வீட்டில் இருக்கும் குழந்தைகளுக்கு செஞ்சு கொடுக்க சூப்பர் ஸ்நாக்ஸ்! ஆரோக்கியமான எள்ளு லட்டு செய்வது எப்படி?
வீட்டில் விடுமுறையில் உள்ள குழந்தைகளுக்கு ஏதேனும் சுவவையான சிற்றுண்டிகளை நாம் செய்து கொடுத்துக் கொண்டிருக்க வேண்டும். இல்லையென்றால் வெளி உணவுகளை வாங்கித் தரச் சொல்லி அடம் பிடிப்பார்கள். இன்று குழந்தைகள் விரும்பும் சுவையில் எள்ளு லட்டு செய்வது எப்படி எனப் பார்க்கப் போகிறோம்.
பள்ளி செல்லும் குழந்தைகள் நீண்ட நாள் விடுமுறையில் வீட்டில் இருக்கிறார்கள். இந்த விடுமுறையில் தான் அவர்களை பல இடங்களுக்கு சுற்றுலா கொண்டு செல்ல வேண்டும் என நினைப்பார்கள். அதேபோல நண்பர்களுடன் சேர்ந்து நீண்ட நேரம் விளையாட வேண்டும் எனவும் நினைத்து இருப்பார்கள். முக்கியமாக சுற்றுலா விடுமுறை சமயத்தில் வீட்டில் எப்போதும் சிற்றுண்டிகள் இருந்து கொண்டே இருக்க வேண்டும். ஏனெனில் அவர்கள் மிகவும் அதிகமாக சிற்றுண்டி சாப்பிட விரும்புவார்கள். இந்த நிலையில் நாம் அடிக்கடி கடைகளில் விற்கப்படும் உணவுகளை வாங்கி கொடுத்தால் அது அவர்களது உடலுக்கு சேராது. சில சமயங்களில் செரிமான பிரச்சனைகளை ஏற்படுத்தலாம். இதனை தவிர்க்க நாமே வீட்டில் செய்யக்கூடிய உணவு வகைகளை கொடுக்க வேண்டும் அவர்கள் விரும்பும் வகையான இனிப்பு உணவுகளை அதிகம் செய்து கொடுத்தால் மிகவும் மகிழ்ச்சியுடன் சாப்பிடுவார்கள். அந்த வகையில் இன்று நாம் குழந்தைகளுக்கு மிகவும் பிடித்த வகையில் எளிமையாக எள்ளு லட்டு எப்படி செய்வது என்பதை இங்கு பார்க்க போகிறோம்.
தேவையான பொருட்கள்
ஒரு கப் வெள்ளை எள்ளு
அரை கப் வறுத்த வேர்க்கடலை
2 கப் துருவிய தேங்காய்
1 டீஸ்பூன் ஏலக்காய்த் தூள்
முக்கால் கப் வெல்லம்
2 டேபிள்ஸ்பூன் நெய்
செய்முறை
முதலில் ஒரு கடாயை அடுப்பில் வைத்து அதில் எள்ளை சேர்த்து பொன்னிறமாக மாறும் வரை நன்றாக வறுக்க வேண்டும். பின் அதில் வேர்க்கடலையை சேர்த்துக் மீண்டும் நன்றாக வறுக்க வேண்டும். இவை இரண்டும் பொன்னிறமாக மாறியதும் துருவிய தேங்காயை போட்டு வறுக்க வேண்டும். இவை அனைத்தையும் தனித் தனியாக வறுத்து எடுக்கவும். பின்பு அனைத்தையும் நன்கு ஆற வைத்து , பின்பு ஒரு மிக்ஸியில் வறுத்த எள்ளு மற்றும் வறுத்த வேர்க்கடலையை சேர்த்து கொரகொரப்பாக இருக்குமாறு அரைக்க வேண்டும்.
மேலும் இதில் பிறகு நாம் வறுத்து வைத்திருந்த கொப்பரை தேங்காய் சேர்த்து அரைக்கவும், பின் துருவிய வெல்லம் மற்றும் ஏலக்காய் தூள் சேர்த்து கொரகொரப்பாக அரைக்கவும். இவ்வாறு அடுத்து அரைத்த எள் கலவையை ஒரு அகன்ற பாத்திரத்தில் வைக்கவும். இப்பொழுது அதில் சிறிது சிறிதாக நெய் சேர்த்து பிசைந்து சிறு சிறு உருண்டைகளாக உருட்டவும். இப்பொழுது சுவையான எள்ளு லட்டு தயார். இதனை வீட்டில் உள்ள குழந்தைகள் விரும்பி சாப்பிடுவார்கள். நீங்களும் உங்களது வீட்டில் உள்ள குழந்தைகளுக்கு செய்து கொடுத்து மகிழுங்கள். இந்த லட்டு பதின்ம வயது பெண் பிள்ளைகளுக்கு மிகவும் ஆரோக்கியமான நன்மைகளை வழங்குகிறது. அடிக்கடி செய்து கொடுப்பதை வழக்கமாக்குங்கள்.
Suguna Devi P
டாபிக்ஸ்