HBD Bal Thackeray: மும்பையை ஆட்டி படைத்த பால் தாக்கரே வளர்ந்தது எப்படி?

சிவசேனை தோற்றம்

மராட்டிய மக்களின் வாழ்வும், வளமும் பறிக்கப்படுவதாக தொடர்ந்து பிரசாரம் செய்து வந்த பால் தாக்கரே, 1966 ஆம் ஆண்டு ஜூன் 19-ல் சிவசேனை என்கிற கட்சியை தொடங்கினார். மராட்டிய மன்னன் சிவாஜியின் படையாக அறிவித்துக்கொண்ட இக்கட்சி, குஜராத்தியர்கள், தென்னிந்தியர்களை, மார்வாடிகளை வந்தேறிகள் என்று கூறி மகராஷ்டிராவில் இருந்து அப்புறப்படுத்துவதாகவே இருந்தது. இதற்காக பால் தாக்கரே கையில் எடுத்த ஆயுதம் 'நாம் மராட்டியர்கள்..மண்ணின் மைந்தர்கள்' என்ற கொள்கை.

சாம்னா பத்திரிகை

மகாராஷ்டிரா மராட்டியர்களுகே என்ற கோஷத்துடன் பிராந்தியவாதத்தையும் கூடுதலாக தேசியவாதத்தையும் கையில் எடுத்திருந்த சிவசேனை பின்னாளில் இந்துத்துவத்தையும் சேர்த்துக் கொண்டது. சிவசேனையின் கொள்கைகளை பரப்ப சாம்னா என்ற தினப்பத்திரிகையை பால்தாக்ரே தொடங்கினார். இன்றும் இதுவே சிவசேனை கட்சியின் அதிகாரப்பூர்வ பத்திரிகையாக இருந்து வருகிறது.

தீவிரமான இந்துத்துவா கொள்கை

1992-ல் பாபர் மசூதி இடிக்கப்பட்ட பின் நாடு முழுவதும் மதக்கலவரங்கள் வெடித்தன. இதன் விளைவாக 1993ல் மும்பையில் பல இடங்களில் குண்டு வெடித்தது. இதையே சந்தர்ப்பமாக வைத்து, முஸ்லீம்களுக்கு எதிராகக் கலவரத்தைத் தூண்டும் விதமாக பால் தாக்கரே பேசினார். இந்தியாவை இந்துக்களின் ராஜ்ஜியம் என்று அழைக்கத் தொடங்குமாறு வற்புறுத்திய பால் தாக்கரே, இந்து மதம் மட்டுமே இந்தியாவில் மதிக்கப்பட வேண்டும் என்று சூளுரைத்தார்.

தேர்தல் அரசியல்

இந்துத்துவா கொள்கைகளை முன்னெடுத்து சிவசேனை கட்சியை வளர்த்த பால் தாக்கரே, பாஜகவுடன் கூட்டணி அமைத்து பெரும் வெற்றி கண்டார். 1995 சட்டமன்றத் தேர்தலில் சிவசேனை 73 இடங்களையும், பாஜக 65 தொகுதிகளையும் வென்று கூட்டணி ஆட்சி அமைத்தன. சிவசேனையின் தலைவராக இருந்தாலும் பால் தாக்கரே முதல்வராகவில்லை, அவர் ஆட்சியதிகாரத்துக்கு வெளியில் இருந்து செல்வாக்கு செலுத்துபவராகவே தொடர்ந்தார்.

தன் வாழ்நாளில் இறுதிவரை மண்ணின் மைந்தர்கள் மராட்டியர்கள், இந்துத்துவா என்ற கொள்ளையில் இருந்து பின்வாங்காமல் மறைந்த பால் தாக்கரேவின் பிறந்த தினம் இன்று..!