Vanagaan Released: தடைகளைத் தாண்டி வெளியானது வணங்கான்.. முதல் பெயராக நடிகர் சூர்யாவிற்கு நன்றி அறிவிப்பு

தமிழ் சினிமாவின் தனித்துவமான இயக்குநர்களில் ஒருவர் பாலா. தொடர் தோல்விகள், பெர்சனல் பிரச்னைகள், நெகட்டிவான விமர்சனங்கள் என தன்னுடைய கேரியரின் மோசமான காலகட்டத்தில் இருக்கும் பாலா, சூர்யாவுடன் வணங்கான் திரைப்படத்தில் இணைந்தார். ஆனால், படப்பிடிப்பில் சில கசப்பான சம்பவங்கள் அரங்கேற, சூர்யா அந்தப்படத்தில் இருந்து விலகினார். இதனையடுத்து அந்தப்படத்தில் அருண் விஜய் கமிட் செய்யப்பட்டார்.

திடீரென சூர்யா விலகியதும் அவரைத் தொடர்ந்து கீர்த்தி ஷெட்டி, மமிதா பைஜு நீக்கப்பட்டனர். இதில் மமிதா பைஜு, சூர்யாவின் தங்கையாக நடிக்க இருந்தார்.

கடந்த ஓராண்டுக்கும் மேல், இப்படத்தின் பணிகள் நடைபெற்றன. வணங்கான் படத்தில் அருண் விஜய்க்கு ஜோடியாக ரோஷிணி நடித்திருக்கிறார். சமுத்திரக்கனி, மிஷ்கின் உள்ளிட்டோர் முக்கிய கதாபாத்திரங்களில் நடித்திருக்கின்றனர். இப்படத்தின் பாடல்களுக்கு ஜி.வி. பிரகாஷ் குமார் இசையமைத்துள்ளார். அதேபோல் பின்னணி இசையை சாம் சி.எஸ் செய்துள்ளார்.

சமீபத்தில் நடந்த வணங்கான் படத்தின் ட்ரெய்லர் வெளியீடு மற்றும் பாலா 25ஆம் ஆண்டு பாராட்டு விழாவில், நடிகர் சூர்யாவும் பாலாவும் பழைய கருத்துவேறுபாடுகளை மறந்து நட்பு பாராட்டினர். மேடையில் அண்ணன் என்றே சூர்யா, பாலாவை உரிமையோடு அழைத்தார்.

இந்நிலையில் பல்வேறு பிரச்னைகளுக்குப் பின், ஒரு வழியாக பொங்கலை ஒட்டி, கடந்த ஜனவரி 10ஆம் தேதியான இன்று திரையரங்குகளில் வெளியாகும்போது பிரச்னையை சந்தித்தது.

KDM பிரச்னை:

அதாவது, KDM பிரச்னை காரணமாக படத்தைத் திரையிடுவதில், வணங்கான் திரைப்படத்துக்கு சிக்கல் ஏற்பட்டது. தமிழகத்தில் காலை 9 மணிக்கு இப்படத்தின் சிறப்புக் காட்சியை திரையிடவும் அனுமதி வழங்கப்பட்டு இருந்தது. ஆனால், இன்று காலை 9 மணிக்கு வணங்கான் படத்தை காண தியேட்டருக்கு வந்த ரசிகர்களுக்கு ஏமாற்றமே மிஞ்சியது.

இப்படத்தின் 9 மணி காட்சிகள் ரத்து செய்யப்பட்டதாக அறிவிக்கப்பட்டன. ஏனெனில் இப்படத்தை ரிலீஸ் செய்ய KDM இன்னும் கிடைக்கவில்லையாம். அந்த லைசன்ஸ் கிடைப்பதில் சிக்கல் ஏற்பட்டதால் வணங்கான் படத்தின் காலை காட்சிகள் ரத்தாகின. இதனால் பலர் தியேட்டர்களுக்கு வெளியில் காத்திருந்தனர். அதன்பின், சரியாக காலை 11:50 மணிக்கு ரிலீஸானது.

KDM பிரச்னை என்றால் என்ன?:

யாருக்காவது பணம் கொடுக்கவில்லை என்றால் Qube (or LAB)-ல் கடிதம் கொடுத்தால் பிரதி நிறுத்தி வைக்கப்படும். ஒருமுறை படம் வெளியாகிவிட்டால் பணம் கிடைப்பது கஷ்டம். இது காலம் காலமாக கடைபிடிக்கப்படும் வழிமுறை. கடைசி நேரத்தில் பல பஞ்சயாத்துகளை தாண்டி தான் எந்த ஒரு படமும் வெளிவரும். இந்நிலையில் பணப்பிரச்னை காரணமாக சில மணிநேரம் இந்தப்படம் நிறுத்தி வைக்கப்பட்டது. அதன்பின் தயாரிப்பு தரப்பினர் செய்த பேச்சுவார்த்தைக்குப்பின், ‘வணங்கான்’ திரைப்படம் வெளியானது.

சூர்யாவுக்கு நன்றி:

இந்நிலையில் KDM (Key Delivery Message) என்றால் தியேட்டரில் படத்தை க்யூப் எனும் சாட்டிலைட் முறையில் திரையிடுவதற்கான encrypted கோட் ஆகும். இது திரையரங்குகளுக்கு கொடுக்கப்பட்ட பின், தான் ’வணங்கான்’ திரைப்படம் ரிலீஸானது.

அதனைத்தொடர்ந்து முதல் பெயராக நடிகர் சூர்யாவிற்கு நன்றி தெரிவித்து, வணங்கான் படத்தில் கார்டுபோடப்பட்டிருக்கிறது.