Cooking Tips: ‘கமகமனு.. பாய் வீட்டு நெய் சோறு..’ குக்கர் போதும்.. எளிய செய்முறை விளக்கம் இதோ!

தேவையான பொருட்கள் என்ன?

• பாஸ்மதி அரிசி அரை கிலோ

(இருமுறை கழுவிய பின், அரை மணி நேரம் ஊற வைத்து எடுத்துக் கொள்ளவும்)

• இஞ்சி பூண்டு பேஸ்ட்- அரை ஸ்பூன்
• நெய்- 75 மி.லி.,
• முந்திரி பருப்பு- தேவைக்கு ஏற்பட
• வெங்காயம்- 2 வெட்டியது
• பச்சை மிளகாய்- 2
• ஏலக்காய்-4
• சோம்பு- அரை ஸ்பூன்
• கிராம்பு- 5
• அண்ணாசிப்பூ-2
• பட்டைத்துண்டு- 4
• எண்ணைய், உப்பு, தண்ணீர்- தேவைக்கு ஏற்ப

செய்முறை விளக்கம்:

குக்கர் சூடாக்கி 30 மில்லி கிராம் நெய் மற்றும் 50 மில்லி கிராம் எண்ணெய் ஊற்றிக் கொள்ளவும். நெய் மட்டுமே ஊற்றினால் திகட்ட ஆரம்பித்துவிடும். அதனால் எண்ணெய் சேர்ப்பது நல்லது. தேங்காய் எண்ணெய் சேர்த்தால் இன்னும் கமகமவென இருக்கும். நெய், எண்ணெய் காய்ந்த பின், பட்டை, கிராம்பு, ஏலக்காய், சோம்பு, அண்ணாச்சிபூ ஆகியவற்றை அதில் கொட்டவும். லேசாக அவற்றை வதக்கவும். அதன் பின் முந்திரி பருப்பை சேர்த்து வதக்கவும். முந்திரி நிறம் மாறியதும், வெட்டிய வெங்காயத்தை சேர்த்து வதக்கவும். வெங்காயம் 3 நிமிடம் வதக்குவது நல்லது. அதன் பின் பச்சை மிளகாயை நறுக்காமல் அப்படியே அதில் போடவும்.

புதினா, கொத்துமல்லி இந்த செய்முறைக்கு தேவையில்லை. அவை, நெய் சோற்றின் சுவையை மாற்றிவிடும். வெங்காயம், முந்திரி வதங்கியதும், அரை ஸ்பூன் இஞ்சி, பூண்டு பேஸ்ட்டை போடவும். பிரியாணி போல, இதற்கு பெரிய அளவில் மசாலாவும், பொருட்களும் தேவைப்படாது. ஆனால், பிரியாணியை விட அதீத சுவையோடு இருக்கும். அடுப்பை குறைத்துவிட்டு, 4 டம்ளர் அரிசிக்கு 5 டம்ளர் தண்ணீர் வீதம், குக்கரில் முதலில் தண்ணீரை ஊற்றவும்.

வதக்கிய பொருட்களுடன் தண்ணீர் சேரும். அரிசியை முன்பே ஊற வைத்திருக்கிறோம் என்பதால், தண்ணீர் குறைவாக தான் சேர்க்க வேண்டும். இப்போது அரிசிக்கு தேவையான ஊப்பை குக்கரில் போடவும். தண்ணீர் ஒரு கொதி வந்த பின், அரிசியை அதில் போடவும். அதுவரை குக்கர் மூடியை தலைகீழாக போட்டு மூடி வைக்கவும்.

இது தான் முக்கியமான தருணம்

மீதமுள்ள நெய்யை அரிசியில் ஊற்றவும். இப்போது குக்கரை மூடி வைத்து வைத்து, ஒரு விசில் வந்ததும், அடுப்பின் வேகத்தை முற்றிலுமாக குறைத்துவிடவும். 2 நிமிடம் அப்படியே விட்டுவிடவும். அதன் பிறகு அடுப்பை அணைத்துவிடவும். அதுவாக ஆவி அடங்கும் வரை காத்திருக்கவும். அதற்கு முன் திறந்துவிட வேண்டாம். அந்த வேக்காடு உணவுக்கு தேவைப்படும்.

விசிலை சோதித்துப் பார்த்த பின், குக்கரை திறந்து பார்த்தால், நீங்களே மயங்கிப் போவீர்கள். அந்த அளவிற்கு சாதம் சிறப்பாக வந்திருக்கும். தண்ணீர் அளவை சரியாக வைத்தீர்கள் என்றால், அடி பிடிக்காமல் சுவையான ‘நெய் சோறு’ ரெடியாகிவிடும். இப்போது உங்கள் அன்புக்குரியவர்களுக்கு பிரியத்துடன் சேர்த்து பரிமாறவும் சைடுடிஷ் எதுவும் இல்லாமல், எப்படியே நீங்கள் சாப்பிடலாம்.

அருசுவை உணவுகளின் குறிப்புகளை நீங்களும் அறிந்து கொள்ள, இந்துஸ்தான் டைம்ஸ் தமிழ் உடன் இணைந்திருங்கள். சமூக வலைதள பக்கங்களிலும் எங்களை தொடரலாம்.