Prajwal Revanna: பாலியல் வீடியோ விவகாரம்! தூக்க ரெடியான போலீஸ்! முன் ஜாமீன் கேட்டு பிரஜ்வல் ரேவண்ணா மனு!

கர்நாடகாவை உலுக்கிய பாலியல் வீடியோ 

தன் வீட்டில் வேலை செய்யும் பெண்கள் உட்பட பல பெண்களை பாலியல் ரீதியாக துன்புறுத்தியதாக ஹாசன் தொகுதி எம்பியான பிரஜ்வல் ரேவண்ணா மீது புகார்கள் எழுந்ததுடன், அது தொடர்பான வீடியோக்களும் பரவியது. 

பெண்களை பாலியல் ரீதியாக துன்புருத்திய புகார்கள் தொடர்பாக அவர் மீது மூன்று காவல் நிலையங்களில் வழக்குகள் பதிவு செய்யப்பட்டுள்ளன.

பிரஜ்வல் ரேவண்ணா வெளியிட்ட வீடியோ

அவர் வெளிநாட்டில் தலைமறைவாக இருக்கும் நிலையில், நேற்று முன் தினம் அவர் வெளியிட்டுள்ள வீடியோவில். பல பெண்களை பாலியல் வன்கொடுமை செய்ததாக குற்றச்சாட்டுகளை எதிர்கொண்டுள்ள ஹாசன் மக்களவை தொகுதி எம்.பி பிரஜ்வல் ரேவண்ணா, நாட்டை விட்டு வெளியேறி சரியாக ஒரு மாதத்திற்குப் பிறகு, வரும் மே 31 ஆம் தேதி தனக்கு எதிரான வழக்குகளை விசாரிக்கும் சிறப்பு புலனாய்வுக் குழு முன் ஆஜராகப் போவதாகக் கூறி இருந்தார். 

தாய், தந்தை, தாத்தாவிடம் மன்னிப்புக் கோரினார்

அந்த வீடியோவில் “ முதலில் தாய், தந்தை, தாத்தாவிடம் மன்னிப்புக் கேட்டுக் கொள்கிறேன். நான் இருக்கும் இடத்தை தெளிவுபடுத்தவே இந்த வீடியோவை வெளியிடுகிறேன். லோக்சபா தேர்தல் முடிந்ததும், பல்வேறு காரணங்களுக்காக என் மீது வழக்குகள் பதிவு செய்யப்பட்டு, எஸ்ஐடி அமைக்கப்பட்டது. எனது வெளிநாட்டுப் பயணத்திற்கும் இந்த வழக்குகளுக்கும் எந்தத் தொடர்பும் இல்லை. இது முன்கூட்டியே திட்டமிடப்பட்ட பயணம். எஸ்ஐடி எனக்கு நோட்டீஸ் கொடுத்து அதற்கு என் வழக்கறிஞர் மூலம் பதில் அளித்ததை மட்டுமே நான் அறிந்தேன்.

எனக்கு எதிராக வதந்தி பரப்பப்பட்டது

“ராகுல் காந்தி உள்ளிட்ட காங்கிரஸ் தலைவர்கள் எனக்கு எதிராக வதந்திகளைப் பரப்பிய பிறகு, நான் மன உளைச்சலுக்கு ஆளானேன், நான் என்னைத் தனிமைப்படுத்திக் கொண்டேன். எனது வாழ்க்கையை முடிக்க அரசியல் சதி நடக்கிறது, அதை நான் எதிர்கொள்வேன்” என்று பிரஜ்வல் ரேவண்ணா கூறினார்.

என் மீது நம்பிக்கை வையுங்கள்

கடவுளின், மக்களின், குடும்பத்தினரின் ஆசீர்வாதம் என் மீது இருக்கட்டும். மே 31 வெள்ளிக்கிழமை கண்டிப்பாக சிறப்பு புலனாய்வுக் குழுவின் முன் ஆஜராவேன். வந்த பிறகு இதற்கெல்லாம் முற்றுப்புள்ளி வைக்க முயல்கிறேன். என் மீது நம்பிக்கை வையுங்கள்" என்றும் அந்த வீடியோவில் ரேவண்ணா கூறி இருந்தார். 

இந்தியா திரும்பும் ரேவண்ணா

கடந்த மே மாதம் 27ஆம் தேதி முதல் வெளிநாட்டில் தலைமறைவாக இருக்கும் பிரஜ்வல் ரேவண்ணா நாளை மறுநாள் அதிகாலையில் இந்தியா வர உள்ள நிலையில், பெங்களூரு மக்கள் பிரதிநிதிகளுக்கான சிறப்பு நீதிமன்றத்தில் முன் ஜாமீன் கேட்டு ரேவண்ணா சார்பில் மனுத்தாக்கல் செய்யப்பட்டு உள்ளது. 

ஜெர்மனியின் முனிச்சில் இருந்து பெங்களூருக்கு விமான டிக்கெட் முன்பதிவு செய்யப்பட்டு உள்ள நிலையில், வரும் மே 31ஆம் தேதி வெள்ளிக்கிழமை அதிகாலையில் கெம்பேகவுடா சர்வதேச விமான நிலையத்தை பிரஜ்வல் ரேவண்ணா அடைய வாய்ப்புள்ளதாக பிடிஐ செய்தி நிறுவனம் தெரிவித்து உள்ளது.

விமான நிலையத்திலேயே கைது செய்ய் திட்டம் 

இந்த நிலையில் பிரஜ்வல் ரேவண்ணாவை பெங்களூரு விமான நிலையத்திலேயே கைது செய்ய கர்நாடக சிறப்பு புலனாய்வு குழுவினர் திட்டமிட்டு உள்ளனர். இந்த கைதை தவிர்பதற்காக முன் ஜாமீன் மனுவை பிரஜ்வல் ரேவண்ணா நீதிமன்றத்தில் தாக்கல் செய்து உள்ளார்.