டெல்லி தேர்தல் முடிவுகள்: அரவிந்த் கெஜ்ரிவால் தோல்வி! பல ஆம் ஆத்மி தலைவர்களும் தோல்வி முகம்!

அரவிந்த் கெஜ்ரிவாலின் அரசியல் பின்னணி

ஆகஸ்ட் 16, 1968 அன்று ஹரியானாவில் பிறந்த அரவிந்த் கெஜ்ரிவால், இந்திய வருவாய் சேவை பணியில் இருந்தவர். ஐஐடி கரக்பூரில் இயந்திரப் பொறியியல் படித்தார். தகவல் அறியும் உரிமைச் சட்டத்தின் செயற்பாட்டாளராக செயல்பட்ட அவருக்கு 2006 ஆம் ஆண்டில் ரமோன் மகசேசே விருது கிடைத்தது. அன்னா அசாராவின் ஊழல் எதிர்ப்பு இயக்கத்தில் இருந்த கெஜ்ரிவால் 2012ஆம் ஆண்டு ஆம் ஆத்மி என்ற கட்சியை தொடங்கினார்.

டெல்லி அரசியல்

2013 ஆம் ஆண்டில், அரவிந்த் கெஜ்ரிவால் மூன்று முறை முதல்வராக இருந்த காங்கிரஸின் ஷீலா தீட்சித்தை தோற்கடித்து ஆட்சியை பிடித்தார். 49 நாட்களுக்குப் பிறகு தனது பதவியை அவர் ராஜினாமா செய்தார். ஆனால் அவர் 2015 ஆம் ஆண்டு நடந்த தேர்தலில் மொத்தமுள்ள 70 இடங்களில் 67 இடங்களை வென்று கெஜ்ரிவால் ஆட்சி அமைத்தார். 2020ஆம் ஆண்டில் 62 இடங்களைப் பெற்று மீண்டும் முதலமைச்சர் ஆனார். இலவச மின்சாரம், சிறந்த பள்ளிகள், இலவச மருத்துவமனைகள் உள்ளிட்ட திட்டங்கள் டெல்லி மக்களின் ஆதரவை பெற்றுத் தந்தது.

டெல்லியின் மதுபானக் கொள்கையில் ஊழல் நடந்ததாகக் கூறி கடந்த ஆண்டு மார்ச் மாதம் கெஜ்ரிவால் கைது செய்யப்பட்டார். ஆம் ஆத்மி கட்சி இதை ஒரு அரசியல் சதி என்று கூறியது. ஆறு மாதங்கள் சிறையில் கழித்த பிறகு, உச்ச நீதிமன்றம் அவருக்கு ஜாமீன் வழங்கியது. சில நாட்களுக்குப் பிறகு, அவர் ராஜினாமா செய்து, கல்வி அமைச்சர் அதிஷியிடம் முதலமைச்சர் பதவியை ஒப்படைத்த்தார்.