HBD YogiBabu: ஒன்லைன் பஞ்ச் பேசி வயிறு குலுங்க சிரிக்க வைப்பவர்..! தமிழ் சினிமாவின் காமெடி நாயகன் யோகி பாபு

குடும்ப பின்னணி

திருவண்ணாமலை மாவட்டம் ஆரணியை சேர்ந்த யோகிபாபுவின் தந்தை இந்திய ராணுவத்தில் ஹவில்தாராக பணிபுரிந்துள்ளார். இதனால் ஜம்மு காஷ்மீர் மாநிலத்தில் சில காலம் தனது பள்ளி படிப்பை படித்துள்ளார் யோகி பாபு.

யோகி பாபுவின் திருமணம் கடந்த 2020இல் திருத்தணியில் வைத்து நடைபெற்றது. அவருக்கு ஒரு மகள் உள்ளார். சினிமாவில் காமெடியில் கலக்கி வரும் யோகி பாபு தனிப்பட்ட வாழ்க்கையில் மிகவும் எளிமையானவராகவும், எதார்த்தமாக பழக்ககூடியவராகவும் உள்ளார். பொது இடங்களில் மக்களிடம் இயல்பாக பழகும் தன்மை கொண்டவராக இருந்து வரும் யோகி பாபு தொடர்பாக சர்ச்சைகள் எதுவும் பெரிதாக வந்ததில்லை.

லொள்ளு சபாவில் தொடங்கிய கலைப்பயணம்

விஜய் டிவியில் ஒளிபரப்பான காமெடி நிகழ்ச்சியின் 'லொள்ளு சபா' உதவி இயக்குநராக பணியாற்றி தனது கலை பயணத்தை தொடங்கியுள்ளார் யோகி பாபு. திரைக்கதையில் உருவாக்கத்தில் உதவி செய்ததோடு, சில ஷோக்களில் சிறிய வேடங்களிலும் தோன்றியுள்ளார். இந்த ஷோவில் பணியாற்றியபோது இவரது பெயர் பாபு தான். லொல்ளு சபாவில் இருந்து சினிமாவுக்கு வந்த காமெடியன்களில் சந்தானம், சுவாமிநாதன், சேஷு, மனோகர், ஜீவா ஆகியோரின் வரிசையில் யோகி பாபுவும் ஒருவராக உள்ளார்.

யோகி படம் தந்த திருப்பம்

கடந்த 2009இல் சுப்பிரமணிய சிவா இயக்கத்தில் அமீர் நாயகனாக நடித்து வெளியான 'யோகி' படத்தில் காமெடியனாக சிறிய வேடத்தில் தோன்றியிருப்பார். இவரது காமெடி பிரபலமாக பின்னர் யோகி பாபுவாக மாறினார். இந்த படத்துக்கு பின்னர் தொடர்ந்து பல படங்களில் பிரபல காமெடி நடிகர்களுடன் தோன்றி தனது திறமையை வெளிக்காட்டியதுடன், தனி காமெடியனாக நடிக்கும் அளவுக்கு உயர்ந்தார். ஒரு கட்டத்தில் எல்லா ஹீரோக்களின் படங்களில் தோன்றும் விதமாக உயர்ந்தார்.

யோகி பாபு பேசியதில் பிரபல வசனங்களாக யாமிருக்க பயமேன் படத்தில் இடம்பெறும் வாடா வாடா பன்னி மூஞ்சி வாயா, காக்கா முட்டை படத்தில் இடம்பெறும் எனக்கே விபூதி அடிக்க பாத்தேல போன்ற பல வசனங்கள் உள்ளன.

கதையின் நாயகனாக யோகி பாபு

'தர்மபிரபு' படத்தில் யமதர்மனின் வாரிசாக கதையின் நாயகனாக ரசிகர்களைக் கவரும் வகையில் நடித்திருந்தார். ஓடிடியில் வெளியாகி விமர்சகர்களால் பெரிதும் பாராட்டப்பட்ட 'மண்டேலா' என்னும் அரசியல் பகடி படத்தில் நடித்திருந்தார். தேர்தலில் ஒரு வாக்கு நாட்டின் தலையெழுத்தை மாற்றும் என்கிற பேச்சை மெய்பிக்கும் வகையில், ஒரு கிராமத்தில் முடி வெட்டும் தொழிலாளியாக வரும் யோகி பாபுவின் ஒற்றை வாக்குக்காக இரு தரப்பு அரசியல் கட்சியனர் மேற்கொள்ளும் மெனகெடலை பின்னணியாக வைத்து மண்டேலா படம் உருவாகியிருக்கும். இந்த பாடத்தில் காமெடியுடன், சீரியஸான கதாபாத்திரத்திலும் கலக்கியிருப்பார். ஆண்டவன் கட்டளை, பரியேறும் பொருமாள், கர்ணன் போன்ற படங்களில் காமெடியும் எதார்த்தமும் கலந்து நடித்திருப்பார்.

சிறந்த காமெடி நடிகன் விருது

நயன்தாரா கதையின் நாயகியாக நடித்திருக்கும் கோலமாவு கோகிலா படத்தில் நயன்தாரா ஒன் சைடாக லவ் பண்ணும் கதாபாத்திரத்தில் அதகளம் செய்திருப்பார் யோகி பாபு. ஹீரோ இல்லாத குறையை போக்கியிருக்கும் இவர் அதகளமாக நடிப்பை வெளிப்படுத்தியிருப்பார். இந்த படத்துக்காக சிறந்த காமெடி நடிகர் விருதையும் வென்றுள்ளார்.

இதேபோல் ஆண்டவன் கட்டளை, பரியேறும் பெருமாள் போன்ற படங்களுக்கும் விருதுகளை வென்றுள்ளார்.

டாப் ஹீரோக்கள் முதல் வளர்ந்து வரும் ஹீரோக்கள் வரை காமெடி கிங்காக இருந்து வரும் யோகி பாபுவுக்கு பிறந்தநாள் வாழ்த்துகள். டிவியில் பிரபலமாகி சினிமாக்களில் தவிர்க்க முடியாத காமெடியனாக உருவெடுத்துள்ளார். இதுவரை 100க்கும் மேற்பட்ட படங்களில் காமெடியனாகவும், தனது காமமெடி பஞ்ச்களாலும் ரசிகர்களை வயிறு குலுங்க சிரிக்க வைத்த யோகி பாபுவுக்கு இன்று பிறந்தநாள்.

சமூக வலைத்தளங்களில் எங்களை பின் தொடலாம். லிங்க்குகள் கீழே கொடுக்கப்பட்டு உள்ளன:

Twitter: https://twitter.com/httamilnews 

Facebook" https://www.facebook.com/HTTamilNews  

You Tube: https://www.youtube.com/@httamil 

Google News: https://tamil.hindustantimes.com/