வாத்தியார் மீது வைக்கப்படும் விமர்சனங்கள்.. பாக்ஸ் ஆபிஸில் தடுமாறும் விடுதலை 2 - சத்தமில்லாமல் புரிந்த சாதனை

விடுதலை 2  ஐந்தாம் நாள் பாக்ஸ் ஆபிஸ் வசூல்

இதையடுத்து விடுதலை 2 படம் வெளியான முதல் நான்கு நாள்களில் ரூ. 25 கோடிக்கு மேல் வசூலை அள்ளியது. இதையடுத்து பாக்ஸ் ஆபிஸ் நிலவரங்களை வெளிப்படுத்தும் sacnilk.com கூற்றுப்படி, படம் ஐந்தாவது நாளில் ரூ. 2.40 கோடி வசூலித்திருப்பதாக கூறப்பட்டுள்ளது. இதன் மூலம் அனைத்து மொழிகளிலும் இந்தியா முழுவதிலும் படத்தின் பாக்ஸ் ஆபிஸ் வசூல் ரூ. 27.40 கோடி என தெரிவிக்கப்பட்டுள்ளது.

படம் முதல் நாளில் ரூ. 7.5 கோடி, இரண்டாவது நாளில் ரூ. 7.7 கோடி, மூன்றாவது நாளில் ரூ. 7.5 கோடி நான்காவது நாளில் ரூ. 2.3 கோடி வரை வசூலை ஈட்டியுள்ளது.

இந்த வாரம் தொடக்கத்தில் இருந்து படத்தின் வசூல் 69.33 சதவீதம் வரை சரிவை சந்தித்துள்ளது. இருப்பினும் தமிழில் இந்த மாதம் வெளியான படங்களில் விடுதலை 2 மட்டுமே ரசிகர்களை ஈர்த்திருப்பதோடு, கோடிகளில் வசூலை பெற்று வருகிறது.

சத்தமில்லாமல் சாதனை

இந்த ஆண்டில் வெளியான தமிழ் படங்களில் அதிக ஓபனிங்கை தந்த படம் என்ற  லிஸ்டில் விடுதலை 2 படம் இணைந்து சத்தமில்லாமல் சாதனை புரிந்துள்ளது. இந்த லிஸ்டில் தி கோட், வேட்டையன், அமரன், ராயன், இந்தியன் 2 ஆகிய படங்கள் இருக்கின்றன. 

முதல் ஷோவுக்கு முன்னரே ஆன்லைனில் லீக்

விஜய்சேதுபதியின் விடுதலை 2 படத்துக்கு தமிழ்நாட்டில் முதல் நாளில் மட்டும் சிறப்பு காட்சி அனுமதிக்கப்பட்டது. இதைத்தொடர்ந்து படத்தின் முதல் காட்சியானது ரிலீஸ் நாளில் காலை 9 மணிக்கு தொடங்கியது.

ஆனால் அதற்கு முன்னரே சில வெளிநாடுகளில் படம் வெளியான நிலையில், சில மணி நேரங்களிலேயே இணையத்தளங்களில் படம் லீக் ஆகியுள்ளது. தமிழ்நாட்டில் முதல் ஷோ திரையிடுவதற்கு முன்பே படம் ஆன்லைனில் வெளியாகியிருப்பது ரசிகர்களையும், திரையுலகினரையும் அதிர்ச்சியில் ஆழ்த்தியது.

விடுதலை 2 படம்

கடந்த ஆண்டு வெற்றிமாறன் இயக்கத்தில் வெளியான விடுதலை படத்தின் இரண்டாம் பாகமாக விடுதலை 2 உருவாகியுள்ளது. முதல் பாகத்தில் இடம்பிடித்த அத்தனை நடிகர்களும் இந்த பாகத்திலும் இடம்பிடித்துள்ளனர். அத்துடன் விடுதலை 2 படத்தின் கதை, முதல் பாகத்தில் பிரதான கதாபாத்திரமாக விஜய் சேதுபதி நடித்த வாத்தியார் கேரக்டரில் முன் கதையாக அமைந்துள்ளது.

இதையடுத்து இந்த பாகத்தில் மஞ்சு வாரியர், கென் கருணாஸ், கிஷோர், போஸ் வெங்கட் உள்ளிட்ட பலரும் கூடுதல் கதாபாத்திரமாக நடித்துள்ளார்கள்.

விடுதலை 2 கதையின் கரு என்ன?

