விவசாயிகளுக்கு ராஜவிருந்து.. ஓடோடி வந்த விஜய்.. நிகழ்வுக்குப்பின் கிரைம் லிஸ்டில் இல்லாத மா.செ.வை தேர்வு செய்யும் விஜய்

தமிழக வெற்றிக்கழக உறுப்பினர் சேர்க்கை:

அதனைத்தொடர்ந்து தமிழக வெற்றிக் கழகத்தில், உறுப்பினர் சேர்க்கையில் 2 கோடி உறுப்பினர்களை சேர்க்க இலக்கு வைத்து வேலை செய்துவருகின்றனர், அக்கட்சி நிர்வாகிகள். மேலும், உறுப்பினர் சேர்க்கைக்காக , ’’தமிழக வெற்றிக் கழகம்’’ என்னும் செயலி ஒன்று அறிமுகப்படுத்தப்பட்டது. அதில் தமிழக வெற்றிக் கழகம், தனக்கான உறுப்பினர் சேர்க்கையை கடந்த மார்ச் 8ஆம் தேதி தொடங்கியது.

தொடங்கிய மூன்றே நாட்களில் அந்த கட்சியில் 50 லட்சம் பேர் உறுப்பினர்களாக இணைந்துள்ளனர். தவிர, தமிழக வெற்றிக் கழக நிர்வாகிகள் உறுப்பினர்கள் சேர்க்கையில் தீவிரமாக செயல்பட்டு வருகின்றனர்.

இந்நிலையில் தமிழக வெற்றிக் கழகத்தின் முதல் மாநாடு கடந்த அக்டோபர் மாதம் 27ஆம் தேதி நடந்தது.

அதில் பேசிய விஜய் திராவிடமும் தமிழ்த்தேசியமும் தனது இரு கண்கள் என்றும், பிறப்பால் அனைவரும் சமம் எனவும், நம்முடன் பங்கு சேரும் கூட்டணி கட்சியினருக்கு ஆட்சி அதிகாரத்தில் பங்கு தருவோம் எனவும், இறை நம்பிக்கைக்கு எதிரானவர்கள் தாங்கள் அல்ல என்றும் தெரிவித்தார். த.வெக தலைவர் விஜய்யின் பேச்சு அரசியல் அரங்கில் அதிர்வலைகளை உருவாக்கியது.

விவசாயிகளுக்கு விருந்து அளித்த விஜய்:

இந்நிலையில் தமிழக வெற்றிக் கழகத்தின் முதல் மாநாடு விக்கிரவாண்டியில் உள்ள வி.சாலையில் நடக்க நிலம் வழங்கிய விவசாயிகளுக்கு, சென்னை பனையூரில் உள்ள தமிழக வெற்றிக்கழகத்தின் தலைமை அலுவலகத்தில் விருந்தளிக்கப்படுகிறது. இதற்காக தமிழக வெற்றிக் கழகத்தலைவர் விஜய் அலுவலகத்துக்கு வந்து அடைந்தார். அதன்பின் விவசாயிகளை ஆரத்தழுவி வரவேற்ற விஜய் அவர்களுடன் பேசி வருகிறார். இந்த விருந்து உபசரிப்பு நிறைவடைந்தபின், மாவட்டச் செயலாளர்கள் உடன் ஆலோசனை நடக்கிறது. ஆனால், அனைத்து மாவட்ட செயலாளர்கள் பங்குபெறும் வகையில் ஆலோசனைக் கூட்டம் நடைபெறவில்லை. குறிப்பாக விழுப்புரம் மாவட்ட தற்காலிக தலைவர், மாநாட்டுக்கு பொறுப்பு பணியாற்றிய விழுப்புரம் மாவட்ட நிர்வாகிகளுடன் ஆலோசனை நடத்தயிருக்கிறார், விஜய்.

விவசாயிகள் அனைவரையும் அனுப்பிவைத்தபின், இந்தக் கூட்டம் நடக்கயிருக்கிறது. மேலும் மாவட்டச் செயலாளர்கள் யாருக்கெல்லாம் குற்றப்பின்னணி கிடையாது என்பது குறித்து விவாதிக்கப்படுகிறது. முன்னதாகவே, முன்னணி நிர்வாகிகளுக்கு சில அறிவுரைகள் வழங்கப்பட்டிருக்கின்றன. அதன்படி, குற்றப்பின்னணி இல்லாத மாவட்ட செயலாளர்களை தேர்வு செய்வார் விஜய் என இக்கூட்டத்தில் எதிர்பார்க்கப்படுகிறது.