Sushil Kumar Modi dies: பீகார் முன்னாள் துணை முதல்வர் சுஷில் குமார் மோடி காலமானார்-கண்கலங்கிய மத்திய அமைச்சர்!
Sushil Kumar Modi: ஏப்ரல் மாதம், சுஷில் மோடி தனக்கு புற்றுநோய் இருப்பது கண்டறியப்பட்டதாகவும், 2024 மக்களவைத் தேர்தலுக்கான கட்சியின் பிரச்சாரத்தில் பங்கேற்கப் போவதில்லை என்றும் தெரிவித்திருந்தார் என்பது குறிப்பிடத்தக்கது.
பீகார் முன்னாள் துணை முதல்வரும், பாஜக மூத்த தலைவருமான சுஷில் குமார் மோடி உடல்நலக்குறைவால் காலமானார். அவருக்கு வயது 72. பிரதமர் மோடி முதல் பல முக்கியத் தலைவர்கள் இவரது மறைவுக்கு இரங்கல் தெரிவித்துள்ளனர்.
ஏப்ரல் மாதம், மோடி ஆறு மாதங்களுக்கு முன்பு தனக்கு புற்றுநோய் இருப்பது கண்டறியப்பட்டதாகவும், 2024 மக்களவைத் தேர்தலுக்கான கட்சியின் பிரச்சாரத்தில் பங்கேற்கப் போவதில்லை என்றும் தெரிவித்தார்.
72 வயதான சுஷில் குமார் மோடி, மாநிலத்திற்கான அதன் நட்சத்திர பிரச்சாரகர்களில் ஒருவராகவும், அதன் தேர்தல் அறிக்கை குழுவின் உறுப்பினராகவும் பாஜகவால் பெயரிடப்பட்டார்.
புற்றுநோய் பாதிப்பு
"நான் கடந்த ஆறு மாதங்களாக புற்றுநோயுடன் போராடி வருகிறேன். இப்போது, அதைப் பற்றி மக்களுக்கு தெரிவிக்க வேண்டிய நேரம் வந்துவிட்டது என்று நான் உணர்கிறேன். லோக்சபா தேர்தலுக்கு என்னால் எதுவும் செய்ய முடியாது.
நான் பிரதமர் நரேந்திர மோடியிடம் அனைத்தையும் கூறிவிட்டேன். நான் எப்போதும் நாட்டிற்கும், பீகாருக்கும், கட்சிக்கும் நன்றியுடனும் அர்ப்பணிப்புடனும் இருப்பேன்." என்று குறிப்பிட்டிருந்தார்.
மூன்று தசாப்தங்களாக நீடித்த அரசியல் வாழ்க்கையில், சுஷில் குமார் மோடி எம்.எல்.ஏ, எம்.எல்.சி, மக்களவை உறுப்பினர் மற்றும் மாநிலங்களவை எம்.பி. 2005 முதல் 2013 வரையிலும், 2017 முதல் 2020 வரையிலும் பீகார் மாநிலத்தின் துணை முதல்வராக பதவி வகித்துள்ளார்.
அரசியல் வாழ்க்கை
சுஷில் மோடியின் அரசியல் வாழ்க்கை பாட்னா பல்கலைக்கழகத்தில் அவரது மாணவ நாட்களில் தொடங்கியது. 1973 இல் அதன் மாணவர் சங்கத்தின் பொதுச் செயலாளரானார்.
1990 ஆம் ஆண்டில் பாட்னா மத்திய தொகுதியில் இருந்து முதல் முறையாக எம்.எல்.ஏ ஆனார், மேலும் பாஜக சட்டமன்றக் கட்சியின் தலைமை கொறடாவாக நியமிக்கப்பட்டார். 1996 முதல் 2004 வரை மாநில சட்டமன்றத்தில் எதிர்க்கட்சித் தலைவராக இருந்தார். 2004-ம் ஆண்டு பாகல்பூர் தொகுதியில் இருந்து மக்களவை உறுப்பினரானார்.
2005 ஆம் ஆண்டில், அவர் தனது மக்களவை உறுப்பினர் பதவியை துறந்து சட்டமன்ற மேலவை உறுப்பினரானார், அதைத் தொடர்ந்து அவர் துணை முதல்வரானார், நிதீஷ் குமார் முதல்வராக இருந்தார்.
2020 ஆம் ஆண்டில் மாநிலங்களவைக்கு தேர்ந்தெடுக்கப்பட்ட சுஷில் மோடி இந்த ஆண்டின் தொடக்கத்தில் ஓய்வு பெற்றார்.
இதனிடையே, பாஜக மூத்த தலைவரும், பீகார் முன்னாள் துணை முதல்வருமான சுஷில் குமார் மோடி புற்றுநோயுடன் போராடி திங்கள்கிழமை இரவு காலமானதை நினைவு கூர்ந்தபோது மத்திய அமைச்சர் அஸ்வினி குமார் சவுபே செவ்வாய்க்கிழமை உணர்ச்சிவசப்பட்டு கண்கலங்கினார்.
72 வயதான சுஷில் குமார் மோடி டெல்லி எய்ம்ஸ் மருத்துவமனையில் தீவிர சிகிச்சை பிரிவில் அனுமதிக்கப்பட்டார்.
"நான் என் சகோதரனை இழந்துவிட்டேன்... அவர் என் நண்பர். இதுபோன்ற மோசமான நாளை எதிர்கொள்ள வேண்டியிருக்கும் என்று நான் ஒருபோதும் நினைத்ததில்லை" என்று அஸ்வினி சௌபே செய்தி நிறுவனங்களால் பகிரப்பட்ட வீடியோ செய்தியில் அழுதார்.
"சுஷில் குமார் மோடி ஜி எனது நண்பர் மட்டுமல்ல, அவர் எனது குடும்பம். என்னால் அதை விளக்க முடியாது. அவர் எப்போதும் என்னுடன் இருந்தார், அவர் எப்போதும் எனக்கு ஆதரவளித்தார், எனக்குத் தேவைப்படும் போதெல்லாம் எனக்கு ஆலோசனைகளை வழங்கினார். சில சமயங்களில் நானும் அவரைத் திட்டுவேன், ஆனால் அவர் ஒருபோதும் மோசமாக உணர்ந்ததில்லை. சுஷில் மோடி ஜி மிகவும் கண்ணியமான தலைவர். தனது கட்சிக்கு, பாஜகவுக்கு அர்ப்பணிப்புள்ள அத்தகைய தலைவரை நான் ஒருபோதும் கண்டதில்லை" என்று மத்திய அமைச்சர் வீடியோவில் கூறினார்.
