Diabetes Care : உங்களுக்கு டைப் 2 சர்க்கரை நோய் வாய்ப்பு உள்ளதா? முன்கூட்டியே அறிய முடியும்? இது எப்படி சாத்தியம்?

ஒரு மணி நேரம் கழித்து ரத்தத்தில் குளுக்கோஸின் அளவு 155 மி.கிராம்/100 மில்லி ரத்தம் (8.6 mmol/லிட்டர்) அதிகமாக இருந்தால் அதை சர்க்கரை நோய்க்கு முந்தைய நிலை Pre-diabetes என முன்னரும், தற்போது அதை Intermediate Hyperglycemia என்றும் உலகளவில் பெயரிடப்பட்டுள்ளது.

ஒரு மணி நேரம் கழித்து ரத்தத்தில் குளுக்கோஸின் அளவு 209 மி.கிராம்/100 மில்லி ரத்தம் அதிகமாக இருந்தால் சர்க்கரை நோய் வகை 2 என உறுதிபடுத்தலாம்.

மேற்சொன்ன அளவில் உள்ளவர்களுக்கு வெறும் வயிற்றில் 2 மணி நேரம் கழித்து ரத்தத்தில் குளுக்கோஸின் அளவு வழக்கமான அளவில் இருந்தாலும் அவர்களுக்கு சர்க்கரை நோய் வகை 2 வரும் வாய்ப்பு அதிகம் என கண்டறியப்பட்டுள்ளது.

இதற்கு முன்னர் வெறும் வயிற்றில் குளுக்கோஸின் அளவு 120 மி.கி. அதிகமாக 2 முறை இருப்பது உணவிற்குப் பின் 2 மணி நேரம் கழித்து குளுக்கோஸின் அளவு 200 மி.கி அதிகமாக 2 முறை இருந்தால் அதை சர்க்கரைநோய் வகை 2 இருப்பதாக வகைப்படுத்துவர்.

HbA1c அளவை வைத்தும் சர்க்கரை நோய் இருப்பதை உறுதிபடுத்தலாம்.

சர்க்கரை நோய் வருவதை முன்கூட்டியே அறிந்தால் அவர்களுக்கு கூடுதல் கண்காணிப்பு கொடுத்து அவர்களுக்கு தகுந்த சிகிச்சை அளிப்பதின் மூலம் நோயால் ஏற்படும் பாதிப்புகளை கட்டுப்படுத்த வாய்ப்புள்ளது என்பதால், சர்க்கரை நோய் வருவதை முன்கூட்டியே துல்லியமாகக் கணிப்பது அவசியமாகிறது.

தற்போது, 2 மணிக்குப் பின் அளக்கப்படும் குளுக்கோஸின் அளவை விட ஒரு மணி நேரத்திற்குப் பின் அளவிடப்படுவது (155 மி.கி./100 மில்லி ரத்தம் அதிகம்) சர்க்கரை நோய் வரும் வாய்ப்பை மிகவும் துல்லியமாகக் கணிக்க முடியும் என ஆய்வில் தெரியவந்துள்ளது.

15 நாடுகளைச் சேர்ந்த 22 நிபுணர்கள் இந்த ஆய்வு முடிவுகளை 17th International Conference on Advanced Technologies,Treatments for Diabetes in Florence, Italy மாநாட்டிலும், "Diabetes Research and Clinical Practice" என்ற மருத்துவ ஆய்வு பத்திரிக்கையில் இணையதளத்திலும் வெளியிட்டு, சர்க்கரை நோயை ஆரம்பத்தில் கண்டறிந்து தகுந்த சிகிச்சை அளிப்பதை வலியுறுத்தியுள்ளனர்.

சென்னையைச் சேர்ந்த Dr.மோகன் (Chairman, Madras Diabetes Research Foundation) ‘1980 வரை தமது ஆய்வுகளில் ஒரு மணி நேரத்திற்குப் பின் குளுக்கோஸின் அளவை ரத்தத்தில் அளந்ததாகவும், காலப்போக்கில் அது கைவிடப்பட்டது என்றும் தெரிவித்ததோடு, தமது ஆய்வு முடிவுகளும், 75 கிராம் குளுக்கோஸை வாய் வழியாக கொடுத்த பின், ஒரு மணி நேரம் கழித்து ரத்தத்தில் குளுக்கோஸின் அளவு 155 மி.கி./100 மில்லி ரத்தம் அதிகமாக இருந்தால், பின்னர் அவர்களுக்கு சர்க்கரை நோய் வகை 2 வரும் வாய்ப்பு அதிகம் இருப்பதை உறுதிபடுத்துவதாக’ தெரிவித்துள்ளார்.

எனவே, தற்போது ஒரு மணி நேரம் கழித்து அளக்கப்படும் குளுக்கோஸ் அளவு துல்லியமான முடிவுகளை தெரிவிப்பதாக சர்வதேச அளவில் ஏற்றுக்கொள்ளப்பட்டுள்ளது.

உணவு அல்லது குளுக்கோசுக்குப் பின் ஒரு மணி நேரம் கழித்தே கணையத்தில் இன்சுலினை சுரக்கும் பீட்டா செல்களின் செயல்பாடு அதிகமாக இருப்பதால், அந்த நேரத்தில் குளுக்கோஸ் அளவிடப்படுவதே பீட்டா செல்களின் பாதிப்பை துல்லியாக அறிய முடியும் என்பதை நிபுணர்கள் ஏற்றுக்கொண்டுள்ளனர்.

இருப்பினும், சிறுதானியங்களை அதிகம் உட்கொள்வது, அதிக சிறுதுகள்களாக மாற்றப்பட்ட (Processed Carbohydrates) மாவுச்சத்து பொருட்களை உணவில் தவிர்ப்பது சர்க்கரை நோய் பாதிப்பை தவிர்க்கும் என்பதால், அதையும் நோய்தடுப்புத் திட்டத்தில் அரசு அல்லது சுகாதாரத்துறை, கணக்கில் கொள்ள வேண்டும்.

உடற்பயிற்சி, சரியான அல்லது தேவையான தூக்கமும் (7-8 மணி நேரம்) சர்க்கரைநோய் தடுப்பில் முக்கியமானவை.

நன்றி – மருத்துவர். புகழேந்தி.