற்றும் 8.7 கி.மீ நீளமுள்ள பசாய் ரோப் முதல் கெர்கி தௌலா வரை இரண்டு தொகுப்புகளை  இந்த சாலை உள்ளடக்கியது. 

இந்த விரைவுச் சாலை ஹரியானாவில் 18.9 கி.மீ தூரத்துக்கும், டெல்லியில் 10.1 கி.மீ தூரத்துக்கும் அமைக்கப்பட்டுள்ளது. இதன் மூலம் டெல்லி குருகிராம் விரைவு சாலையில் (என்எச் 48) போக்குவரத்து நெரிசல் குறையும்.

மேம்பாலங்கள், சுரங்கப் பாதைகள், குகைப் பாதைகள், உயரமான சாலைகள் போன்றவை இந்த விரைவுச் சாலையில் இடம்பெற்றுள்ளன. விரைவுச் சாலைக்கு இரு புறமும், 3 வழி சர்வீஸ் சாலைகள் கட்டப்படுகின்றன. இந்த விரைவுச் சாலையில் ஐடிஎஸ் (Intelligent Transport System) எனப்படும் நவீன வசதிகள் இணைக்கப்பட்டுள்ளன.