Top 10 Cinema : தீபாவளிக்கு வெளியாகும் படங்கள் முதல் நயன்தாரா வாழ்க்கை வரலாற்று படம் வரை உள்ள இன்றைய கோலிவுட் அப்டேட்

பெண் பாதுகாப்பு குறித்த விழிப்புணர்வு வீடியோ வெளியிட்ட ரித்திகா சிங்!

பெண்களின் பாதுகாப்பு குறித்து விழிப்புணர்வு வீடியோவை நடிகை ரித்திகா சிங் வெளியிட்டுள்ளார்.

அதில், ''யாரேனும் உங்களை தாக்கினால் முதலில் அவரின் தாக்குதலை தடுத்து அவருடைய வயிற்றிலும், கழுத்திலும் குத்த வேண்டும். தொடர்ந்து வலது புற கழுத்திலும் குத்தினால் எதிரி செயல் இழந்து விடுவான் என்று குறிப்பிட்டு உள்ளார். எதிரியை ரித்திகா சிங் அடித்து வீழ்த்துவது போன்ற காட்சியும் இந்த வீடியோவில் இடம் பெற்றுள்ளது. இந்த வீடியோ தற்போது இணையத்தில் வைரலாகி வருகிறது.

சில தவறுகளை செய்தேன் - பூஜா ஹெக்டே

பூஜா ஹெக்டே அளித்துள்ள பேட்டியில் நான் கதைகளை தேர்வு செய்வதில் ஏற்கனவே சில தவறுகள் செய்தேன். அந்த தவறுகள் மீண்டும் நடக்காமல் பார்த்து கொள்ள போகிறேன். என் கடந்த கால படங்களையெல்லாம் அலசி ஆராய்ந்து நான் என்ன தவறுகள் செய்தேன் என்று தெரிந்து கொண்டேன். தற்போது நான் சினிமாவில் கதைகள் தேர்வில் எனது அணுகுமுறையை முழுமையாக மாற்றிக்கொண்டேன்.

நடிகர் அஜித்துக்கு வாழ்த்து தெரிவித்த உதய நிதி ஸ்டாலின்

நம்முடைய SportsTN (SDAT) Logo-வை ‘அஜித்குமார் ரேசிங்’ யூனிட்டின், கார், ஹெல்மெட் மற்றும் பந்தயம் தொடர்பான உபகரணங்களில் காட்சிப்படுத்தப்பட்டுள்ளதை அறிந்து மட்டற்ற மகிழ்ச்சி அடைந்தோம். இதன்மூலம், தமிழ்நாடு விளையாட்டு மேம்பாட்டுத்துறையை உலக அரங்கில் பெருமைப்படுத்தி, ஊக்குவித்துள்ள அஜித் சாருக்கு SportsTN சார்பாக எங்களது நன்றியைத் தெரிவித்துக்கொள்கிறோம். விளையாட்டுத்துறையில் தமிழ்நாட்டை உலக அரங்கில் உயர்த்திட ஒன்றிணைந்து செயல்படுவோம். கார்பந்தய போட்டியில் வென்று தமிழ்நாட்டுக்கு நீங்கள் பெருமை சேர்த்திட வாழ்த்துகள் அஜித் சார் என தமிழக துணை முதல்வர் உதயநிதி ஸ்டாலின் தனது எக்ஸ் பதிவில் குறிப்பிட்டுள்ளார்.