முதல் பாகத்தில் போலீசுக்கும், மக்கள் படைக்கும் இடையே நடந்த மோதல், வாத்தியாரின் கைது, அதிகாரிகளின் அதிகார வர்க்கம் மக்களுக்கு எதிராக நடத்திய வெறியாட்டம் உள்ளிட்டவற்றை திரைக்கதையாக கொடுத்த வெற்றிமாறன், இந்த பாகத்தில் மக்கள் படை உருவான கதை, வாத்தியார் கம்யூனிசம் பாதையை தேர்ந்தெடுத்தற்கான காரணம், போலீசுக்கும், மக்கள் படைக்கும் இடையேயான போரில் ஜெயித்தது யார்? குமரேசனின் குற்ற உணர்வு அவனை என்ன செய்தது உள்ளிட்டவற்றை திரைக்கதையாக கொடுத்திருக்கிறார்.

கடந்த பாகம் முழுக்க முழுக்க குமரேசன் கதாபாத்திரத்தை ஏற்று நடித்த சூரியை சுற்றி இருந்த நிலையில், இந்த பாகம் முழுக்க, முழுக்க வாத்தியார் கதாபாத்திரத்தை ஏற்று நடித்த விஜய் சேதுபதியை சுற்றி அமைந்திருக்கிறது.

படம் முழுக்க வாத்தியாராக விரவி கிடக்கிறார் விஜய் சேதுபதி. வெற்றிமாறன் வழியே வாத்தியாராக அவர் பேசும் ஒவ்வொரு வசனமும் சமுதாயத்திற்கான பாடம். வாத்தியாரின் வாழ்கையில், வெவ்வேறு பருவங்களில் அவர் எதிர்கொள்ளும் சூழ்நிலைகளை புரிந்து கொண்டு நடித்திருப்பது சிறப்பு. குறிப்பாக வயதான தோற்றத்தில் அவர் வெளிப்படுத்தும் மேனரிசங்கள் அல்டிமேட்.

அவரது மனைவியாக மஞ்சு வாரியர். தைரியமும், தெளிவும் நிறைந்த பெண்ணாக சிறப்பாக நடித்திருக்கிறார். மஞ்சு வாரியருக்கும், விஜய் சேதுபதிக்கான காதல் காட்சிகள் ரசிக்க வைக்கிறது. டி கம்பெனியின் ஓசியாக வரும் சேத்தன் காமெடி, வில்லனிசம் என இரண்டிலும் பட்டையை கிளப்பி இருக்கிறார். ராஜீவ் மேனன் நடிப்பு புருவம் விரியவைக்கிறது. வாத்தியாரின், வாத்தியாராக வரும் கிஷோரின் நிதானம் கம்யூனிசம் கொள்கைகளை கனகச்சிதமாக உணரவைக்கிறது. சூரி பெரிதாக தெரியவில்லை. கென் கருணாஸின் ஆக்‌ஷன் அதகளம்.

வெற்றிமாறனின் அரசியல்

வாத்தியார் கதாபாத்திரத்தை உருவாக்கிய வெற்றிமாறன், வாத்தியார் தேர்ந்தெடுத்த கம்யூனிச பாதையில், பண்ணையார்கள், தாழ்த்தப்பட்ட மக்கள் மீது நடத்திய வன்முறை, அவர்களுக்கு எதிராக மக்கள் வன்முறையை கையில் எடுத்ததால் நடந்த விபரீதங்கள், உயர் சாதி பெண்களை தாழ்த்தப்பட்ட ஆண்கள் காதலிப்பதற்கு எதிராக வைக்கப்படும் விமர்சனங்களுக்கு பதில், கணவன், மனைவி எப்படி இருக்க வேண்டும்? அதிகார வர்க்கத்தில் இருப்பவர்கள் அலட்சியமாக நடத்தும் கொலைகள் சரியானதா? அதிகார வர்க்கத்துக்கு ஜாதிய ஏற்றத்தாழ்வு எவ்வளவு உறுதுணையாக இருக்கிறது? ஒற்றுமையின் பலம் என்ன? உள்ளிட்ட கேள்விகளுக்கான பதில்களை திரைக்கதையாக வடித்து கொடுத்து இருக்கிறார்.

காட்சிகள் சுவாரசியமாக, விறுவிறுப்பாக சென்றாலும், கம்யூனிசம் பாதையில் இடம்பெற்ற அதிகபட்ச வசனங்கள் கொட்டாவியை வரவழைக்கின்றன. இளையராஜா இன்னும் தரமான பின்னணி இசையை கொடுத்திருக்க வேண்டும். வழக்கம் போல வெற்றி மாறன் படத்தில் இடம்பெறும் டப்பிங் பிரச்சினை இந்த படத்திலும் இருக்கிறது.