நடிகர் டெல்லி கணேஷ் உடலுக்கு இறுதி மரியாதை செலுத்திய விமானப்படையினர்! தேசியக் கொடியுடன் அடக்கம் செய்யப்பட்ட உடல்

விமானப்படை மரியாதை

அப்போது, விமானப்படையினர், நடிகர் டெல்லி கணேஷ் உடலுக்கு மரியாதை செலுத்தினர், பின் விமானப் படை மற்றும் தேசியக் கொடியை டெல்லி கணேஷ் உடலுக்கு போர்த்தி, அவரது உடலை மிகுந்த மரியாதையுடன் தகனம் செய்தனர்.

நடிகர் டெல்லி கணேஷ் மறைவு

தமிழ் சினிமாவில் காமெடியன், வில்லன், குணச்சித்திர நடிகனாக 400க்கும் மேற்பட்ட படங்களில் நடித்துள்ள டெல்லி கணேஷ் வயது மூப்பு காரணமாக உயிரிழந்தார். தற்போது 80 வயதாகும் அவர், மருத்துவரின் ஆலோசனைப்படி, மது குடிப்பது, புகைப் பிடிப்பது போன்ற பழக்கங்களில் இருந்து வெளியேறியிருந்த நிலையில், அவர் நேற்று முன்தினம் இரவு 11 மணிக்கு உயிரிழந்ததாக தகவல் வெளியாகியது.

நினைவு கூர்ந்த பிரபலங்கள்

இந்த தகவலை அவரது மகன் மகாதேவன் உறுதி செய்துள்ளார். இதுகுறித்து அவர் தனது ட்விட்டர் பக்கத்தில், "எங்கள் தந்தை திரு டெல்லி கணேஷ் நவம்பர் 9 ஆம் தேதி இரவு 11 மணியளவில் காலமானார் என்பதை தெரிவிப்பதில் நாங்கள் மிகவும் வருந்துகிறோம்" என்று குறிப்பிட்டிருந்தார். இதையடுத்து அவரது உடல் மக்கள் அஞ்சலிக்காக சென்னை ராமாபுரத்தில் உள்ள அவரது வீட்டில் வைக்கப்பட்டுள்ளது எனத் தெரிவிக்கப்பட்டது. ஏராளமான திரைத்துறையினர் அவரது உடலுக்கு அஞ்சலி செலுத்துவதற்காக அவரது வீட்டில் குவிந்தனர். மேலும், அவருடனான தங்கள் நட்பையும் நெருக்கத்தையும் நினைவு கூர்ந்தனர்.

கதாப்பாத்திரத்தில் கச்சிதமாக பொருந்தும் நடிகர்

கதாபாத்திரங்களை உள்வாங்கி மக்கள் ரசிக்கும்படியாக நடிப்பதில் தமிழ் சினிமாவில் பல துணை நடிகர்கள் இருந்தாலும் நடிகர் டெல்லி கணேஷூக்கு என்று தனி இடம் உண்டு. எந்த கதாபாத்திரம் கொடுத்தாலும் அதில் கச்சிதமாக பொருந்தக்கூடியவர். கிட்டதட்ட 50 ஆண்டுகளுக்கும் மேல் கலை அனுபவம் கொண்டவர். தற்போது வெள்ளித்திரையிலும், சின்னத்திரையிலும் நடித்துக் கொண்டிருக்கும் டெல்லி கணேஷ், திருநெல்வேலி மாவட்டம், வல்லநாட்டில் 1944 ஆம் ஆண்டு அகஸ்ட் 1 ஆம் தேதி பிறந்தார்.

முதல் திரைப்படம்

இயக்குனர் பாலச்சந்தர் இயக்கத்தில் 1976 ஆம் ஆண்டு வெளியான 'பட்டினப்பிரவேசம்' என்ற படத்தின் மூலம் நடிகராக அறிமுகமானார். 1980-களில் தொடர்ந்து பல திரைப்படங்களில் நடித்த டெல்லி கணேஷ் தமிழ் சினிமாவின் முக்கிய நடிகராக ஆகிப்போனார். வில்லன், குணச்சித்திர கதாப்பாத்திரங்கள் மட்டுமல்லாது டெல்லி கணேஷ் காமெடியிலும் கலக்க கூடியவர். 'மிடில் கிளாஸ் மாதவன்', 'அவ்வை சண்முகி' ஆகிய திரைப்படங்களை அவரது காமெடி நடிப்பிற்கு உதாரணங்களாக கூறலாம்.

கவலையில் மக்கள்

டெல்லி கணேஷின் மறைவை அறிந்த ரசிகர்கள் முதல் திரையுலகினர் மற்றும் அரசியல் பிரமுகர்கள் வரை பல பிரபலங்கள் தங்கள் மனமார்ந்த இரங்கலைத் தெரிவித்தனர்.

பிரதமர் இரங்கல்

பிரதமர் நரேந்திர மோடி தனது ட்விட்டர் பக்கத்தில், "புகழ்பெற்ற திரைப்பட ஆளுமை திரு டெல்லி கணேஷ் ஜி மறைவு ஆழ்ந்த வருத்தத்தை அளிக்கிறது. ஒவ்வொரு பாத்திரத்திற்கும் அவர் கொண்டு வந்த ஆழத்திற்காகவும், தலைமுறைகளைக் கடந்து பார்வையாளர்களுடன் இணைக்கும் திறனுக்காகவும் அவர் அன்பாக நினைவுகூரப்படுவார். அவரது குடும்பத்தினருக்கும் அபிமானிகளுக்கும் இரங்கல். ஓம் சாந்தி."

ரஜினிகாந்த் இரங்கல்

ரஜினிகாந்த் தனது எக்ஸ் தளத்தில் தனது நண்பருக்கு அஞ்சலி செலுத்தி, "என் நண்பர் டெல்லி கணேஷ் ஒரு அற்புதமான மனிதர். அற்புதமான நடிகர். அவரது மறைவு செய்தி கேட்டு வருத்தமடைந்தேன். அவரை இழந்து வாடும் குடும்பத்தினருக்கும், நண்பர்களுக்கும் எனது ஆழ்ந்த இரங்கலை தெரிவித்துக் கொள்கிறேன். ஓம் சாந்தி."

தமிழ் சினிமாவில் டெல்லிகணேஷின் தனித்துவமான பங்களிப்பு பரவலாக அங்கீகரிக்கப்பட்டது. பாசி (1979) படத்தில் நடித்ததற்காக தமிழ்நாடு மாநில திரைப்பட விருது சிறப்புப் பரிசைப் பெற்றார், மேலும் 1994 ஆம் ஆண்டில் அப்போதைய முதல்வர் ஜே.ஜெயலலிதாவால் மதிப்புமிக்க கலைமாமணி விருது வழங்கி கௌரவிக்கப்பட்டார்.

தனது தொழில் வாழ்க்கையின் பிற்கால கட்டங்களில், கணேஷ் தொலைக்காட்சி மற்றும் குறும்படங்களிலும் நடித்தார், தொடர்ந்து தனது தனித்துவமான பாணியால் ரசிகர்களை கவர்ந்தார்.