கங்குவா படத்தொகுப்பாளரான நிஷாத் யூசூஃப் மரணம்

சிறுத்தை சிவா - சூர்யா கூட்டணியில் உருவாகியிருக்கும் ஆக்‌ஷன் அட்வெண்ச்சர் பேண்டஸி திரைப்படமான கங்குவா நவம்பர் 14ஆம் தேதி உலகம் முழுவதும் வெளியாக இருக்கிறது. இதையடுத்து படத்தின் புரொமோஷன் பணிகளில் படக்குழுவினர்கள் பம்பரமாக சுழன்று ஈடுபட்டு வருகின்றனர். இந்த நேரத்தில் கங்குவா படத்தின் படத்தொகுப்பாளரான நிஷாத் யூசூஃப் மரணம் அடைந்திருக்கிறார். கேரளாவை சேர்ந்த படத்தொகுப்பாளரான 43 வயதாகும் நிஷாந்த் யூசுஃப் கொச்சியிலுள்ள பனம்பிள்ளி நகரில் உள்ள தனது பிளாட்டில் அதிகாலை 2 மணிக்கு இறந்த நிலையில் கண்டறியப்பட்டார்.

மகத்தான மனிதர் முத்துராமலிங்கத் தேவர் - விஜய் புகழாரம்

பசும்பொன் முத்துராம லிங்க தேவர் குரு பூஜை விழாவையொட்டி, தமிழக வெற்றிக் கழக தலைவர் விஜய் வெளியிட்டுள்ள அறிக்கையில் கூறப்பட்டுள்ளதாவது, "அய்யா பசும்பொன் முத்துராமலிங்கத் தேவர் திருமகனார். இந்திய விடுதலைக்காகக் காத்திரமாகக் களமாடியவர். மாவீரர் நேதாஜி சுபாஷ் சந்திரபோஸின் படையை வலுப்படுத்தத் துணை நின்றவர். பாராளுமன்ற, சட்டமன்ற அரசியலில் முத்திரை பதித்த பேச்சுக் கலைப் பேரரசர். சமூக நல்லிணக்கம் பேணியவர். தமிழக அரசியலின் முக்கிய அடையாளங்களில் ஒருவராகவும் மாறிய, மகத்தான மனிதரை அவரது குருபூஜைத் திருநாளில் வணங்கி வாழ்த்திப் போற்றுவோம்." இவ்வாறு அந்த அறிக்கையில் கூறப்பட்டுள்ளது.

கொலை வழக்கில் நடிகர் தர்ஷனுக்கு இடைக்கால ஜாமின்

கன்னட நடிகர் தர்ஷனின் தோழி பவித்ரா கவுடா. தர்ஷனின் ரசிகர் ரேணுகாசுவாமி பவித்ரா கவுடாவுக்கு அருவருக்கத்தக்க மெசேஜ் அனுப்பி தொல்லை செய்து வந்ததாக தெரிகிறது. இதனால் தர்ஷன் பவித்ரா கவுடா உடன் இணைந்து திட்டமிட்டு ரேணுகா தேவியை கொலை செய்ததாக கூறப்படுகிறது. இந்த விவகாரத்தில் போலீசார் குற்றப்பத்திரிகை தாக்கல் செய்தனர். இந்நிலையில் மருத்துவ சிகிச்சைக்காக தர்ஷனின் கோரிக்கையை தொடர்ந்து 6 மாதம் இடைக்கால ஜாமின் வழங்கப்பட்டுள்ளது.

ஸாரா படத்திற்கு எல்லை மீறிய கமெண்ட்

அர்ச்சனாவின் மகள் ஸாரா, அவரது தந்தையுடன் சேர்ந்து, அவரது அலுவலகத்தில் நடந்த விருந்து நிகழ்ச்சிக்கு சென்றுள்ளனர். நிகழ்ச்சி முடிந்தததும், அவரது தந்தை ஸாராவை சாலை ஓரத்தில் நிற்க வைத்து புகைப்படம் எடுத்துள்ளார். அந்த புகைப்படத்தை ஸாரா இன்ஸ்டாகிராமில் பகிர்ந்துள்ளார்.  இந்த புகைப்படத்திற்கு எல்லை மீறும் விதமாக பலரும் ஆபாச கமெண்ட் செய்து வருகின்றனர். இதனால் அவரது குடும்பத்தினர் அதிருப்தியில் உள்ளனர்.