Thinai Arisi Biryani: மகப்பேறில் முக்கியப்பங்கு வகிக்கும் தினை அரிசி.. இதனைக் கொண்டு காய்கறி பிரியாணி செய்வது எப்படி?

தினை அரிசி காய்கறி பிரியாணி செய்யத்தேவையான பொருட்கள்:

• தினை அரிசி - ஒரு டம்ளர்;
• எண்ணெய் - இரண்டு டேபிள் ஸ்பூன்;
• சோம்பு - அரை டீஸ்பூன்;
• லவங்கம், பட்டை, ஏலக்காய் - சிறிதளவு;
• பச்சை மிளகாய் - 4;
• வெங்காயம் - நடுத்தர அளவு - 2 நறுக்கியது;
• உப்பு - சிறிதளவு;
• இஞ்சி பூண்டு பேஸ்ட் - இரண்டு டீஸ்பூன்;
• தக்காளி - இரண்டு நறுக்கியது;
• பச்சை பட்டாணி - 50 கிராம் - (7 மணி நேரம் ஊறவைத்தது)
• பீன்ஸ் - 6;
• கேரட் - 2 ;
• குடை மிளகாய் - 2;
• புதினா - ஒரு பிடி;

தினை அரிசி காய்கறி பிரியாணி செய்முறை:

• முதலில் ஒரு டம்ளர் தினை அரிசியை எடுத்துக்கொண்டு, இரண்டு தடவை நீர் ஊற்றி அலசிக்கொள்ளவும்.
• ஒரு அடுப்பில் குக்கரை வைத்து சுடவைத்துவிட்டு, இரண்டு டேபிள் எண்ணெய் சேர்த்துக் கொள்ளவும். எண்ணெய் சூடானதும் அரை டீஸ்பூன் சோம்பு சேர்த்துக் கொள்ளவும். அதனுடன் மூன்று லவங்கம் சேர்க்கவும். பட்டை ஒரு துண்டு சேர்த்துக்கொள்ளவும்.
• அதன்பின் அதனுடன் இரண்டு ஏலக்காய் மற்றும் பிரியாணி இலை சேர்த்துக்கொள்ளலாம். மேலும், அதன் மேல் 4 பச்சை மிளகாய் மற்றும் இரண்டு நடுத்தர அளவு வெங்காயம் சேர்த்துக்கொள்ளலாம்.
• வெங்காயம் சேர்த்து நன்கு வதக்கிவிட்டதும் உப்பு சேர்த்து நன்கு பிரட்டிக்கொள்ளவும். பின்பு வெங்காயத்தினை பொன்னிறமாகும் வரை வதக்கிக்கொள்ளவும்.
• அடுத்து இரண்டு டீஸ்பூன் இஞ்சி பூண்டு பேஸ்ட் சேர்த்துக்கொள்ளவும். இஞ்சி பூண்டு பேஸ்ட்டின் பச்சை வாசம்போனபின், அதன்மேல் தக்காளியை சேர்த்துக்கொள்ளலாம்.
• அதன்பின் மஞ்சள் பொடி ஒரு டீஸ்பூன், கரம் மசாலா அரை டீஸ்பூன், முக்கால் டீஸ்பூன் தனி மிளகாய்ப்பொடி சேர்த்துக்கொள்ளலாம். பின் சுவைக்கேற்ப கூடுதல் மற்றும் குறையாக மசாலாவை சேர்த்துக்கொள்ளலாம். பின் மசாலாவை கலந்துவிடவும்.

பிரியாணி காய்கறிகளை இப்படி சேர்க்கவும்:

• இந்த மசாலா மீது 7 மணி நேரம் ஊறவைத்த 50 கிராம் பச்சைப் பட்டாணியை கலந்துவிடவும். அதன்பின், கேரட், பீன்ஸ், குடை மிளகாயைச் சேர்க்கவும். புதினா ஒரு பிடியைப் போட்டுவிடவும்.
• அடுத்து தினை அரிசி அளந்து வைத்த டம்ளரில் இரண்டரை டம்ளர் நீர் ஊற்றவும். ஒரு டம்ளர் தினை அரிசிக்கு இரண்டரை டம்ளர் நீர் ஊற்றினால் தான் நன்கு வெந்து வரும்.
• அதன்பின் நாம் நீர் ஊற்றி சுத்தம் செய்து வைத்திருக்கும் தினை அரிசியை, அந்த மசாலாவில் சேர்த்துக்கொள்ளலாம்.
• நன்கு கலந்தபின், உப்பு தேவைப்பட்டால், அந்தக் கலவையில் போடலாம்.
• இரண்டு விசில் குக்கரில் வரும் வரை அடுப்பில் வைக்கவும். அதன்பின், வாயு வெளியேறியதும் குக்கரை திறக்கலாம். இதன்மூலம் தினை அரிசி காய்கறி பிரியாணி சுவையாக ரெடி. அதன்மேல் புதினா இலைகளை சேர்த்துக்கொண்டு கிளறலாம்.

தினை அரிசியின் நன்மைகள்:

• தினையில் இரும்பு மற்றும் கால்சியம் கலந்து இருப்பதால், ஆண்கள் மற்றும் பெண்கள் இடையே இருக்கும் மலட்டுத்தன்மையை நீக்குகிறது. விந்தணுவில் இருக்கும் உயிரணுக்களின் எண்ணிக்கையை அதிகரிக்கிறது.
• நரம்புத்தளர்ச்சி குறைபாட்டை நீக்குகிறது.
• ரத்த சர்க்கரை அளவை சீராக்குகிறது.