மாங்காய் சாலட் : கோடையைக் கொண்டாடலாமா? பச்சை மாங்காயில் சுவையான சாலட்; எப்படி செய்வது என்று பாருங்கள்!
பச்சை மாங்காயில் சுவையான சாலட் செய்வது எப்படி என்று பாருங்கள். இதைச் செய்வது மிகவும் எளிது. ஆனால் சுவையோ அபாரமாக இருக்கும்.
கோடை துவங்கிவிட்டாலே வெயில் சுட்டெரிக்கும். ஆனால் அப்போது கிடைக்கும் மாங்காய்களையும், மாம்பழங்களின் சுவையை நினைத்து பார்க்கும்போது மகிழ்ச்சி ஏற்படும். மாங்காய் பிரியர்கள் அதில் என்னவெல்லாம் செய்ய முடியுமோ அதையெல்லாம் செய்து சாப்பிடவேண்டும் என்று துடிப்பார்கள். அந்த மாங்காயில் சாம்பார், ரசம், மோர், பச்சடி, பொரியல் என அந்தப் பட்டியல் நீண்டுகொண்டேதான் போகும். மேலும் மாதா ஊட்டாத சோற்றை மாங்காய் ஊட்டும் என்ற பழமொழியும் உண்டு. அது உண்மையும் ஆகும். மாங்காய் இருந்தால் எந்த சாதத்தையும் வழக்கத்தைவிட அதிகம் தான் எடுத்துக்கொள்வீர்கள்.
எதனுடன் வேண்டுமானாலும் தொட்டுக்கொண்டு சாப்பிடலாம். வெறும் பச்சை மாங்காயை நறுக்கிப்போட்டு, உப்பு போட்டு சாப்பிட்டாலே ஒரு தட்டு சோறு கூட எளிதில் காலியாகிவிடும். மாங்காய் இருக்கும்போது வேறு சைட் டிஷ்கள் எதுவும் தேவைப்படாது. அத்தனை சுவையான மாங்காயில் சாலட் செய்வது எப்படி என்று பாருங்கள்.
தேவையான பொருட்கள்
• பெரிய வெங்காயம் – 1 (பொடியாக நறுக்கியது)
• பச்சை மாங்காய் – 1 (தோல் சீவி பொடியாக நறுக்கியது)
• வெல்லம் – ஒரு ஸ்பூன்
• மிளகாய்த் தூள் – அரை ஸ்பூன்
• மல்லித்தழை – ஒரு டேபிள் ஸ்பூன்
• உப்பு – தேவையான அளவு
• வறுத்த சீரகத் தூள் – அரை ஸ்பூன்
செய்முறை
1. மாங்காயை கழுவி சுத்தம் செய்து, ஒரு வெள்ளைத் துணியால் துடைத்துவிட்டு, அதன் தோலை நீக்கவேண்டும். சிறு பொடியான துண்டுகளாக நறுக்கிக்கொள்ளவேண்டும்.
2. ஒரு பாத்திரத்தில் பொடியாக நறுக்கிய மாங்காய்த் துண்டுகள், பொடியாக நறுக்கிய வெங்காயம், உப்பு, மிளகாய்த் தூள், சீரகத் தூள் என அனைத்தையும் சேர்த்து நன்றாக கலந்துவிடவேண்டும்.
3. அடுத்து வெல்லம் சேர்த்து கலந்துகொள்ளவேண்டும். இதை சில நிமிடங்கள் அப்படியே ஊறவிடவேண்டும். இது ஊறி தண்ணீர் விடத் துவங்கும்போது, மல்லித்தழை தூவி அலங்கரிக்கவேண்டும். சூப்பர் சுவையான மாங்காய் சாலட் தயார்.
4. இதை அப்படியே எந்த ஒரு உணவுடனோ அல்லது மீல்ஸ் உடனோ பரிமாறலாம். இல்லாவிட்டால் பச்சையாகக் கூட சாப்பிடலாம்.
மாங்காய் பிரியர்களின் மனதை கொள்ளை கொள்ளும் இந்த பச்சடி. இதை ஒருமுறை ருசித்துவிட்டால் சீசன் முடியும் வரை உங்கள் வீட்டில் இந்த சாலட்தான் செய்வீர்கள். இப்போதெல்லாம் அனைத்து சீசனும் மாங்காய் கிடைக்கிறதே இதை எப்போது வேண்டுமானாலும் செய்ய முடியுமே என நீங்கள் நினைக்கலாம். ஆனால் கோடையில் கிடைக்கும் மாங்காய்க்கு உள்ள அந்த ருசி, வேறு எந்த சீசனில் கிடைக்கும் மாங்காயிலும் இருக்காது. இதை நீங்கள் பரிசோதித்துக்கூட பார்க்கலாம். சித்திரை முதல் ஆனி வரை கிடைக்கும் மாங்காய் மற்றும் மாம்பழங்களே அதிக சுவையைக் கொடுப்பவை. எனவே இந்த மாங்காய் சாலட்டை செய்து சாப்பிட்டு பாருங்கள்.
Priyadarshini R
டாபிக்ஸ்