உளுந்து பொடி சாதம்; உங்கள் வீட்டு பெண் குழந்தைகளின் எலும்புகளை வலுப்படுத்தும்! சூப்பர் லன்ச் பாக்ஸ் ரெசிபி!

பொடி செய்ய தேவையான பொருட்கள்

தேங்காய் துருவல் – ஒரு கப்

(இதை ட்ரையாக நல்ல ஈரப்பதம் போகும் வரை வறுத்து தனியாக வைத்துக்கொள்ளவேண்டும்)

எண்ணெய் – ஒரு ஸ்பூன்

வர மல்லி விதைகள் – ஒரு டேபிள் ஸ்பூன்

கருப்பு உளுந்து – 2 டேபிள் ஸ்பூன்

வர மிளகாய் – 5 (உங்கள் கார அளவுக்கு ஏற்ப இதை அதிகம் அல்லது குறைவாகப் பயன்படுத்திக்கொள்ளலாம்)

சீரகம் – அரை ஸ்பூன்

பெருங்காயம் – சிறிய கட்டி (தூளாக இருந்தால் கால் ஸ்பூன்)

புளி – சின்ன நெல்லிக்காய் அளவு (வறுக்கக்கூடாது)

உப்பு – தேவையான அளவு

பொடி செய்வது எப்படி?

ஒரு கடாயில் எண்ணெய் சேர்த்து வரமல்லியை முதல் வறுத்துக்கொள்ளவேண்டும். சிறிது நேரத்திற்குப் பின் அதனுடன் கருப்பு உளுந்து சேர்த்து வறுக்கவேண்டும். அடுத்து வர மிளகாயை சேர்த்துக்கொள்ளவேண்டும். கடைசியாக சீரகம், பெருங்காயம் இரண்டையும் சேர்த்து நன்றாக வாசம் வரும் வரை வறுத்து வறுத்து வைத்துள்ள தேங்காய் துருவலில் சேர்த்து நன்றாக ஆறவைத்துவிடவேண்டும்.

ஆறிய பின் காய்ந்த மிக்ஸி ஜாரில் வறுத்த பொருட்கள், புளி மற்றும் உப்பு சேர்த்து பொடித்துக்கொள்ளவேண்டும். இதை ஒரு காற்றுப் புகாத டப்பாவில் அடைத்து வைத்துக்கொண்டால், ஃபிரிட்ஜில் வைத்து ஒரு மாதம் வரை பயன்படுத்தலாம். எனவே இந்தப்பொடியை தயாரித்து வைத்துவிட்டு, நீங்கள் அவ்வப்போது கலந்து லன்ச் பாக்ஸ்க்கு கொடுத்துவிடலாம். இது பெண் குழந்தைகளுக்கு மிகவும் நல்லது.

சாதம் செய்ய தேவையான பொருட்கள்

உதிரியான வடித்த சாதம் – ஒரு கப்

நெய் – ஒரு ஸ்பூன்

கடுகு – ஒரு ஸ்பூன்

உளுந்து – ஒரு ஸ்பூன்

சீரகம் – கால் ஸ்பூன்

வரமிளகாய் – 2

பச்சை மிளகாய் – 2

கறிவேப்பிலை – ஒரு கொத்து

பெரிய வெங்காயம் – 1 (பொடியாக நறுக்கியது)

தயார் செய்து வைத்துள்ள பொடி – 2 ஸ்பூன்

செய்முறை

சாதத்தை உதிரியாக வடித்து, தனியாக ஆறவைத்துக்கொள்ளவேண்டும்.

ஒரு கடாயில் எண்ணெய் சேர்த்து அது சூடானவுடன் கடுகு, உளுந்து, சீரகம், வரமிளகாய், பச்சை மிளகாய் (இரண்டையும் முழுதாக சேர்த்துக்கொள்ளவேண்டும்) கறிவேப்பிலை சேர்த்து தாளித்துக்கொள்ளவேண்டும்.

அடுத்து பொடியாக நறுக்கி வைத்துள்ள பெரிய வெங்காயத்தை பொன்னிறமாகும் வரை வறுத்துக்கொள்ளவேண்டும். தயார் செய்து வைத்துள்ள பொடியை சேர்த்து கிளறி, அதில் சாதத்தையும் சேர்த்து கிளறவேண்டும். கிளறி இறக்கினால் சூப்பர் சுவையான உளுந்துபொடி சாதம் தயார். தேவைப்பட்டால் கடலையை வறுத்து மேலே தூவிக்கொள்ளலாம். 

இதை உங்கள் வீட்டில் குழந்தைகள் முதல் பெரியவர்கள் வரை அனைவரும் விரும்பி சாப்பிடுவார்கள். ஒருமுறை ருசித்தால் மீண்டும் மீண்டும் சுவைக்கவேண்டும் என்ற எண்ணம் தோன்றும். இதை நீங்கள் உங்கள் குழந்தைகள் முதல் பெரியவர்கள் வரை அனைவருக்கும் லன்ச் பாக்ஸில் வைத்து கட்டிக்கொடுத்துவிடலாம்.

இது உங்கள் பெண் குழந்தைகளுக்குத் தேவையான எலும்பு ஆரோக்கியத்தைத் தரும். அவர்களுக்கு வைட்டமின்கள் மற்றும் மினரல்களைக் கொடுத்து, அவர்களின் ஆரோக்கியத்தை அதிகரிக்கும்.